സ്വപ്നയുമായുള്ള ബന്ധത്തിന്റെ പേരിലാണ് സര്‍ക്കാര്‍ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കര്‍ പെട്ടുപോയതെന്നാണ് പൊതു ജനം കരുതിയത്. എന്നാല്‍ അതിലപ്പുറം ശിവശങ്കറിന് വലിയ ബന്ധമുണ്ടെന്നാണ് അന്വേഷണ സംഘം പറയുന്നത്. ശിവശങ്കര്‍ നടത്തിയ പല രഹസ്യ ഇടപാടുകളും എന്‍ഫോഴ്‌സ്‌മെന്റ് പുറത്ത് കൊണ്ടുവരികയാണ്. അതിലേറ്റവും പ്രധാനമായിരുന്നു സ്വപ്നയുടെ അക്കൗണ്ടില്‍ നിന്നും ലഭിച്ച ഒരു കോടി രൂപയും ഒരു കിലോ സ്വര്‍ണവും. തനിക്കൊന്നുമറിയില്ലെന്ന് പറഞ്ഞ് കൈമലര്‍ത്തിയ ശിവശങ്കറിനെ അക്ഷരാര്‍ത്ഥത്തില്‍ ഇഡി പൂട്ടുകയായിരുന്നു.

സ്വര്‍ണക്കടത്തു കേസില്‍ സ്വപ്ന സുരേഷ് അറസ്റ്റിലായ ദിവസങ്ങളില്‍ ശിവശങ്കര്‍, ചാര്‍ട്ടേഡ് അക്കൗണ്ടന്റ് പി. വേണുഗോപാലിനോടു സംസ്ഥാനത്തിനു പുറത്തേക്കു മാറിനില്‍ക്കാന്‍ നിര്‍ദേശിച്ച സന്ദേശം അന്വേഷണ സംഘത്തിനു ലഭിച്ചിരിക്കുകയാണ്. എന്‍ഫോഴ്‌സ്‌മെന്റ് ഡയറക്ടറേറ്റിനു ലഭിച്ച ഡിജിറ്റല്‍ രേഖകളിലാണ് ഇക്കാര്യമുള്ളത്. മാധ്യമപ്രവര്‍ത്തകരില്‍നിന്ന് അകന്നുനില്‍ക്കാനും കഴിയുമെങ്കില്‍ നാഗര്‍കോവിലിലേക്കു പോകാനുമായിരുന്നു ഉപദേശം.

സ്വപ്നയുടെയും വേണുഗോപാലിന്റെയും സംയുക്ത അക്കൗണ്ടില്‍ ബാങ്ക് ലോക്കര്‍ ഉള്ളതായി അതിനകം തന്നെ അന്വേഷണ സംഘങ്ങള്‍ക്കു വിവരം ലഭിച്ചിരുന്നു. എന്‍ഐഎ ഒരു കോടി രൂപ ഇതില്‍നിന്നു പിടിച്ചെടുക്കുകയും ചെയ്തു.

സ്വപ്ന പിടിക്കപ്പെട്ട ഉടന്‍ അന്വേഷണം ലോക്കറിലേക്കെത്തുമെന്നു ശിവശങ്കര്‍ മനസ്സിലാക്കിയെന്നാണ് അന്വേഷണ സംഘങ്ങളുടെ വിലയിരുത്തല്‍. ശിവശങ്കറും വേണുഗോപാലുമായി 2018 നവംബര്‍ മുതലുള്ള വാട്‌സാപ് സന്ദേശങ്ങള്‍ പരിശോധിക്കുന്നുണ്ട്.

