സ്ത്രീകള്‍ക്കെതിരെ വാക്ക് കൊണ്ടോ പ്രവൃത്തി കൊണ്ടോ അപമാനിക്കാന്‍ നോക്കുന്നവര്‍ക്കുള്ള ശക്തമായ പാഠമാണ് കൊച്ചി ലുലു മാളിലെ സംഭവം. അറിഞ്ഞോ അറിയാതെയോ ഒരു താല്‍ക്കാലിക രസത്തിനോ സ്ത്രീകള്‍ക്ക് മേല്‍ കൈവയ്ക്കുന്നവര്‍ക്ക് അതിന്റെ ഭവിഷ്യത്ത് എന്താണെന്ന് മനസിലാക്കിക്കൊടുന്ന നിമിഷങ്ങളായിരുന്നു അത്. ജോലി തേടി വന്നെന്ന് പറയുന്ന യുവാക്കള്‍ യുവനടിയെ അപമാനിച്ച് കടന്ന് കളയുമ്പോള്‍ ഇത്രയും പൊല്ലാപ്പ് പ്രതീക്ഷിച്ചില്ല.

ആരും അറിയില്ലെന്ന് കരുതിയ സംഭവം ഫോട്ടോ സഹിതം ലോകം മൊത്തം കണ്ടു. വീട്ടുകാര്‍ തീ തിന്നു. മക്കളെ എപ്പോഴും പോലീസ് പിടിക്കുന്ന അവസ്ഥ. നല്ല വീട്ടലെ വിദ്യാഭ്യാസമുള്ള 24 വയസുള്ള നല്ല ചുള്ളന്‍ പയ്യന്‍മാര്‍ അവസാനം മാപ്പുമായി രംഗത്തെത്തി. പക്ഷെ പോലീസ് മാപ്പില്‍ വീണില്ല. കീഴടങ്ങുമെന്ന് വക്കീല്‍ അറിയിച്ചെങ്കിലും പോലീസ് വിട്ടില്ല. നാടകീയമായി അറസ്റ്റ് ചെയ്തു. എല്ലാം കഴിഞ്ഞപ്പോള്‍ കുടുംബങ്ങളെ ഓര്‍ത്ത് നടി മാപ്പു നല്‍കിയെന്നാണ് പുറത്ത് വരുന്ന വാര്‍ത്തകള്‍. പക്ഷെ വെറുതേ പോയ വയ്യാവേലി ചോദിച്ചു വാങ്ങിയ പയ്യന്‍മാരുടെ നാണക്കേട് ജീവിതകാലം തീര്‍ത്താല്‍ തീരുമോ. അതിനാല്‍ എല്ലാവര്‍ക്കും ഇതൊരു പാഠമാകണം.

ലുലുമാളില്‍ ഷോപ്പിങ്ങിനെത്തിയ യുവനടിയെ അപമാനിച്ച കേസിലെ പ്രതികളെ പൊലീസ് നാടകീയമായി അറസ്റ്റ് ചെയ്തു. മലപ്പുറം കടന്നമണ്ണ വഴിക്കടവ് മാടശ്ശേരി മുഹമ്മദ് ആദില്‍(24), കരിമല ചെണ്ണേന്‍കുന്നന്‍ റംഷാദ്(24) എന്നിവരാണു പിടിയിലായത്. മലപ്പുറത്തു നിന്നു കളമശേരി സ്‌റ്റേഷനിലെത്തി അന്വേഷണ ഉദ്യോഗസ്ഥനു മുന്നില്‍ കീഴടങ്ങാനുള്ള യാത്രാമധ്യേ കുസാറ്റ് ജംക്ഷനില്‍ വച്ചു വാഹനം തടഞ്ഞ പൊലീസ് രാത്രി 8.50ന് ഇവരെ കസ്റ്റഡിയിലെടുക്കുകയായിരുന്നു.

വ്യാഴാഴ്ച കുടുംബത്തോടൊപ്പം മാളില്‍ ഷോപ്പിങ്ങിനെത്തിയപ്പോള്‍ ആള്‍ത്തിരക്കില്ലാത്തിടത്തു വച്ചു പ്രതികള്‍ മനപൂര്‍വം തന്റെ ശരീരത്തു സ്പര്‍ശിക്കുകയും പിന്തുടരുകയും ചെയ്‌തെന്നു നടി സമൂഹമാധ്യമത്തിലൂടെ വെളിപ്പെടുത്തിയതിനെത്തുടര്‍ന്നാണു പൊലീസ് കേസെടുത്ത് അന്വേഷണം ആരംഭിച്ചത്.

