ദുബൈയില് നിന്ന് എത്തിയ വിമാന യാത്രക്കാരനെ തട്ടിക്കൊണ്ടുപോയി മര്ദിച്ച് വഴിയില് ഉപേക്ഷിച്ച സംഭവത്തില് സ്വര്ണക്കടത്ത് സംഘത്തിലെ നാലുപേര് പിടിയില്
ദുബൈയില് നിന്ന് എത്തിയ വിമാന യാത്രക്കാരനെ തട്ടിക്കൊണ്ടുപോയി മര്ദിച്ച് വഴിയില് ഉപേക്ഷിച്ച സംഭവത്തില് സ്വര്ണക്കടത്ത് സംഘത്തിലെ നാലുപേര് പിടിയില്. കഴിഞ്ഞ 17ന് ദുബൈയില് നിന്ന് കരിപ്പൂര് വിമാനത്താവളത്തില് വന്ന തൊട്ടില്പ്പാലം സ്വദേശി പാറശ്ശേരി മിത്തല് റിയാസിനെ തട്ടിക്കൊണ്ടുപോയി വധിക്കാന് ശ്രമിച്ച കേസിലാണ് അറസ്റ്റ്. മലപ്പുറം മമ്പാട് കച്ചേരിക്കുനിയില് മുഹമ്മദ് ബഷീര് എന്ന വിഗ്രഹം ബഷീര് (45), കോരക്കാട് ഇഷല് മന്സില് അബ്ദുല് നാസര് (46), താമരശ്ശേരി ചെമ്ബായി മുഹമ്മദ് (54) ഇവരുടെ മരുമകന് താമരശ്ശേരി കണ്ണീരുപ്പില് ഫസല് എന്ന ഗുണ്ടാ ഫസല് (31) എന്നിവരെയാണ് തട്ടിക്കൊണ്ടുപോകാന് ഉപയോഗിച്ച വാഹനം സഹിതം പിടികൂടിയത്. ഇവരില്നിന്ന് രണ്ട് വാഹനങ്ങളും പിടികൂടിയിട്ടുണ്ട്.
ആറ് വാഹനങ്ങളിലായെത്തിയ സ്വര്ണക്കടത്ത് സംഘം കൊണ്ടോട്ടി കാളോത്ത് വെച്ച് റിയാസ് സഞ്ചരിച്ച കാര് തടഞ്ഞ് തട്ടിക്കൊണ്ടുപോയി മര്ദിച്ച് മുക്കം ടൗണില് ഇറക്കിവിട്ടെന്നാണ് കേസ്. നിധിയായി തങ്കവിഗ്രഹം ലഭിച്ചെന്ന പേരില് തട്ടിപ്പ് നടത്തിയതടക്കം നിലമ്ബൂര്, വണ്ടൂര്, കല്പ്പറ്റ, ഒറ്റപ്പാലം, പാലക്കാട് സ്റ്റേഷനുകളിലായി ബഷീറിന്റെ പേരില് നിരവധി കേസുണ്ട്. ഫസലിന് ഗവ. ഡോക്ടറെ മര്ദിച്ച സംഭവത്തില് താമരശ്ശേരി സ്റ്റേഷനില് കേസുണ്ട്.
പിടിയിലായ പ്രതികളെ കോടതിയില് ഹാജരാക്കി. വിഗ്രഹതട്ടിപ്പിലൂടെ ഉണ്ടാക്കിയ പണം ഉപയോഗിച്ച് ബഷീര് ഗുണ്ടല്പേട്ട് ടൗണില് ആഡംബര റിസോര്ട്ട് നടത്തിയിരുന്നു. സ്വര്ണക്കടത്തുമായി ബന്ധപ്പെട്ട് റിസോര്ട്ടില് സ്ഥിരമായി വരാറുള്ള സംഘവുമായി ബഷീര് സൗഹൃദത്തിലാവുകയും പങ്കാളിയാവുകയുമായിരുന്നു. മുഖ്യപ്രതികളിലേക്ക് അന്വേഷണം എത്താതിരിക്കാന് വ്യാജപ്രതികളെ സ്റ്റേഷനില് ഹാജരാക്കാനും ശ്രമിച്ചിരുന്നു.
ഇപ്പോള് പിടിയിലായവരില്നിന്ന് ഡമ്മി പ്രതികള്ക്ക് നല്കാന് സ്വര്ണക്കടത്ത് സംഘം നല്കിയ ഒരുലക്ഷത്തില്പരം രൂപയും പിടിച്ചെടുത്തു. അതേസമയം, തട്ടിക്കൊണ്ടുപോയി മര്ദനമേറ്റ റിയാസ് നല്കിയ മൊഴിയും പൊലീസ് വിശദമായി പരിശോധിക്കുന്നുണ്ട്.
"
https://www.facebook.com/Malayalivartha
