2020 ഏപ്രിലില്‍ പൂര്‍ത്തിയാക്കുമെന്ന് പ്രഖ്യാപിച്ച് ദേശീയപാത എലത്തൂരില്‍ കോരപ്പുഴപ്പാലത്തിന്റെ പുനര്‍നിര്‍മാണ പ്രവൃത്തികള്‍ ഉദ്ഘാടനം ചെയ്തിട്ട് 665 ദിവസം പിന്നിടുന്നു. കഴിഞ്ഞ വര്‍ഷം പ്രളയവും ഈ വര്‍ഷം കോവിഡും സൃഷ്ടിച്ച വിടവിനു ശേഷം നിര്‍മാണ പ്രവൃത്തി തകൃതിയായി നടക്കുകയാണ്. 

പാലംപണി ഡിസംബറോടെ പൂര്‍ത്തിയാകുമെന്നാണ് ഇപ്പോള്‍ അധികൃതര്‍ പറയുന്നത്. പാലത്തിന്റെ 70% പണി പൂര്‍ത്തിയായതായി മന്ത്രിയും മണ്ഡലത്തിലെ എംഎല്‍എയുമായ എ.കെ.ശശീന്ദ്രന്‍ കഴിഞ്ഞദിവസം പറഞ്ഞിരുന്നു.

പാലത്തിന്റെ 7 സ്പാനുകളില്‍ വടക്കേയറ്റത്തുള്ള 2 സ്പാനുകളുടെ നിര്‍മാണം ബാക്കിയാണ്. ശേഷിക്കുന്ന 5 സ്പാനുകളുടെ വശങ്ങളിലുള്ള വലിയ ആര്‍ച്ചുകളില്‍ നാലെണ്ണത്തിന്റെ നിര്‍മാണമാണു പൂര്‍ത്തിയായത്. നിലവില്‍ 7 സെറ്റ് തൂണുകളുടെ നിര്‍മാണം പൂര്‍ത്തിയായി. ഇരുവശത്തും അപ്രോച്ച് റോഡുകളുടെ നിര്‍മാണവും പുരോഗമിക്കുന്നു. നിര്‍മാണ ചുമതല ഏറ്റെടുത്ത ഊരാളുങ്കല്‍ ലേബര്‍ കോണ്‍ട്രാക്ട് കോഓപ്പറേറ്റീവ് സൊസൈറ്റി പണി തുടങ്ങി രണ്ടുവര്‍ഷം തികയുന്ന ഡിസംബറിലെങ്കിലും നിര്‍മാണം പൂര്‍ത്തീകരിക്കാനുള്ള കഠിനശ്രമത്തിലാണ്്. 27.17 കോടി രൂപയ്ക്കാണ് പാലം പുനര്‍നിര്‍മാണം.

1937-ല്‍ കെ.കേളപ്പന്‍ മലബാര്‍ ഡിസ്ട്രിക്ട് ബോര്‍ഡ് പ്രസിഡന്റായി സ്ഥാനമേറ്റതോടെയാണ് കോരപ്പുഴ, മൂരാട് പുഴ എന്നിവയ്ക്ക് കുറുകെ പാലം പണിയാന്‍ തീരുമാനിച്ചത്. 1938-ല്‍ പാലം പണിക്ക് തുക അനുവദിച്ചെങ്കിലും അതു തികയില്ലെന്നു കണ്ട് കേളപ്പനും സംഘവും പിരിവിനിറങ്ങി. അന്നത്തെ മദിരാശിയിലെ കാനന്‍ ഡങ്കര്‍ലി ആന്‍ഡ് കമ്പനി ലിമിറ്റഡാണ് 1940-ഓടെ പാലംപണി പൂര്‍ത്തിയാക്കിയത്. പക്ഷേ പാലത്തിലെ ഒരു ഫലകത്തില്‍പ്പോലും തന്റെ പേരുവയ്ക്കാന്‍ കെ.കേളപ്പന്‍ സമ്മതിച്ചില്ല. അതുവഴി കടന്നുവന്ന ഒരു കാളവണ്ടി പാലത്തിലൂടെ കടത്തിവിട്ടാണ് കെ.കേളപ്പന്‍ പാലം ഉദ്ഘാടനം ചെയ്തത്. ഈ പാലമാണ് 2018 നവംബര്‍ പകുതിയോടെ പൊളിച്ചു നീക്കിയത്.