സപ്ലൈകോയുടെ സൗജന്യ കിറ്റ് വിതരണം വൈകിയേക്കും, നാഫെഡ് നല്കിയ ചെറുപയറിന്റെ അളവ് കുറവ്
സപ്ലൈകോ കോവിഡ് പശ്പാത്തലത്തില് വിതരണം ചെയ്യുന്ന സൗജന്യ പ്രതിമാസക്കിറ്റിലേക്ക് നാഫെഡ് (നാഷണല് അഗ്രികള്ച്ചറല് കോര്പറേറ്റീവ് മാര്ക്കറ്റിങ് ഫെഡറേഷന് ഓഫ് ഇന്ത്യ) നല്കിയ ചെറുപയറിന്റെ അളവിലും കുറവ്. നേരത്തേ, സപ്ലൈകോയുടെ ഓണക്കിറ്റിലെ ശര്ക്കരയുടെ അളവില് കരാറുകാര് വന്വെട്ടിപ്പ് നടത്തിയിരുന്നു.
നാഫെഡ് നല്കിയ ചെറുപയറിന്റെ ആകെത്തൂക്കത്തില് കുറവില്ലെങ്കിലും പായ്ക്കറ്റുകളിലെ അളവുവ്യത്യാസമാണ് ഡിപ്പോ മാനേജര്മാരുടെ ശ്രദ്ധയില്പ്പെട്ടത്. ഉപഭോക്താക്കള്ക്ക് നല്കേണ്ടത് 750 ഗ്രാം ചെറുപയറാണ്. എന്നാല് മിക്ക ഡിപ്പോയിലും കിട്ടിയ പായ്ക്കറ്റുകളില് അരക്കിലോയില് താഴെ മാത്രമാണുള്ളത്. ചില പായ്ക്കറ്റുകളില് 600 ഗ്രാം. ഇക്കാര്യം ശ്രദ്ധയില്പ്പെട്ടതോടെ അളവുവ്യത്യാസമുള്ളവ വീണ്ടും പായ്ക്ക് ചെയ്യാനാണു ഡിപ്പോ മാനേജര്മാര്ക്കു ലഭിച്ച നിര്ദേശം.
ചെറുപയര് പായ്ക്കറ്റിന്റെ തൂക്കം കൃത്യമാക്കാന് അധികച്ചെലവിനു പുറമേ കൂടുതല് ജീവനക്കാരെയും കണ്ടെത്തേണ്ട ഗതികേടിലായി സപ്ലൈകോ.
വല്ലാര്പാടം ടെര്മിനലിലൂടെ കണ്ടെയ്നറിലെത്തുന്ന ചെറുപയര് ഡിപ്പോ അധികൃതര്ക്ക് കൈമാറുകയാണു ചെയ്യുന്നത്. സാധാരണയായി 50 കിലോ ചാക്കുകളാണു കിട്ടിയിരുന്നതെങ്കിലും ഇക്കുറി ചെറുപായ്ക്കറ്റുകളായാണു ലഭിച്ചത്. അളവ് കൃത്യമാക്കി നല്കേണ്ടതിനാല് കിറ്റ് കൃത്യസമയത്തു കൊടുക്കാനാകുമോയെന്ന് സംശയമുയര്ന്നിട്ടുണ്ട്.
https://www.facebook.com/Malayalivartha
