സെക്രട്ടറിയേറ്റില്‍ തീ പിടിച്ചത് സംബന്ധിച്ച് അന്വേഷണം നടക്കുന്നുണ്ടെന്നും അതിനിടെ ബി ജെ പി നേതാക്കള്‍ തള്ളിക്കയറിയത് സംബന്ധിച്ച് പ്രത്യേകം അന്വേഷിക്കണമെന്ന് പറയേണ്ട കാര്യമില്ലെന്ന് ചോദ്യത്തിന് മറുപടിയായി മുഖ്യമന്ത്രി പിണറായി വിജയന്‍ പറഞ്ഞു.സെക്രട്ടറിയേറ്റിലെ തീ പിടുത്തത്തില്‍ മാത്രമല്ല, എല്ലാ കാര്യങ്ങളിലും ബി ജെ പി പറയുന്നതിന് പിന്നാലെയാണ് യു ഡി എഫ് നേതാക്കള്‍ പോകുന്നത്. തീപിടിത്തം ഉണ്ടായപ്പോള്‍ ആദ്യം സുരേന്ദ്രന്‍ വന്നതിന് പിന്നാലെ യു ഡി എഫ് നേതാക്കള്‍ വന്നതില്‍ വലിയ അത്ഭുതമില്ലെന്നും മുഖ്യമന്ത്രി പറഞ്ഞു. അവിശ്വാസപ്രമേയത്തില്‍ പ്രതിപക്ഷം ഉന്നയിച്ച എട്ട് ആരോപണങ്ങള്‍ക്ക് താന്‍ മറുപടി പറഞ്ഞില്ലെന്ന ആക്ഷേപം മുഖ്യമന്ത്രി നിഷേധിച്ചു. തന്നെ മറുപടി പറയാന്‍ അനുവദിച്ചില്ലെന്നും പ്രതിപക്ഷത്തെ ചിലര്‍ മുഖത്ത് നോക്കി കള്ളനെന്ന് വിളിച്ചെന്നും ഇതാണോ സംസ്‌കാരമെന്നും മുഖ്യമന്ത്രി ചോദിച്ചു. എല്ലാത്തിനും മറുപടി പറയാന്‍ തയ്യാറായിരുന്നു. അപ്പോഴേക്കും പ്രതിപക്ഷം നടുത്തളത്തിലിറങ്ങി ബഹളം വെച്ചെന്നും അദ്ദേഹം പറഞ്ഞു. വടക്കാഞ്ചേരിയിലെ ലൈഫ് മിഷന്‍ പദ്ധതിക്ക് അനുമതി കിട്ടിയിട്ടില്ലെന്ന റിപ്പോര്‍ട്ട് മുഖ്യമന്ത്രി നിഷേധിച്ചു. അനുമതി ലഭിച്ചെന്നാണ് തനിക്ക് കിട്ടിയ വിവരമെന്നും മുഖ്യമന്ത്രി പറഞ്ഞു. യു എ ഇ ആസ്ഥാനമായ റെഡ് ക്രസന്റില്‍ നിന്ന് സഹായം സ്വീകരിക്കുന്നതിന് കേന്ദ്രത്തിന്റെ അനുമതി ആവശ്യമില്ലെന്നും മുഖ്യമന്ത്രി മറ്റൊരു ചോദ്യത്തിന് മറുപടിയായി പറഞ്ഞു.

സര്‍ക്കാരും റെഡ്ക്രസന്റും തമ്മില്‍ കരാര്‍ ഒപ്പിടുന്നതിന് കേന്ദ്രത്തിന്റെ അനുമതി ആവശ്യമില്ല. എന്നാല്‍ കേന്ദ്രത്തെ വിവരം അറിയിക്കണം. ലൈഫ് മിഷന്‍ പദ്ധതി സംബന്ധിച്ച് സര്‍ക്കാര്‍ അന്വേഷണം തല്‍ക്കാലം ഇല്ല. ലൈഫ് മിഷനില്‍ എന്താണ് സംഭവിച്ചതെന്ന് വ്യക്തമായ വിവരം ലഭിക്കണം. റെഡ്ക്രസന്റാണ് നിര്‍മാണ ഏജന്‍സിയെ തീരുമാനിച്ചത്. അതില്‍ സര്‍ക്കാര്‍ ഇടപെട്ടിട്ടില്ലെന്നും മുഖ്യമന്ത്രി പറഞ്ഞു. സെക്രട്ടറിയേറ്റിലെ തീ പിടിത്തം സംബന്ധിച്ച് പൊലീസും ഉദ്യോഗസ്ഥരും അന്വേഷിക്കുന്നുണ്ട്. ഒരാഴ്ചയ്ക്കകം റിപ്പോര്‍ട്ട് കിട്ടും. അപ്പോള്‍ കാര്യങ്ങള്‍ വ്യക്തമാകും. ചില ഫയലുകള്‍ ഭാഗികമായി കത്തി.
തീ പിടിച്ചതെങ്ങനെയാണ്, അതിന്റെ കാരണമെന്താണ്. ഏതെല്ലാം ഫയലുകളാണ് കത്തിയത്. നഷ്ടങ്ങളുടെ കണക്ക്. തീ പിടിത്തം ഉണ്ടാകാതിരിക്കാനുള്ള നടപടികള്‍ എന്നിവ അന്വേഷിക്കുന്നുണ്ട്. സെക്രട്ടറിയേറ്റിന്റെ സുരക്ഷ കൂട്ടുമെന്നും അതിനായി ആഭ്യന്തരവകുപ്പ് അഡീഷണല്‍ സെക്രട്ടറിയെ ചുമതലപ്പെടുത്തി. സംഭവത്തില്‍ ഗൂഢാലോചന നടന്നിട്ടുണ്ടോ എന്നും അന്വേഷിക്കുന്നുണ്ട്. എന്‍ ഐ എ ആവശ്യപ്പെട്ട വിവരങ്ങളെല്ലാം സര്‍ക്കാര്‍ നല്‍കും. പ്രധാനപ്പെട്ട ഫയലുകള്‍ കത്തിയിട്ടില്ലെന്നും മുഖ്യമന്ത്രി വ്യക്തമാക്കി.