സര്‍ക്കാരിനെതിരെ രമേശ്‌  ചെന്നിത്തല ഒളിഞ്ഞും തെളിഞ്ഞും സമരം നടത്തിയിട്ടും കോടിയേരി ബാലകൃഷ്ണന്‍ ചെന്നിത്തലയ്‌ക്കെതിരെ കമാന്നൊരു അക്ഷരം പറഞ്ഞില്ല. ഇവര് ചക്കരയും ഈച്ചയുമാണോയെന്ന് പലര്‍ക്കും തോന്നിയിരുന്നു. എന്നാല്‍ മല പോലെ സിബിഐ വന്നതോടെ രണ്ട് നാള്‍ കൊണ്ട് ഞാനും ജോജീം അടിച്ച് പിരിഞ്ചു എന്നതുപോലെ ഇരുവരും അടിച്ചു പിരിഞ്ഞു. ഫലമാകട്ടെ മലയാളികള്‍ക്ക് നല്ല നാടന്‍ തല്ല് കാണാനുള്ള യോഗമുണ്ടായി.

സ്വപ്ന നല്‍കിയ ഐ ഫോണില്‍ തട്ടി ചെന്നിത്തല മലര്‍ന്നടിച്ച് വീണപ്പോള്‍ ടിവിയില്‍ വാര്‍ത്ത വന്നു ചെന്നിത്തലയ്‌ക്കെതിരെ വ്യക്തിപരമായ ആക്രമണം സിപിഎം നടത്തില്ലെന്ന്. ചിലത് പ്രതീക്ഷിച്ച് എ ഫോണും ഐ ഫോണുമായി അങ്കം തുടങ്ങിയ സൈബര്‍ സഖാക്കള്‍ തലയില്‍ കൈവച്ചു പോയി. എന്നാല്‍ അവരുടെ സങ്കടം തീര്‍ക്കാന്‍ കോടിയേരി നേരിട്ട് പത്രസമ്മേളനം നടത്തി ചെന്നിത്തലയെ കൊല്ലത്തേയ്ക്ക് കൊണ്ടുപോയി രണ്ട് കൊടുത്തു.

കൊടുത്താല്‍ കൊല്ലത്തും കിട്ടുമെന്ന ചൊല്ല് ചെന്നിത്തലയുടെ കാര്യത്തില്‍ ശരിയായെന്നാണ് കോടിയേരി പറഞ്ഞത്. യുഎഇ കോണ്‍സുലേറ്റില്‍നിന്ന് പ്രതിപക്ഷ നേതാവ് രമേശ് ചെന്നിത്തല പാരിതോഷികം വാങ്ങിയെന്നും അതുവഴി പ്രോട്ടോക്കോള്‍ ലംഘിച്ചു. മന്ത്രി കെ.ടി.ജലീലിന്റെ രാജിയാവശ്യപ്പെട്ട മാനദണ്ഡം ചെന്നിത്തലയ്ക്കും ബാധകമാണ്.

ബിജെപി ആഗ്രഹിക്കുന്നത് ഭരണഘടന സ്ഥാപനങ്ങള്‍ നടപ്പാക്കുകയാണ് ചെയ്യുന്നത്. ഒരു ജനവിഭാഗത്തിന് നീതി നിഷേധിക്കുന്നുവെന്നും കോടിയേരി പറഞ്ഞു. രാഹുല്‍ ഗാന്ധിയെ കയ്യേറ്റം ചെയ്ത യുപി പൊലീസ് നടപടി അപലപനീയമെന്നും സിപിഎം സംസ്ഥാന സെക്രട്ടറി പ്രതികരിച്ചു.

ഇങ്ങോട്ട് തല്ലിയാല്‍ ബംഗളൂരുരുവില്‍ പോയി തല്ലുന്ന ചെന്നിത്തലയുണ്ടോ വിടുന്നു. കൊടുത്താല്‍ കൊല്ലത്തല്ല തിരുവനന്തപുരത്തോ ബംഗളൂരുവിലോ കിട്ടും. കൂപ്പറില്‍ കേറിയവരെയൊക്കൈ ചോദ്യം ചെയ്യുമെന്നും കോടിയേരിക്ക് ചെന്നിത്തല മറുപടി നല്‍കി. കോണ്‍സുലേറ്റിന്റെ ചടങ്ങില്‍ താന്‍ പങ്കെടുത്താല്‍ അതെങ്ങനെ പ്രോട്ടോക്കോള്‍ ലംഘനമാവും. എനിക്കൊപ്പം ബിജെപി നേതാവ് ഒ.രാജഗോപാലും സി.പി.എം നേതാവ് എം. വിജയകുമാറും ഉണ്ടായിരുന്നു. അവരൊക്കെ പ്രോട്ടോക്കോള്‍ ലംഘിച്ചെന്നാണോ കോടിയേരി പറയുന്നത്. താന്‍ എന്തായാലും കാരാട്ട് റസാഖിന്റെ മിനി കൂപ്പറില്‍ കേറി സഞ്ചരിച്ചിട്ടില്ല. കൂപ്പറില്‍ കേറിയവരൊക്കൈ അന്വേഷണ ഏജന്‍സികള്‍ ചോദ്യം ചെയ്യുമെന്നും ചെന്നിത്തല പറഞ്ഞു. സ്വന്തം മകന്‍ മയക്കുമരുന്ന് കേസില്‍ കുടുങ്ങുവാന്‍ പോകുന്നതിന്റെ അസ്വസ്ഥതയിലാണ് കോടിയേരിയെന്നും അദ്ദേഹം പരിഹസിച്ചു.

