വിവാദ ഉത്തരവുമായി റവന്യു വകുപ്പ്; രേഖകള് ഇല്ലെങ്കിലും കൈവശക്കാരനു പട്ടയം നല്കാം
ഭൂമി പതിച്ചു നല്കിയ ചില കേസുകളില് ഓഫിസുകളില് നിന്നു ഫയല് കണ്ടെത്താന് സാധിക്കാത്തതിനാലും രേഖകള് ജീര്ണിച്ചു പോയതിനാലും പട്ടയപ്പകര്പ്പു നല്കാനും റീസര്വേ വഴി നിജസ്ഥിതി പരിശോധിക്കാനും പ്രയാസപ്പെടുന്നതായി ലാന്ഡ് റവന്യു കമ്മിഷണര് മേയ് 12-ന്് കത്ത് നല്കിയിരുന്നു.
ഇതിന്റെ അടിസ്ഥാനത്തില്, പട്ടയം ലഭിച്ചതായി അവകാശപ്പെടുന്ന ഭൂമിയില് അതിന്റെ രേഖകള് ഇല്ലെങ്കിലും കൈവശക്കാരനു പട്ടയം നല്കാന് റവന്യു സെക്രട്ടറി 16-ന് ഇറക്കിയ ഉത്തരവ് വിവാദമാകുന്നു. ഭൂമിപതിവ് ചട്ടപ്രകാരം ഇടുക്കി പോലുള്ള ജില്ലകളില് സര്ക്കാര് ഭൂമി കൈവശപ്പെടുത്താന് ഈ ഉത്തരവ് അവസരം നല്കുമെന്നാണ് ആക്ഷേപം.
റവന്യു സെക്രട്ടറി 16-ന് ഇറക്കിയ ഉത്തരവ്, ഇത്തരം കേസുകളില് 3 സാഹചര്യങ്ങളിലായി മാര്ഗനിര്ദേശം പാലിച്ചു പട്ടയം അനുവദിക്കാനായി നിജസ്ഥിതി സര്ട്ടിഫിക്കറ്റ് നല്കാന് കലക്ടര്മാരെ ചുമതലപ്പെടുത്തുന്നു. അതില് മൂന്നാമത്തെ സാഹചര്യമാണ് ദുരുപയോഗത്തിന് അവസരം നല്കുന്നത്.
പട്ടയ ഫയല് നഷ്ടപ്പെട്ടതായി പറയുന്ന ഭൂമി സംബന്ധിച്ചതാണ് ഈ നിര്ദേശം. പട്ടയം കിട്ടിയതു തെളിയിക്കാന് രേഖകളൊന്നും ലഭ്യമല്ലാത്ത ഇത്തരം കേസുകളില് ഇതു സര്ക്കാര് ഭൂമി ആണെങ്കില് നിലവിലെ കൈവശക്കാരന്റെ അര്ഹത പരിശോധിച്ചു ഭൂമി പതിവു ചട്ടപ്രകാരം പുതിയ പട്ടയം നല്കാമെന്നാണു നിര്ദേശം.
വ്യാജപട്ടയങ്ങള് സാധൂകരിക്കാനും കൈവശക്കാരെ വഴിവിട്ടു സഹായിക്കാനും ഉദ്യോഗസ്ഥര്ക്ക് ഇതുവഴി അവസരമുണ്ടാകുമെന്നാണ് ആക്ഷേപം.
https://www.facebook.com/Malayalivartha
