പ്രായപൂര്ത്തി എത്തുന്നതിന് മുമ്പ് പലതവണ പീഡിപ്പിച്ചെന്ന കേസില് 11 ദിവസത്തിനകം കുറ്റപത്രം തയാറാക്കി ഒറ്റപ്പാലം പൊലീസ് ചരിത്രം കുറിച്ചു
അമ്പലപ്പാറ സ്വദേശിനിയെ 18 വയസ്സ് തികയുന്നതിന് മുന്പ് പലതവണ പീഡിപ്പിച്ചെന്ന കേസില് യുവാവിനെതിരെ 11 ദിവസത്തിനകം കുറ്റപത്രം തയാറാക്കി ഒറ്റപ്പാലം പൊലീസ് ചരിത്രം കുറിച്ചു. പോക്സോ കേസുകളില് കുറ്റപത്രം സമര്പ്പിക്കാനുള്ള സമയപരിധി 60 ദിവസമാണ്. ഒറ്റപ്പാലത്തു കഴിഞ്ഞ 12നു റജിസ്റ്റര് ചെയ്ത കേസില് 20നു കരടു കുറ്റപത്രം തയാറാക്കി ജില്ലാ പൊലീസ് മേധാവി മുഖേന ഡിഐജിയുടെ അംഗീകാരത്തിനു വിട്ടു.
ഇന്നലെ ഓണ്ലൈന് വഴി, അംഗീകരിക്കപ്പെട്ട കുറ്റപത്രം സമര്പ്പിച്ചതായി സര്ക്കിള് ഇന്സ്പെക്ടര് എം. സുജിത്ത് അറിയിച്ചു. അവധി ദിവസങ്ങള് കഴിഞ്ഞ് 27-ന് പോക്സോ കോടതിക്ക് കുറ്റപത്രം നേരിട്ടു സമര്പ്പിക്കും. കേരളത്തില് ഏറ്റവും ചുരുങ്ങിയ സമയം കൊണ്ടു കുറ്റപത്രം തയാറായ ആദ്യ പോക്സോ കേസായിരിക്കും ഇതെന്ന് ഷൊര്ണൂര് ഡിവൈഎസ്പി എന്. മുരളീധരന് പറഞ്ഞു.
യുവാവ് , ഇരുപതുകാരിയായ യുവതിക്ക് വന്ന വിവാഹാലോചന മുടക്കിയതോടെയാണ് 2 വര്ഷം മുമ്പ് നടന്ന പീഡനം രക്ഷിതാക്കള് അറിഞ്ഞതും കേസായതും. അറസ്റ്റിലായ ചെറുമുണ്ടശ്ശേരി ഉപ്പാമൂച്ചിക്കല് സനിത്ത് (30) റിമാന്ഡിലാണ്. സിഐ എം. സുജിത്ത്, സീനിയര് സിപിഒമാരായ എന്. രജിത, കെ.വി. ഉദയകുമാര് തുടങ്ങിയവര് ഉള്പ്പെട്ടതാണ് അന്വേഷണ സംഘം. മറ്റൊരു പോക്സോ കേസില് പാലക്കാട് ജില്ലയിലെ നാട്ടുകല് പൊലീസ് 13 ദിവസത്തിനുള്ളില് കുറ്റപത്രം സമര്പ്പിച്ചിരുന്നു.
https://www.facebook.com/Malayalivartha