കോവിഡ് പ്രോട്ടോക്കോള്‍ പാലിച്ച് തിരഞ്ഞെടുപ്പു നടത്തുന്നതിനെക്കുറിച്ച് ആശങ്കകള്‍ ഉണ്ടെങ്കിലും ഏറെ നാളത്തേക്ക് തദ്ദേശ തിരഞ്ഞെടുപ്പ് നീട്ടിവയ്ക്കുന്നത് ഉചിതമല്ലെന്ന കമ്മിഷന്റെയും സര്‍ക്കാരിന്റെയും വിലയിരുത്തലിനെ തുടര്‍ന്ന് തദ്ദേശ തിരഞ്ഞെടുപ്പ് ഡിസംബര്‍ 15-ന്് മുന്‍പ് നടത്താനുള്ള ഒരുക്കങ്ങള്‍ സംസ്ഥാന തിരഞ്ഞെടുപ്പ് കമ്മിഷന്‍ ആരംഭിച്ചു. തദ്ദേശ സ്ഥാപന ഭരണസമിതികളുടെ കാലാവധി നവംബര്‍ 11-ന് അവസാനിക്കും.തുടര്‍ന്ന് ഒരു മാസത്തിലേറെ ഇവ അഡ്മിനിസ്‌ട്രേറ്റീവ് ഭരണത്തിലായിരിക്കും.

ജനുവരിയില്‍ ലോക്‌സഭാ, നിയമസഭാ തിരഞ്ഞെടുപ്പുകളുടെ വോട്ടര്‍ പട്ടിക പുതുക്കല്‍ ആരംഭിക്കണം. തദ്ദേശ തിരഞ്ഞെടുപ്പ് ഡിസംബറിന് അപ്പുറത്തേക്കു നീണ്ടാല്‍ നിയമസഭാ തിരഞ്ഞെടുപ്പിന്റെ നടപടിക്രമങ്ങളെ ബാധിക്കും. അധികം ഇടവേളയില്ലാതെ 2 തിരഞ്ഞെടുപ്പു വരുമെന്നതും രണ്ടിനുമായി ഏറെ നാള്‍ പെരുമാറ്റച്ചട്ടം ഉണ്ടാകുമെന്നതും ഭരണസ്തംഭനത്തിന് ഇടയാക്കും.

തിരുവനന്തപുരം, കൊല്ലം കോര്‍പറേഷനുകളിലെ സംവരണ വാര്‍ഡ് നറുക്കെടുപ്പ്, തദ്ദേശസ്ഥാപന അധ്യക്ഷരുടെ സംവരണം നിശ്ചയിക്കല്‍ എന്നിവ ഈ മാസം നടക്കും. നഗരകാര്യ ഡയറക്ടറേറ്റില്‍ ചില ജീവനക്കാര്‍ക്ക് കോവിഡ് സ്ഥിരീകരിച്ചത് മൂലമാണ് ഇവ മാറ്റിവച്ചത്. വരണാധികാരികള്‍ക്കും ഉദ്യോഗസ്ഥര്‍ക്കുമുള്ള തിരഞ്ഞെടുപ്പ് പരിശീലനം ജില്ലാ, ബ്ലോക്ക് തലങ്ങളില്‍ നാളെ ആരംഭിച്ച് 26-ാം തീയതി പൂര്‍ത്തിയാക്കും. തിരഞ്ഞെടുപ്പിനു മുന്നോടിയായി ഒരു തവണ കൂടി വോട്ടര്‍ പട്ടിക പുതുക്കും. വോട്ടിങ് യന്ത്രങ്ങളുടെ ആദ്യഘട്ട പരിശോധന ഉടന്‍ ആരംഭിക്കും. ആകെ വേണ്ട 45,000 യന്ത്രങ്ങളില്‍ 8000 യന്ത്രങ്ങള്‍ കേന്ദ്ര തിരഞ്ഞെടുപ്പ് കമ്മിഷനില്‍ നിന്നു കടം വാങ്ങും.

ഒരു ജീവനക്കാരന് കോവിഡ് സ്ഥിരീകരിച്ചതിനെ തുടര്‍ന്ന് വെള്ളിയാഴ്ച അടച്ചിട്ട സംസ്ഥാന തിരഞ്ഞെടുപ്പു കമ്മിഷന്റെ ഓഫിസ് ഇന്നു തുറക്കും.