പാവം ഈ സുരേന്ദ്രന്റെ ഒരു യോഗമേ. അല്ലെങ്കില്‍ തന്നെ ബിജെപി അധ്യക്ഷന്‍ കെ. സുരേന്ദ്രനും പ്രതിപക്ഷ നേതാവ് രമേശ് ചെന്നിത്തലയും ഒരുമിച്ചാണ് സ്വപ്ന സുരേഷിന്റെ പേരില്‍ സര്‍ക്കാരിനെതിരെ ആഞ്ഞടിച്ച് തുടങ്ങിയത്. സുരേന്ദ്രന്‍ ഓരോന്ന് വെളിപ്പെടുത്തുമ്പോള്‍ അതിന്റെ എക്കോ സൗണ്ട് പോലെ ചെന്നിത്തലയും ഉച്ചയ്ക്ക് 12 മണിക്കെത്തും. പ്രതിപക്ഷ നേതാവായതിനാല്‍ ചാനലുകള്‍ ലൈവായി നല്‍കുന്നതോടെ അവസാനം ക്രഡിറ്റെല്ലാം ചെന്നിത്തല കൊണ്ടുപോയി. എന്തിന് സിബിഐ കേരളത്തില്‍ വരുമെന്ന് പോലും സുരേന്ദ്രന്‍ വെളിപ്പെടുത്തി. എന്നാല്‍ സുരേന്ദ്രന്റെ വില കാണാതെ മാനസികനില പരിശോധിക്കാനാണ് പലരും ശ്രമിച്ചത്. അതേസമയം സുരേന്ദ്രന്‍ രാജ്യം ഭരിക്കുന്ന പാര്‍ട്ടിയുടെ അധ്യക്ഷനാണെന്ന കാര്യം പോലും അവര്‍ മറന്നു. അങ്ങനെ സുരേന്ദ്രനും ചെന്നിത്തലയും മത്സരിച്ച് സമരം ചെയ്യുമ്പോഴാണ് ഐ ഫോണിന്റെ രൂപത്തില്‍ യൂണിടെക് ഉടമ ചെന്നിത്തലയെ എറിഞ്ഞ് വീഴ്ത്തിയത്. അതും സമരത്തിന് കാരണക്കാരിയായ സ്വപ്നയുടെ പേരില്‍.

സ്വപ്‌ന സുരേഷ് ആവശ്യപ്പെട്ട പ്രകാരം അഞ്ച് ഐ ഫോണുകള്‍ വാങ്ങി നല്‍കിയെന്നാണ് വടക്കാഞ്ചേരിയില്‍ ലൈഫ് മിഷന്‍ വീടുകള്‍ പണിയാന്‍ കരാര്‍ ഏറ്റെടുത്ത യൂനിടെക് ഉടമ സന്തോഷ് ഈപ്പന്‍ ഹൈകോടതിയില്‍ പറഞ്ഞത്. 2019 ഡിസംബര്‍ രണ്ടിന് യു.എ.ഇ.കോണ്‍സുലേറ്റ് സംഘടിപ്പിച്ച ദേശീയ ദിനാഘോഷ ചടങ്ങില്‍ മുഖ്യാതിഥിയായി പങ്കെടുത്ത പ്രതിപക്ഷ നേതാവ് രമേശ് ചെന്നിത്തല അടക്കമുള്ളവര്‍ക്ക് ഇത് സമ്മാനമായി നല്‍കിയെന്നും സി.ബി.ഐ.അന്വേഷണത്തിനെതിരെ യൂനിടെക് നല്‍കിയ ഹര്‍ജിയില്‍ പറയുന്നു.

ലൈഫ് മിഷനില്‍ സ്വപ്നക്കും സന്ദീപ് നായര്‍ക്കും കൈക്കൂലി നല്‍കിയെന്നും യൂണിടാക് എം.ഡി. ലൈഫ് മിഷന്‍ ഇടപാടുമായി ബദ്ധപ്പെട്ട് സി.ബി.ഐ രജിസ്റ്റര്‍ ചെയ്ത എഫ്.ഐ.ആര്‍ റദ്ദാക്കണമെന്നാവശ്യപ്പെട്ട് ഹൈകോടതിയില്‍ നല്‍കിയ ഹര്‍ജിയിലാണ് ചെന്നിത്തലക്കെതിരെ ആരോപണമുള്ളത്.

