ഏപ്രില് മുതല് ശമ്പളം ലഭിക്കാതിരിക്കുന്ന കബനി പ്രോജക്ട് ജീവനക്കാര്ക്ക് ശമ്പളം നല്കാന് ഉത്തരവ്
കബനി പ്രോജക്ട് നിര്ത്തലാക്കിയതോടെ മണ്ണു സംരക്ഷണ വകുപ്പിന് കീഴിലെ 111 ജീവനക്കാര്ക്ക് ഏപ്രില് മുതല് ശമ്പളം മുടങ്ങിയിരുന്നു. കബനി പ്രോജക്ടിന് കീഴില് ജില്ലയിലെ 6 ഓഫിസുകളില് 104 ജീവനക്കാരും ഡയറക്ടറേറ്റില് 7 ജീവനക്കാരുമാണുള്ളത്. ഏപ്രില് മുതല് ശമ്പളം ലഭിക്കാതിരിക്കുന്ന കബനി പ്രോജക്ടിലെ ജീവനക്കാര്ക്ക് ശമ്പളം നല്കാനും വകുപ്പില് തസ്തികകള് സൃഷ്ടിച്ച് ജോലി നല്കാനും കേരള അഡ്മിനിസ്ട്രേറ്റീവ് ട്രൈബ്യൂണല് വിധിച്ചു.
ശമ്പളം മുടങ്ങിയതോടെ ജീവനക്കാര് ഒട്ടേറെ സമരം നടത്തിയിരുന്നു. ഏപ്രില് മുതല് ഓഗസ്റ്റ് വരെയുള്ള ശമ്പളം 2 മാസത്തിനകം വിതരണം ചെയ്യണം. സെപ്റ്റംബര്, ഒക്ടോബര് മാസത്തെ ശമ്പളം നവംബര് ആദ്യവാരം വിതരണം ചെയ്യാനും ഒരു മാസത്തിനകം ജീവനക്കാരെ മണ്ണു സംരക്ഷണ വകുപ്പില് സംസ്ഥാനത്തെ വിവിധ ഓഫിസുകളിലെ ഒഴിവുകളില് നിയമിക്കണമെന്നുമാണു ഉത്തരവ്. ഒഴിവുകള് തികയാതെ വരികയാണെങ്കില് സൂപ്പര് ന്യൂമറി തസ്തികകള് സൃഷ്ടിച്ച് നിയമനം നടത്തണം.
കഴിഞ്ഞ 2 വര്ഷങ്ങളിലെ പ്രളയത്തിനും കാലവര്ഷക്കെടുതികള്ക്കും ശേഷം ജില്ലയിലെ എല്ലാ വാര്ഡുകളില് നിന്നും മഴയുടെ തോതു ശേഖരിച്ച് പഞ്ചായത്ത് അടിസ്ഥാനത്തില് ക്രോഡീകരിച്ച് ദിവസവും റിപ്പോര്ട്ട് ചെയ്യുന്നത് ഈ ജീവനക്കാരാണ്. ശമ്പളമില്ലെങ്കിലും ജോലി ചെയ്യുന്ന ഇവരില് ചിലര് അവധി ദിവസങ്ങളില് കൂലിപ്പണിക്കുപോയാണ് കുടുംബച്ചെലവു നടത്തിയത്. ജീവനക്കാരെ സര്ക്കാരിന്റെ പുതിയ പദ്ധതികളില് നിയമിക്കാനാണ്് സര്ക്കാര് തീരുമാനമെങ്കിലും ധനവകുപ്പിന്റെ എതിര്പ്പിനെ തുടര്ന്നു നടക്കാതെ പോയി. ശമ്പളവും മുടങ്ങി.
പിഎസ്സിയുടെ ജില്ലാ നിയമനം ലഭിച്ചവരാണ് നിലവില് കബനി പ്രൊജക്ടില് ജോലി ചെയ്യുന്നവരില് ഭൂരിപക്ഷവും. ഇവരില് പട്ടിക വിഭാഗം, ആശ്രിത നിയമനം, ഭിന്നശേഷിക്കാര് തുടങ്ങിയ വിഭാഗത്തിലും ഉള്പെടുന്നവരുണ്ട്. ജില്ലയ്ക്ക് പുറത്തുള്ള പുനര്വിന്യാസത്തില് ആശങ്കാകുലരാണിവര്. ജില്ലയില് കേന്ദ്ര-സംസ്ഥാന സര്ക്കാരുകളുടെ മണ്ണുജല സംരക്ഷണ പ്രവൃത്തികള് കാര്യക്ഷമായി നടക്കുന്നുണ്ട്. ഈപദ്ധതികളില് നിയമനം ലഭിക്കണമെന്നാണ് ജീവനക്കാരുടെ താല്പര്യം.
https://www.facebook.com/Malayalivartha