ഞെട്ടിത്തരിച്ച് സഖാക്കള്... കസ്റ്റംസിനെ പറ്റിച്ച് ബോധക്കേടിലൂടെ ഐസിയുവില് പോയ ശിവശങ്കറിനെ ഞെട്ടിച്ച് സിബിഐയുടെ നീക്കം; ലൈഫ് മിഷനില് സ്റ്റേ ഒഴിവാക്കാനുള്ള സിബിഐ അപ്പീല് ഹൈക്കോടതി ഇന്ന് പരിഗണിക്കും; സ്റ്റേ ഒഴിവാക്കിയില്ലെങ്കില് സുപ്രീം കോടതിയില് പോകും
സര്ക്കാര് മുന് സെക്രട്ടറി എം ശിവശങ്കറെ സംബന്ധിച്ചും സര്ക്കാരിനെ സംബന്ധിച്ചും ഇന്ന് നിര്ണായകമാണ്. ലൈഫ് മിഷന് കേസന്വേഷണത്തില് നിന്നും സര്ക്കാരിനെ ഒഴിവാക്കുന്നതില് രണ്ട് മാസത്തെ സ്റ്റേ അനുവദിച്ച കേസില് സിബിഐ സമര്പ്പിച്ച അപ്പീല് കോടതി ഇന്ന് പരിഗണിക്കുകയാണ്. ഹൈക്കോടതി സ്റ്റേ ഒഴിവാക്കിയില്ലെങ്കില് സുപ്രീം കോടതിയെ സമീപിക്കും. മാത്രമല്ല കസ്റ്റംസില് നിന്നും ഒഴിഞ്ഞ് മാറിയ ശിവശങ്കറിനെ സിബിഐ പൂട്ടാനൊരുങ്ങുകയുമാണ്. വേണ്ടത്ര തെളിവ് കിട്ടികഴിഞ്ഞാല് അറസ്റ്റിലേക്ക് നീങ്ങാനാണ് സാധ്യത.
അതേസമയം വിദേശസംഭാവനാ നിയന്ത്രണച്ചട്ടം (എഫ്.സി.ആര്.എ) ലംഘിച്ചെന്ന സി.ബി.ഐ. കേസില്, ഹൈക്കോടതിയില്നിന്നു തിരിച്ചടി ഭയന്ന് ലൈഫ് മിഷന് അടിയന്തരനീക്കം നടത്തുകയാണ്.
ലൈഫ് മിഷന് സി.ഇ.ഒ: യു.വി. ജോസിനെതിരേ അന്വേഷണത്തിനുള്ള സ്റ്റേ നീക്കണമെന്നാവശ്യപ്പെട്ടു സി.ബി.ഐ. ഹൈക്കോടതിയില് അപ്പീല് നല്കിയിരുന്നു. എഫ്.സി.ആര്.എ. ലംഘിച്ചതിനു സി.ബി.ഐ. രജിസ്റ്റര് ചെയ്ത എഫ്.ഐ.ആര്. നിയമപരമായി നിലനില്ക്കില്ലെന്നായിരുന്നു ലൈഫ് മിഷന് സി.ഇ.ഒയുടെ വാദം. ഇതു പരിഗണിച്ച ജസ്റ്റിസ് വി.ജി. അരുണിന്റെ ബെഞ്ചാണ് അന്വേഷണം രണ്ടുമാസത്തേക്കു സ്റ്റേ ചെയ്തത്. ഇതിനെതിരേയാണു സി.ബി.ഐയുടെ അപ്പീല്.
കേസ് ഇനി പരിഗണിക്കുന്നതും സി.ബി.ഐയുടെ അപ്പീല് കേള്ക്കേണ്ടതും മറ്റൊരു ബെഞ്ചാണ്. എന്നാല്, വീഡിയോ കോണ്ഫറന്സ് സൗകര്യമുള്ള ബെഞ്ചിലേക്കു കേസ് മാറ്റണമെന്നാവശ്യപ്പെട്ടാണു ജോസ് ഇന്നലെ പ്രത്യേക അപേക്ഷ നല്കിയത്. സി.ബി.ഐയുടെ അപ്പീല് ഈയാഴ്ച പരിഗണിക്കാനിരിക്കേയാണു ലൈഫ് മിഷന്റെ അപ്രതീക്ഷിതനീക്കം. അഭിഭാഷകന് ഡല്ഹിയിലായതിനാല് വീഡിയോ കോണ്ഫറന്സിങ്ങിലൂടെ ഹാജരാകാന് സൗകര്യമുള്ള മറ്റൊരു ബെഞ്ചിലേക്കു കേസ് മാറ്റണമെന്നാണാവശ്യം.
