ഹൈദരാബാദിലെ ഔട്ടർ റിങ് റോഡിലുണ്ടായ ദാരുണമായ വാഹനാപകടത്തിലാണ് 31 വയസ്സുകാരനായ ഭരത് മരണപ്പെട്ടത്. അദ്ദേഹം സഞ്ചരിച്ചിരുന്ന കാർ നിയന്ത്രണം വിട്ട് ട്രക്കിന് പിന്നിൽ ഇടിക്കുകയായിരുന്നെന്നാണ് റിപ്പോർട്ടുകളുള്ളത്. യുവനടൻ ഭരത് കാന്തിന്റെ അപ്രതീക്ഷിത വിയോഗം തെലുങ്ക് സിനിമാലോകത്തെ നടുക്കി .

ഹൈദരാബാദിലെ അഡിബത്‌ല പൊലീസ് സ്റ്റേഷൻ പരിധിയിലുള്ള എക്സിറ്റ് നമ്പർ 12-ന് സമീപമാണ് അപകടം നടന്നത്. ഭരത്തിനൊപ്പം കാറിലുണ്ടായിരുന്ന സുഹൃത്ത് സായി ത്രിലോകും അപകടത്തിൽ മരണപ്പെട്ടു. അർദ്ധരാത്രിയോടെ നടന്ന ഈ അപകടം സിനിമാ പ്രേമികളെയും സഹപ്രവർത്തകരെയും ഏറെ ദുഃഖത്തിലാഴ്ത്തി.

അപകടവിവരം അറിഞ്ഞ ഉടൻ തന്നെ പൊലീസ് സ്ഥലത്തെത്തി രണ്ടുപേരെയും ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

നിലവിൽ മൃതദേഹങ്ങൾ പോസ്റ്റ്‌മോർട്ടം നടപടികൾക്കായി മാറ്റി. സംഭവത്തിൽ പൊലീസ് കേസെടുത്ത് അന്വേഷണം തുടങ്ങി.