ഇന്ധനച്ചെലവ് കുറച്ചും ലാഭകരമല്ലാത്ത സര്‍വീസുകള്‍ നിര്‍ത്തിയും വരുമാനം മെച്ചപ്പെടുത്താന്‍ കെ.എസ്.ആര്‍.ടി.സി.
പ്രതിസന്ധി രൂക്ഷമായ കെ.എസ്.ആര്‍.ടി.സിയില്‍ വരുമാന വര്‍ധനയ്ക്ക് കര്‍ക്കശ നിബന്ധനകള്‍ ഏര്‍പ്പെടുത്തി. ഇന്ധനച്ചെലവ്് കുറച്ചും ലാഭകരമല്ലാത്ത സര്‍വീസുകള്‍ നിര്‍ത്തിയും വരുമാനം മെച്ചപ്പെടുത്താനാണ് ലക്ഷ്യമിടുന്നത്. മുമ്പ് നല്‍കിയ നിര്‍ദേശങ്ങള്‍ യൂണിറ്റ് തലത്തില്‍ നടപ്പാക്കുകയോ സോണല്‍ ഓഫീസ് തലത്തില്‍ പരിശോധിച്ച് ക്രമീകരിക്കുന്നതോ ശ്രദ്ധയില്‍പെട്ടിട്ടില്ലെന്ന വിമര്‍ശനവുമായി മാനേജിങ് ഡയറക്ടര്‍ ബിജു പ്രഭാകര്‍ എട്ടിന നിര്‍ദേശങ്ങള്‍ പുറപ്പെടുവിച്ചു.
കോവിഡ് ഭീതിയില്‍ ദേശീയ, സംസ്ഥാന പാതകള്‍ ഒഴികെയുളള റൂട്ടുകളില്‍ യാത്രക്കാരുടെ എണ്ണം കുറവാണ്. എന്നാല്‍ ജോലിക്കും മറ്റുമായി ദിവസവും യാത്ര ചെയ്യുന്നവര്‍ക്ക് ബസുകളാണ് ആശ്രയം. ഇ.ടി.പി (ഏണിങ് പെര്‍ ട്രിപ്പ്) 25ന് താഴെ വരുന്ന പ്രതിദിന ട്രിപ്പുകള്‍ ക്രമീകരിച്ച് വരുമാനം വര്‍ധിപ്പിക്കുക എന്നതാണ് പ്രധാന നിര്‍ദേശം. ഇതു നടപ്പാക്കിയാല്‍ ഗ്രാമീണമേഖലകളിലേക്കുള്ള സര്‍വീസുകള്‍ വെട്ടിച്ചുരുക്കാനാണ് സാധ്യത.
ഓരോ ട്രിപ്പ് തുടങ്ങുമ്പോഴും അവസാനിപ്പിക്കുമ്പോഴും ഡ്രൈവര്‍ ലോഗ് ഷീറ്റിലെ നിര്‍ദിഷ്ട കോളങ്ങളില്‍ ഓഡോ മീറ്റര്‍ റീഡിങ്ങും ഓടിയ കിലോ മീറ്ററും രേഖപ്പെടുത്തണം. ഇത് ലോഗ് ഷീറ്റ് കൈപ്പററുന്ന ചാര്‍ജ്മാന്‍ പരിശോധിച്ച് ഉറപ്പു വരുത്തണം. കണ്ടക്ടര്‍ ഡ്യൂട്ടി തീരുന്ന സമയത്ത് ഓരോ ട്രിപ്പിന്റെയും കിലോമീറ്റര്‍, യാത്രക്കാരുടെ എണ്ണം, വരുമാനം, ട്രിപ്പിന്റെ സെസ്, ബസില്‍ നിറച്ച ഡീസല്‍ എന്നിവ രേഖപ്പെടുത്തണം.
ഈ വിവരങ്ങള്‍ ഡ്യൂട്ടി അവസാനിക്കുമ്പോള്‍ കണ്ടക്ടര്‍ വേബില്ലില്‍ എഴുതിയിട്ടുണ്ടെന്ന് സ്റ്റേഷന്‍ മാസ്റ്റര്‍ ഉറപ്പു വരുത്തണം. ഓരോ ട്രിപ്പിന്റെയും കളക്ഷന്‍ സോഫ്റ്റ്വെയറില്‍ എന്റര്‍ ചെയ്യണം. ഈ റിപ്പോര്‍ട്ട് പരിശോധിക്കുന്നതിന് യൂണിറ്റിലെ ഒരു ഇന്‍സ്പെക്ടറെ ചുമതലപ്പെടുത്തണം. തുടര്‍ന്ന് യൂണിറ്റ് ഓഫീസര്‍ ഇ.ടി.പി കുറഞ്ഞ ട്രിപ്പുകള്‍ കണ്ടെത്തി ലാഭകരമാക്കാനുള്ള നടപടികള്‍ സ്വീകരിക്കണം.
വിവരങ്ങള്‍ രേഖപ്പെടുത്തുന്നതില്‍ തെറ്റുവരുത്തുന്നവര്‍ക്കെതിരേ അച്ചടക്ക നടപടി എടുക്കുമെന്നും അറിയിച്ചിട്ടുണ്ട്. നഷ്ടം സംഭവിച്ചാല്‍ വീഴ്ച വരുത്തുന്ന മേഖലാ ഓഫീസര്‍മാര്‍, യൂണിറ്റ് ഓഫീസര്‍മാര്‍ ഉള്‍പ്പടെയുള്ളവരില്‍നിന്ന് ഈടാക്കുമെന്ന മുന്നറിയിപ്പുമുണ്ട്.
https://www.facebook.com/Malayalivartha
