ഗ്രേഡ് സബ് ഇന്സ്പെക്ടര് കാല്ലക്ഷം രൂപ കൈക്കൂലി വാങ്ങുന്നതിനിടെ വിജിലന്സ് പിടിയില്
സ്ത്രീധന പീഡനക്കേസില് പ്രതിക്ക് അനുകൂലമായി കോടതിയില് മൊഴി നല്കാനെന്ന പേരില് കാല്ലക്ഷം രൂപ കൈക്കൂലി വാങ്ങവേ ശക്തികുളങ്ങര പൊലീസ് സ്റ്റേഷനിലെ ഗ്രേഡ് സബ് ഇന്സ്പെക്ടര് അബ്ദുല് സലീം വിജിലന്സ് പിടിയിലായി.
അബ്ദുല് സലീം ചവറ പൊലീസ് സ്റ്റേഷനിലുണ്ടായിരുന്നപ്പോള് വര്ക്കല സ്വദേശി ഫൈസല് പ്രതിയായ സ്ത്രീധന പീഡനക്കേസ് റജിസ്റ്റര് ചെയ്ത് അന്വേഷണം നടത്തി കൊല്ലം കോടതിയില് കുറ്റപത്രം സമര്പ്പിച്ചിരുന്നു. 5 വര്ഷം മുമ്പ് രജിസ്റ്റര് ചെയ്ത്് വിചാരണയിലിരിക്കുന്ന പ്രസ്തുത കേസില് മൊഴി നല്കാന് കഴിഞ്ഞയാഴ്ച സലീമിന് കോടതിയില് നിന്നും സമന്സ് വന്നിരുന്നു. തുടര്ന്ന് സലീം ഫൈസലിനെ ഫോണില് ബന്ധപ്പെട്ട സലീം അനുകൂല മൊഴി നല്കാന് 25,000 രൂപ ആവശ്യപ്പെട്ടതായാണ് പരാതി.
ഇക്കാര്യം ഫൈസല് കൊല്ലം വിജിലന്സ് ഡിവൈഎസ്പി: കെ.അശോക് കുമാറിനെ അറിയിച്ചു. തുടര്ന്ന് സലീമിന്റെ ബന്ധുവിന്റെ കരുനാഗപ്പള്ളി ആലുംകടവിലുള്ള ജ്വല്ലറിയില് വച്ച് 25,000 രൂപ കൈക്കൂലി വാങ്ങുന്നതിനിടെ അറസ്റ്റ് ചെയ്യുകയായിരുന്നു. കേസ് റജിസ്റ്റര് ചെയ്ത സമയത്ത് ഫൈസലില് നിന്ന് സലീം രണ്ടു ലക്ഷം രൂപ വാങ്ങിയിരുന്നതായും വിവരം ലഭിച്ചു. സലീമിനെ തിരുവനന്തപുരം വിജിലന്സ് കോടതിയില് ഹാജരാക്കും.
കൂടാതെ, മദ്യപിച്ച് വാഹനം ഓടിച്ച് അപകടം ഉണ്ടാക്കിയതിന് തിരുവമ്പാടി സ്റ്റേഷന് ഇന്സ്പെക്ടര് ഷാജു ജോസഫിനെ് നോര്ത്ത് സോണ് ഐജി അശോക് യാദവ് സസ്പെന്ഡ് ചെയ്തു. വയനാട് നടവയല് സ്വദേശിയായ ഷാജു ജോസഫ് സഞ്ചരിച്ചിരുന്ന കാര് വെള്ളിയാഴ്ച ഉച്ചയ്ക്ക് കേണിച്ചിറയില് വച്ച് ബൈക്ക് യാത്രക്കാരെ ഇടിച്ചിരുന്നു. മദ്യപിച്ചിരുന്നതായി സംശയം തോന്നിയതിനെ തുടര്ന്നു നാട്ടുകാര് തടഞ്ഞുവയ്ക്കുകയും പിന്നീട് പൊലീസെത്തി കൊണ്ടുപോവുകയുമായിരുന്നു.
https://www.facebook.com/Malayalivartha
