സ്വര്‍ണക്കടത്ത് അന്വേഷണം ഇഡി ഏറ്റെടുത്ത വേളയില്‍ ചില മന്ത്രി പുത്രന്‍മാര്‍ കളം നിറഞ്ഞിരുന്നു. എന്നാല്‍ വളരെപ്പെട്ടന്ന് മറ്റ് പല വിഷയങ്ങളിലേക്കും പോയി. അതോടെ മന്ത്രി പുത്രന്‍മാരെ എല്ലാവരും മറന്നു. എന്നാല്‍ മറ്റൊരു പുത്രനായ ബിനീഷ് കോടിയേരി അകത്താകുകയും ചെയ്തു. ഇതും മന്ത്രി പുത്രന്‍മാര്‍ തമ്മിലുള്ള പടലപ്പിണക്കത്തിന്റെ അനന്തരഫലമാണെന്നും പലരും പറയുന്നുണ്ട്. എന്നാല്‍ സ്വപ്നയുടെ ശബ്ദം പുറത്ത് വന്നതോടെ പലതിലേക്കും സൂചനകള്‍ പോകുകയാണ്.

സംസ്ഥാനത്തെ പ്രമുഖനായ മന്ത്രിയുടെയും ചില നേതാക്കളുടേയും അവരുടെ ബന്ധുക്കളുടെയും സ്വത്തുവിവരങ്ങളെപ്പറ്റി എന്‍ഫോഴ്‌സ്‌മെന്റ് ഡയറക്ടറേറ്റ് അന്വേഷണമാരംഭിച്ചു. സ്വര്‍ണക്കടത്തു കേസുകളില്‍ അറസ്റ്റിലായ സ്വപ്ന സുരേഷിന്റെയും മറ്റു പ്രതികളുടെയും മൊഴികളുടെ അടിസ്ഥാനത്തിലാണ് നീക്കം. മന്ത്രിയുടെ മകന്റെ സമ്പാദ്യങ്ങളും ഇഡി. അന്വേഷിക്കുന്നുണ്ട്.

സി.പി.എം. സംസ്ഥാന സെക്രട്ടറിയായിരുന്ന കോടിയേരിയുടെ മക്കളുടെയും ബന്ധുക്കളുടെയും സ്വത്തുക്കള്‍ സംബന്ധിച്ച് ഇ.ഡി. നേരത്തേ തന്നെ അന്വേഷണം തുടങ്ങിയിട്ടുണ്ട്. ഒരു മന്ത്രിയുടെ മകന് കോടിയേരിയുടെ മക്കളായ ബിനീഷും ബിനോയിയും തമ്മില്‍ ബിസിനസ് ബന്ധങ്ങള്‍ ഉള്ളതായും ഇ.ഡി കണ്ടെത്തിയിട്ടുണ്ട്. ഇതാണ് ഈ മന്ത്രി പുത്രനിലേക്ക് അന്വേഷണമെത്താന്‍ കാരണമായത്.

മന്ത്രിപുത്രന് ബിനീഷ് കോടിയേരിയുടെ ദുബായ് ഹോട്ടല്‍ ബിസിനസില്‍ പങ്കാളിത്തമുണ്ടെന്നാണ് സൂചന. കേരളത്തില്‍ മൂന്നാറിലും വയനാട്ടിലും തോട്ടങ്ങള്‍ ഉള്ളതായി പ്രാഥമിക അന്വേഷണത്തില്‍ കണ്ടെത്തിയിട്ടുണ്ട്. കര്‍ണാടകയിലെ ചില സ്ഥലങ്ങളിലും ഭൂമി വാങ്ങിയിട്ടുണ്ട്. പല വസ്തുക്കച്ചവടങ്ങളില്‍ ഇടനിലക്കാരനായി മന്ത്രിപുത്രനും ഉണ്ടായിരുന്നു. ഇടനിലനിന്നും തര്‍ക്കങ്ങളില്‍ മധ്യസ്ഥത നടത്തി വന്‍ സമ്പാദ്യമുണ്ടാക്കിയെന്നുമാണ് ഇ.ഡിയുടെ കണ്ടെത്തല്‍.

