അറുപതുകാരനെ പെണ്കെണിയില് കുരുക്കിയ പിടികിട്ടാപ്പുള്ളി അറസ്റ്റില്
കോടതി പിടികിട്ടാപ്പുള്ളിയായി പ്രഖ്യാപിച്ചിരുന്ന പള്ളിക്കര ബിലാല് നഗര് നടുക്കണ്ടി വീട്ടില് അഹമ്മദ് കബീര് (ലാലാ കബീര് 34) പിടിയിലായി. 60 കാരനെ തട്ടിക്കൊണ്ടു പോയി സ്ത്രീകളോടൊപ്പം നിര്ത്തി ഫോട്ടോയെടുത്ത് പണം തട്ടിയെടുത്ത കേസില് പ്രതിയാണ്. ഡിവൈഎസ്പി പി.ബാലകൃഷ്ണന് നായരുടെ നേതൃത്വത്തിലുള്ള പ്രത്യേക സംഘമാണ് അറസ്റ്റ് ചെയ്തത്.
ഹണി ട്രാപ്പില്പ്പെടുത്തി പണം തട്ടിയെടുത്തുവെന്ന് പരാതിപ്പെട്ടത് ബാലനടുക്കം സ്വദേശിയാണ്. 2 സ്ത്രീകള് ഉള്പ്പെടെ 6 പേര്ക്കെതിരെ കഴിഞ്ഞ ദിവസം ബേഡഡുക്ക പൊലീസ് കേസെടുത്തിരുന്നു. ഇതിലെ പ്രധാന പ്രതിയെയാണ് പൊലീസ് അറസ്റ്റ് ചെയ്തത്. ഇന്നു കോടതിയില് ഹാജരാക്കും.
ഇക്കഴിഞ്ഞ സെപ്റ്റംബര് 23-ന് രാവിലെ സ്ഥലം വാങ്ങാനെന്ന വ്യാജേന പരാതിക്കാരന്റെ കരിംപങ്ങാനത്തെ വീട്ടില് രണ്ടു സ്ത്രീകളെത്തുകയായിരുന്നു. തുടര്ന്ന് പുറത്ത് കാറിലുണ്ടായിരുന്ന നാലു പേര് വീട്ടിലേക്ക് അതിക്രമിച്ചു കയറുകയും സ്ത്രീകളോടൊപ്പം നിര്ത്തി ഫോട്ടോയെടുക്കുകയും ചെയ്യുകയായിരുന്നു. ഇത് മറ്റുള്ളവരെ കാണിക്കുമെന്നും കൊല്ലുമെന്നും ഭീഷണിപ്പെടുത്തുകയും ചെയ്തു. തുടര്ന്ന് പലപ്പോഴായി 5.45 ലക്ഷം രൂപ അപഹരിക്കുകയും ചെയ്തുവെന്നാണ് പരാതി.
സ്ത്രീകള് ഉള്പ്പെടെയുള്ള 5 പേരെ കൂടി പിടികൂടാനുണ്ടെന്ന് സിഐ ടി.ഉത്തംദാസ് പറഞ്ഞു. കേരളം. കര്ണാടക. തമിഴ്നാട്. രാജസ്ഥാന് എന്നീ സംസ്ഥാനങ്ങളില് മോഷണം അടക്കം നിരവധി കേസുകളില് പ്രതിയായ ഇയാള് 13 വര്ഷത്തിന് ശേഷം ആണ് പൊലീസിന്റെ പിടിയിലാകുന്നത്.
കാസര്കോട് പൊലീസ് അടക്കം നിരവധി സ്റ്റേഷനുകളില്, കോടതി പിടികിട്ടാപ്പുള്ളിയായി പ്രഖ്യാപിച്ച ഇയാള്ക്ക്് വാറന്റ് ഉണ്ടെന്ന് പൊലീസ് പറഞ്ഞു. എസ്ഐമാരായ കെ.മുരളീധരന്, എം.ഗംഗാധരന് ക്രൈം സ്ക്വാഡ് അംഗങ്ങളായ ലക്ഷ്മി നാരായണന്, തോമസ്, ഓസ്റ്റിന് തമ്പി, സജീഷ് എന്നിവരും സംഘത്തിലുണ്ടായിരുന്നു.
https://www.facebook.com/Malayalivartha