ശബരിമലയില്‍ കൂടുതല്‍ ഭക്തരെ അനുവദിക്കുന്ന കാര്യം പരിഗണിക്കുമെന്ന് മന്ത്രി കടകംപളളി സുരേന്ദ്രന്‍ വ്യക്തമാക്കി. കൊവിഡ് മാനദണ്ഡങ്ങള്‍ ശക്തമായി പാലിക്കുന്നതിനാല്‍ നിലവില്‍ ഒരുദിവസം ആയിരം ഭക്തര്‍ക്ക് മാത്രമാണ് ശബരിമലയില്‍ ദര്‍ശനത്തിന് അനുമതിയുളളത്. വാരാന്ത്യങ്ങളില്‍ രണ്ടായിരം ഭക്തര്‍ക്ക് ദര്‍ശനത്തിന് അനുമതിയുണ്ട്. ഇത് 5000 ആയി ഉയര്‍ത്തുന്നത് പരിഗണിക്കുമെന്നാണ് മന്ത്രി പറയുന്നത്.പലപ്പോഴും ബുക്കുചെയ്തവര്‍ പോലും ദര്‍ശനത്തിന് എത്തുന്നില്ല.

പ്രതിദിനം മൂന്നരക്കോടിരൂപയിലധികം ഉണ്ടായിരുന്ന വരുമാനം നിലവില്‍ 10 ലക്ഷം രൂപയില്‍ താഴെയാണ്. ഇതോടെ ദേവസ്വം ബോര്‍ഡും വന്‍ പ്രതിസന്ധിയിലായി. ഇതിനെത്തുടര്‍ന്നാണ് തീര്‍ത്ഥാടകരുടെ എണ്ണം കൂട്ടണമെന്ന് ദേവസ്വംബോര്‍ഡ് സര്‍ക്കാരിനോട് ആവശ്യപ്പെട്ടത്. മുഖ്യമന്ത്രിയുമായും ആരോഗ്യമന്ത്രിയുമായും ചര്‍ച്ച നടത്തിയശേഷമായിരിക്കും തീര്‍ത്ഥാടകരുടെ എണ്ണം ഉയര്‍ത്തുന്നകാര്യത്തില്‍ അന്തിമ തീരുമാനം എടുക്കുക.

മണ്ഡലകാല ഉത്സവത്തിന് തുടക്കമായതിനു ശേഷം ഇന്നലെയാണ് ആദ്യമായി 2000 തീര്‍ത്ഥാടകര്‍ ശബരിമലയില്‍ ദര്‍ശനം നടത്തിയത്. എന്നാല്‍ സന്നിധാനത്ത് കാര്യമായ തിരക്കുകളൊന്നും അനുഭവപ്പെട്ടില്ല. അയ്യായിരം പേര്‍ എത്തിയാലും കൊവിഡ് മാനദണ്ഡം പാലിച്ച് സുഗമമായി ദര്‍ശനം നടത്താനാകും. 1000 പേരെ നിശ്ചിത അകലത്തില്‍ ഒരേസമയം നിറുത്താന്‍ മരക്കൂട്ടം ,ശരംകുത്തി വഴി സന്നിധാനത്തേക്കുള്ള പാതയില്‍ സൗകര്യമുണ്ട്. ഈ പാത ഇനിയും തുറന്നിട്ടില്ല. ക്യൂ കോംപ്‌ളക്‌സ്, നടപന്തല്‍ എന്നിവ മരക്കൂട്ടം മുതലുണ്ട്. ഇന്നലെ മാത്രമാണ് ഭക്തരുടെ സാന്നിദ്ധ്യം മുഴുവന്‍ സമയവും പ്രകടമായത്.