മലയാള സിനിമയിലെ പ്രമുഖ നടന്റെ ദുബായിലെ ബിസിനസില്‍ കോടിയേരിയുടെ മക്കളും മന്ത്രിപുത്രനും പങ്കാളികളായിരുന്നു. പാര്‍ട്ണര്‍ഷിപ്പ് വേര്‍പെടുത്തിയപ്പോള്‍ കോടിയേരിയുടെ മക്കളും മന്ത്രിപുത്രനും വച്ച ആവശ്യങ്ങള്‍ നടന്‍ നിരസിച്ചു. ഇതോടെ ഇവര്‍ ശത്രുതയിലായി.

കഴിഞ്ഞവര്‍ഷം നടത്തിയ ചൈന യാത്രയും അന്വേഷിക്കുന്നു. ചൈനീസ് ഉല്‍പന്ന നിര്‍മാതാക്കളുമായി ഇവര്‍ ചര്‍ച്ചകള്‍ നടത്തിയിരുന്നു. ചൈനയില്‍ നിക്ഷേപം നടത്തിയിട്ടുണ്ടോയെന്നും ഇ.ഡി പരിശോധിക്കുന്നുണ്ട്.

സ്വപ്നയുടെ ശബ്ദത്തിന് പിന്നാലെ മഹാരാഷ്ട്രയിലെ ഭൂമിയും ചര്‍ച്ചയാകുന്നുണ്ട്. പ്രതിപക്ഷ നേതാവ് രമേഷ് ചെന്നിത്തലയും കെപിസിസി പ്രസിഡന്റ് മുല്ലപ്പള്ളി രാമചന്ദ്രനും ഇതില്‍ ആക്ഷേപം ഉന്നയിച്ചിട്ടുണ്ട്. മഹാരാഷ്ട്ര സിന്ധുദുര്‍ഗില്‍ 200 ഏക്കര്‍ ഭൂമി ബെനാമി പേരിലുള്ള കേരളത്തിലെ രണ്ടു മന്ത്രിമാരെക്കുറിച്ച് അന്വേഷിക്കാനുള്ള തന്റേടം മുഖ്യമന്ത്രിക്കുണ്ടോ എന്നാണ് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ ചോദിച്ചത്.

അഴിമതിയുടെ ശരശയ്യയില്‍ കിടക്കുന്ന മുഖ്യമന്ത്രിക്കു സമനില തെറ്റിയതു കൊണ്ടാണു യുഡിഎഫ് നേതാക്കള്‍ക്കെതിരെ വൈരനിര്യാതന ബുദ്ധിയോടെ കേസ് എടുക്കുന്നത്. ഏതു നിമിഷവും ജയിലില്‍ പോകേണ്ടി വരുമെന്ന മുഖ്യമന്ത്രിയുടെ തിരിച്ചറിവാണു പ്രതികാര ബുദ്ധിക്കു കാരണം. കോണ്‍ഗ്രസിനെയും പ്രതിപക്ഷത്തെയും നിശ്ശബ്ദമാക്കാം എന്നു കരുതിയെങ്കില്‍ മുഖ്യമന്ത്രിക്കു തെറ്റി എന്നാണ് മുല്ലപ്പള്ളി പറയുന്നത്.

എന്തായാലും സ്വപ്നയുടെ ഓഡിയോ നാട്ടില്‍ വലിയ ഓളമാണ് ഉണ്ടാക്കിയിരിക്കുന്നത്. സ്വപ്നയുടെ ഓഡിയോയില്‍ ക്രൈംബ്രാഞ്ചും അന്വേഷണം തുടങ്ങി. അത് ബോധപൂര്‍വം ഉണ്ടാക്കിയതാണെങ്കില്‍ മറ്റൊരു വിവാദത്തിനായിരിക്കും തുടക്കമിടുക