ലൈഫ് മിഷനെ ഒഴിവാക്കിയാല്, യൂണിടാക്, സെയിന് വെഞ്ചേഴ്സ് എന്നീ നിര്മാണക്കമ്പനികളില് മാത്രമായി അന്വേഷണം ഒതുങ്ങും. അത് ഒഴിവാക്കാനാണു റെഡ്ക്രെസന്റുമായി ധാരണാപത്രം ഒപ്പിട്ടതും അന്വേഷിക്കണമെന്ന് എഫ്.ഐ.ആറില് സി.ബി.ഐ. ആവശ്യപ്പെട്ടത്. ലൈഫ് മിഷന് ഇടപാടിനു പിന്നില് പ്രവര്ത്തിച്ചതു മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറാണെന്നാണു പ്രതികളുടെ മൊഴി. ഹൈക്കോടതി അപ്പീല് തള്ളിയാല് സുപ്രീം കോടതിയെ സമീപിക്കാനാണു സി.ബി.ഐ. നീക്കം.
അതേസമയം വടക്കാഞ്ചേരി ലൈഫ്മിഷന് പദ്ധതിയില് സി.ബി.ഐ. രജിസ്റ്റര് ചെയ്ത എഫ്.ഐ.ആര്. റദ്ദാക്കണമെന്നാവശ്യപ്പെട്ട് ലൈഫ്മിഷനുവേണ്ടി സര്ക്കാര് കോടതിയെ സമീപിച്ചത് ചോദ്യം ചെയ്ത് ആലപ്പുഴ സ്വദേശി മൈക്കിള് വര്ഗീസ് ഫയല് ചെയ്ത പൊതുതാത്പര്യ ഹര്ജി ഹൈക്കോടതി വിധി പറയാന് മാറ്റി.
സ്വര്ണക്കടത്തില് പ്രതികളായ സ്വപ്നാ സുരേഷ് അടക്കമുള്ളവര് പങ്കാളിയായ കേസ് റദ്ദാക്കാന് സര്ക്കാര് ഹര്ജി നല്കിയതിനെയാണ് ചോദ്യം ചെയ്യുന്നത്. കുറ്റകൃത്യങ്ങള് തടയുകയും കുറ്റവാളികളെ പിടികൂടുകയും ചെയ്യേണ്ട സര്ക്കാര് അവരെ സഹായിക്കുന്ന നടപടിയാണ് സ്വീകരിച്ചിരിക്കുന്നതെന്നും ഹര്ജിയില് ആരോപിച്ചു.
അതേസമയം മുന്കൂര് ജാമ്യം കിട്ടിയതോടെ ശിവശങ്കര് തിരുവനന്തപുരം വഞ്ചിയൂരിലെ സ്വകാര്യ ആയുര്വേദ ആശുപത്രിയില് ചികിത്സ തേടി. 23വരെ ശിവശങ്കറിനെ കസ്റ്റംസ് അറസ്റ്റ് ചെയ്യുന്നത് കോടതി തടഞ്ഞെങ്കിലും, അദ്ദേഹത്തെ ചോദ്യംചെയ്യാന് കസ്റ്റംസിന് കഴിയുമായിരുന്നു. ആയുര്വേദ ചികിത്സയിലായതിനാല് ചോദ്യം ചെയ്യല് ഒഴിവാക്കിയേക്കും എന്ന സൂചനയുണ്ട്. അതേസമയം കസ്റ്റംസിന്റെ അറസ്റ്റ് കോടതി തടഞ്ഞാല് പിന്നെ ഡമ്മിയുമായി വരുന്നത് സിബിഐ ആയിരിക്കും.
https://www.facebook.com/Malayalivartha