ദേശീയ ദിനാഘോഷത്തിന് എത്തുന്നവര്‍ക്ക് സമ്മാനമായി നല്‍കനെന്ന പേരില്‍ തന്നെയാണ് മൊബൈല്‍ ആവശ്യപ്പെട്ടത്. ഐ ഫോണ്‍ വാങ്ങിയതിന്റെ ബില്ലും ഹാജരാക്കിയിട്ടുണ്ട്. വടക്കാഞ്ചേരിയിലെ പദ്ധതിക്കൊപ്പം ഭാവിയിലും പദ്ധതിയുടെ കരാര്‍ കിട്ടുമെന്ന പ്രതീക്ഷയിലാണ് സ്വപ്ന സുരേഷ് മുഖേന യു.എ.ഇ കോണ്‍സുലേറ്റ് ആവശ്യപ്പെട്ട പ്രകാരം കമീഷന്‍ നല്‍കിയതെന്നും ഹര്‍ജിയില്‍ പറയുന്നു. ഇതില്‍ 3.80 കോടി രൂപ യു.എസ്.ഡോളറായി 2019 ആഗസ്റ്റ് രണ്ടിനാണ് കൈമാറിയത്.

തിരുവനന്തപുരം കവടിയാറുള്ള കഫേ കോഫി ഡേയില്‍ വെച്ച് യു.എ.ഇ.കോണ്‍സുലേറ്റിലെ സാമ്പത്തിക വിഭാഗം തലവന്‍ ഈജിപ്ഷ്യന്‍ പൗരന്‍ ഖാലിദിനാണ് ഈ തുക കൈമാറിയത്. 68 ലക്ഷം രൂപ സന്ദീപ് നായരുടെ ഉടമസ്ഥതയിലുള്ള ഇസോമോ ട്രെയിഡിങ് കമ്പനിയുടെ അക്കൗണ്ടിലേക്ക് നല്‍കിയതായും ഹര്‍ജിയില്‍ പറയുന്നു.

അതേസമയം തനിക്ക് ഫേണ്‍ കിട്ടിയിട്ടില്ലെന്ന് ചെന്നിത്തല ആണയിടുകയാണ്. തനിക്ക് ഐ ഫോണ്‍ തരേണ്ട ആവശ്യമില്ല. പരിപാടിയില്‍ വിളിച്ചശേഷം സമ്മാനം നല്‍കിയെന്ന് വിളിച്ച് പറയുന്നത് മോശമാണ്. തന്റെ പേരില്‍ ആരെങ്കിലും ഐ ഫോണ്‍ തട്ടിയെടുത്തോയെന്ന് അറിയില്ല എന്നും ചെന്നിത്തല പറയുന്നു. കൊള്ളാം. ചെന്നിത്തല സംശയിക്കുന്ന അതാരാണ്?

എന്തായാലും 5 ഫോണില്‍ ഒന്ന് കൊടുത്ത ആള്‍ തന്നെ വെളിപ്പെടുത്തിയതോടെ ബാക്കിയുള്ള നാലെണ്ണം എവിടെപ്പോയെന്ന ചോദ്യം അരിയാഹാരം കഴിക്കുന്ന മലയാളികള്‍ ചോദിച്ച് പോകുകയാണ്. ഇതിന് ഉത്തരം സന്തോഷ് ഈപ്പനോ സ്വപ്നയോ അല്ലെങ്കില്‍ വാങ്ങിയവരോ പറഞ്ഞ് നെഞ്ച് വിരിച്ച് ഐ ഫോണ്‍ ചലഞ്ച് ഏറ്റെടുക്കേണ്ടതാണ്. മാന്യമായി പറഞ്ഞില്ലെങ്കില്‍ സാക്ഷാല്‍ സുരേന്ദ്രന്‍ തന്നെ പറയും അതവസാനം നാണക്കേടാകും. ഇത്രയൊക്കെ സുരേന്ദ്രന്‍ പറഞ്ഞത് നടക്കുമെങ്കില്‍ ഇനിയും പറഞ്ഞാല്‍ വിശ്വസിച്ചാലെന്താ... സുരേന്ദ്രാ കാപ്പാത്തുങ്കോ...