അതേസമയം മാനദണ്ഡങ്ങള്‍ മറികടന്നു ഡോളര്‍ കൈമാറ്റം ചെയ്‌തെന്ന് ആരോപണം നേരിടുന്ന കരമന ആക്‌സിസ് ബാങ്ക് മാനേജര്‍ ശേഷാദ്രി അയ്യരെ സസ്‌പെന്‍ഡ് ചെയ്തു. യുഎഇ കോണ്‍സുലേറ്റിനും സ്വപ്ന സുരേഷിനും അക്കൗണ്ടുള്ള ബാങ്കാണിത്. സ്വപ്ന വിദേശനാണ്യ വിനിമയച്ചട്ടം ലംഘിച്ച് വിദേശത്തേക്കു ഡോളര്‍ കടത്തിയതു കണ്ടെത്തിയിരുന്നു. രൂപ ഡോളറാക്കി മാറ്റിനല്‍കിയത് ഈ ബാങ്കില്‍ നിന്നാണെന്നാണ് അന്വേഷണ സംഘത്തിനു ലഭിച്ച വിവരം. ശേഷാദ്രി അയ്യരെ എന്‍ഫോഴ്‌സ്‌മെന്റ് ഡയറക്ടറേറ്റും കസ്റ്റംസും ചോദ്യം ചെയ്തിരുന്നു.

അതേസമയം കെട്ടുകഥകളാണ് ഇഡി കോടതിയില്‍ പറഞ്ഞതെന്നാണ് ശിവശങ്കര്‍ വാദിച്ചത്. സ്വപ്നയുടെ പണം കൈകാര്യം ചെയ്യാന്‍ ചാര്‍ട്ടേഡ് അക്കൗണ്ടന്റിന് വാട്‌സാപ് സന്ദേശങ്ങള്‍ അയച്ചെന്നു പറയുന്ന ഇഡി, സംഭവങ്ങള്‍ തെറ്റിദ്ധരിപ്പിക്കും വിധം വളച്ചൊടിക്കുകയാണെന്നും വാദിച്ചു. 2018 ല്‍ നടന്നതൊക്കെ ഓര്‍മിക്കാന്‍ ശിവശങ്കര്‍ കംപ്യൂട്ടറല്ല. 2018 ല്‍ ലോക്കറില്‍ 30 ലക്ഷം രൂപ നിക്ഷേപിച്ചിരുന്നതിനെക്കുറിച്ചാണു വാട്‌സാപ് സന്ദേശങ്ങളില്‍ പറയുന്നത്. അതു മൂന്നോ നാലോ മാസത്തിനുള്ളില്‍ പിന്‍വലിക്കുകയും തുടര്‍ന്ന് ചാര്‍ട്ടേഡ് അക്കൗണ്ടന്റിന്റെ പക്കല്‍നിന്ന് ലോക്കറിന്റെ കീ സ്വപന വാങ്ങുകയും ചെയ്തു. ലോക്കര്‍ ഇപ്പോഴുണ്ടോയെന്നു കോടതി ചോദിച്ചപ്പോള്‍, ഉണ്ടെന്നും എന്നാല്‍ ചാര്‍ട്ടേഡ് അക്കൗണ്ടന്റിന് പിന്നീട് നടന്നത് അറിയില്ലെന്നാണ് അഭിഭാഷകന്‍ അറിയിച്ചത്.

അതേസമയം സ്വര്‍ണക്കടത്തുകേസില്‍ ശിവശങ്കറിനെതിരായ നിര്‍ണായക തെളിവുകളാണ് രഹസ്യ രേഖയായി കോടതിക്ക് കൈമാറിയത്. വാട്‌സാപ് സന്ദേശങ്ങളെക്കുറിച്ചുള്ള വിവരങ്ങള്‍ അതിലുണ്ടെന്നും ഇഡിക്കുവേണ്ടി ഹാജരായ അഡീഷനല്‍ സോളിസിറ്റര്‍ ജനറല്‍ വ്യക്തമാക്കിയത്.
സ്വപ്നയുമായി വളരെ അടുത്ത ബന്ധമുണ്ടെന്നാണു സന്ദേശങ്ങളില്‍നിന്നു വ്യക്തമാകുന്നത്. ശിവശങ്കറിന്റെ പദവിയും സ്വാധീനവും പരിഗണിക്കുമ്പോള്‍ തെളിവു നശിപ്പിക്കുമെന്ന ആശങ്കയുണ്ട്. അതിനാല്‍ ജാമ്യം നല്‍കരുതെന്നാണ് ഇഡി വാദിച്ചത്. എന്തായാലും ഇതെല്ലാം തന്നെ ശിവശങ്കറിനെതിരായ ഒന്നൊന്നര തെളിവായി മാറുകയാണ്.