കിടപ്പുമുറിയിലും മറ്റും പരാക്രമം കാട്ടിയ കാട്ടുപന്നികളെ വനപാലകരുടെ സാന്നിദ്ധ്യത്തില്‍ വെടിവച്ചുകൊന്നു. വ്യാജവാറ്റ് മോന്തി ലഹരിയിലായ രണ്ടു കാട്ടുപന്നികള്‍ വീടിനകത്തേക്ക് പാഞ്ഞുകയറിയതോടെ പരിഭ്രാന്തിയിലായ വീട്ടുകാര്‍ പുറത്തേക്ക് ഓടി വീട് പൂട്ടി. കിടപ്പുമുറിയിലും മറ്റും പരാക്രമം കാട്ടിയ കാട്ടുപന്നികളെ വനപാലകരുടെ സാന്നിദ്ധ്യത്തില്‍ വെടിവച്ചുകൊന്നു.

ഇന്നലെ രാവിലെ ഏഴു മണിയോടെ കൂരാച്ചുണ്ട് പൂവത്തുംചോലമലയില്‍ കെ.എസ്.ഇ.ബി ജീവനക്കാരന്‍ മോഹനന്റെ വീട്ടിലേക്കാണ് ഇവ പാഞ്ഞു കയറിയത്. വീട്ടമ്മയും കുട്ടികളും അടക്കം പുറത്തേക്ക് ഓടി രക്ഷപ്പെട്ടു. വിവരമറിഞ്ഞ് പരിസരവാസികള്‍ തടിച്ചുകൂടി. പെരുവണ്ണാമൂഴി റേഞ്ച് ഓഫീസര്‍ അഖില്‍ നാരായണന്റെ നേതൃത്വത്തില്‍ വനപാലകരും കൂരാച്ചുണ്ട് പൊലീസും എത്തി.

മത്തുപിടിച്ച പന്നികള്‍ ഫര്‍ണിച്ചറടക്കം നശിപ്പിക്കാന്‍ തുടങ്ങിയിരുന്നു.അക്രമം കാട്ടുന്ന പന്നികളെ കൊല്ലാന്‍ നിയമമുണ്ടായിട്ടും അധികൃതര്‍ ഡി. എഫ്.ഒയുടെ അനുമതി വരട്ടെ എന്നറിയിച്ചതോടെ ജനങ്ങള്‍ പ്രതിഷേധമുയര്‍ത്തി. കോഴിക്കോട് ഡി.എഫ്.ഒയുടെ അനുമതി വന്നത് പതിനൊന്നര മണിയോടെയാണ്. തുടര്‍ന്ന് ലൈസന്‍സ് തോക്കുള്ള കൂട്ടാലിട സ്വദേശികളായ രഘുനാഥ്, ഗംഗാധരന്‍ എന്നിവര്‍ ജനലിലൂടെ നിറയൊഴിച്ചു. വില്ലേജ് ഓഫീസര്‍, പഞ്ചായത്ത് പ്രസിഡന്റ്, വെറ്ററിനറി സര്‍ജന്‍ എന്നിവരുടെ സാന്നിദ്ധ്യത്തില്‍ നടപടികള്‍ പൂര്‍ത്തിയാക്കി വനം വകുപ്പ് ഉദ്യോഗസ്ഥരുടെ നേതൃത്വത്തിലാണ് ജഡം സംസ്‌കരിച്ചത്.