ഐ.എം.ഇ.ഐ നമ്പര്‍ പരിശോധിച്ച് തനിക്ക് നല്‍കിയെന്ന് പറയുന്ന വിവാദ ഐഫോണ്‍ ആരാണ് ഇപ്പോള്‍ ഉപയോഗിക്കുന്നതെന്ന് കണ്ടെത്തണം. ഇക്കാര്യം ആവശ്യപ്പെട്ട് താന്‍ ഡിജിപി ലോക്‌നാഥ് ബെഹ്‌റയ്ക്ക് താന്‍ പരാതി നല്‍കിയിട്ടുണ്ട്. ഈ പരാതിയുടെ കോപ്പി ഞാന്‍ മാധ്യമങ്ങള്‍ക്ക് നല്‍കും. യുഎഇ ദേശീയദിനത്തിന്റെ ഭാഗമായി യുഎഇ കോണ്‍സുലേറ്റ് സംഘടിപ്പിച്ച പരിപാടിയിലാണ് ഞാന്‍ പങ്കെടുത്തത്. തുടര്‍ന്ന് കോണ്‍സുലേറ്റ് സംഘടിപ്പിച്ച ഒരു മത്സരപരിപാടിയുടെ നറുക്കെടുപ്പിലും താന്‍ നടത്തി.

ഇതല്ലാതെ താന്‍ ഒരു ഉപഹാരവും താന്‍ ആരുടെ കൈയില്‍ നിന്നും വാങ്ങിയിട്ടില്ല ഉപയോഗിച്ചിട്ടുമില്ല. നട്ടാല്‍ മുളയ്ക്കാത്ത നുണകള്‍ പ്രചരിപ്പിക്കുകയാണ്. ഈ സര്‍ക്കാരിനെതിരെ ഞാന്‍ പോരാടുന്നത് രേഖകളുടേയും തെളിവുകളുടേയും അടിസ്ഥാനത്തിലാണ്. ഇവരുടെ കൈയില്‍ നിന്നും ഐഫോണ്‍ വാങ്ങേണ്ട ഗതികേടൊന്നും എനിക്കില്ല. ഇതുകൊണ്ടൊന്നും എന്നെ തളര്‍ത്താം എന്നു കരുതേണ്ട സര്‍ക്കാരിനെതിരെ ശക്തമായ പ്രക്ഷോഭവുമായി പ്രതിപക്ഷം മുന്നോട്ട് പോകും. കൊടുത്താല്‍ കൊല്ലത്തല്ല തിരുവനന്തപുരത്തോ ബെംഗളൂരുവിലോ കിട്ടും അതു അടുത്ത ദിവസമറിയാം. ഇങ്ങനെയൊരാള്‍ സിപിഎം സംസ്ഥാന സെക്രട്ടറിയായി ഇരിക്കുന്നതാണ് ഞങ്ങള്‍ക്കും നല്ലത്. കള്ളക്കടത്ത് കേസിലും മയക്കുമരുന്ന് കേസിലും കൂപ്പര്‍ കേസിലും സ്വര്‍ണക്കടത്ത് കേസിലും ഉള്‍പ്പെടുന്ന ഒരു പാര്‍ട്ടി സെക്രട്ടറി പി.കൃഷ്ണപ്പിള്ളയുടേയും ഇഎംഎസിന്റേയും കസേരയില്‍ ഇരിക്കുന്നതിന് നല്ല നമസ്‌കാരം എന്നും ചെന്നിത്തല പറഞ്ഞു. എന്തായാലും ഇത് നാടന്‍ തല്ലിന്റെ തുടക്കം മാത്രം. ബാക്കി തല്ല് ചാനല്‍ ചര്‍ച്ചക്കാര്‍ ഏറ്റെടുത്തോളും.