മാളിലുണ്ടായ സംഭവം വിശദീകരിച്ചു കൊണ്ടുള്ള തങ്ങളുടെ വിഡിയോ സന്ദേശം ഇന്നലെ രാവിലെ ഇവര്‍ മാധ്യമങ്ങള്‍ക്കു കൈമാറിയിരുന്നു. പൊലീസിനു മുന്നിലെത്തി കീഴടങ്ങാന്‍ തയാറാണെന്നും നടിയോടും കുടുംബത്തോടും മാപ്പു ചോദിക്കാന്‍ തയാറാണെന്നുമായിരുന്നു സന്ദേശത്തില്‍. നടിയുടെ കുടുംബം ഇക്കാര്യത്തില്‍ ഇനിയും പ്രതികരിച്ചിട്ടില്ലെങ്കിലും യുവാക്കള്‍ക്കു മാപ്പു കൊടുത്തേക്കുമെന്നു സൂചനയുണ്ട്. ഹൈക്കോടതിയില്‍ നിന്നു മുന്‍കൂര്‍ ജാമ്യമെടുക്കാന്‍ പ്രതികള്‍ ആദ്യം ശ്രമിച്ചെങ്കിലും പിന്നീട് അപേക്ഷ പിന്‍വലിച്ചിരുന്നു. അതേസമയം, കേസ് പിന്‍വലിച്ചില്ലെങ്കില്‍ നടപടികളുമായി മുന്നോട്ടു പോകുമെന്നാണു പൊലീസ് നിലപാട്.

പ്രതികളെ രാത്രി വൈകിയും സ്‌റ്റേഷനിലെത്തിച്ചിട്ടില്ല. ഇന്നലെ ഉച്ചയോടെ കളമശേരി ഇന്‍സ്‌പെക്ടറും സംഘവും കടന്നമണ്ണയിലെ ആദിലിന്റെ വീട്ടിലെത്തിയിരുന്നു. കരിമലയിലെ റംഷാദിന്റെ വീട്ടില്‍ മങ്കട സിഐയുടെ നേതൃത്വത്തിലും പൊലീസെത്തി. അഭിഭാഷകന്റെ നിര്‍ദേശപ്രകാരം ഒളിവില്‍ പോയെന്നാണു യുവാക്കള്‍ പറയുന്നത്.

നടിയെ മനപൂര്‍വം അപമാനിക്കുകയോ പിന്തുടരുകയോ ചെയ്തില്ലെന്നാണു വിഡിയോ സന്ദേശത്തില്‍ പ്രതികള്‍ പറയുന്നത്. റംഷാദിന്റെ പിതാവിന്റെ പേരിലുള്ള കാറിന്റെ എസി തകരാര്‍ തീര്‍ക്കുന്നതിനു തൃശൂരിലെ വര്‍ക്‌ഷോപ്പിലെത്തി വാഹനം ഏല്‍പിച്ച ശേഷമാണു ജോലിക്കുള്ള അഭിമുഖത്തില്‍ പങ്കെടുക്കാന്‍ കൊച്ചിയിലേക്കു പോയതെന്നും ഇവര്‍ പറയുന്നു. അഭിമുഖത്തിനു ശേഷം മടക്ക ട്രെയിനിന്റെ സമയം ആകുന്നതുവരെ ലുലു മാളില്‍ ചെലവഴിക്കുകയായിരുന്നെന്നും ഇവര്‍ പറയുന്നു.

ദുരുദ്ദേശ്യത്തോടെയല്ല മാളിലെത്തിയതെന്നാണ് യുവാക്കള്‍ പറയുന്നത്. അവിടെ വച്ചു നടിയെ കാണുകയും അടുത്തു പോയി സംസാരിക്കുകയും ചെയ്തു. നടിയാണെന്ന് ആദ്യം അറിഞ്ഞിരുന്നില്ല. മറ്റൊരു കുടുംബം നടിയോടൊപ്പം സെല്‍ഫി എടുക്കുന്നതു കണ്ടാണ് അടുത്തു ചെന്നു സംസാരിച്ചത്. തിരക്കിനിടെ നടിയെ അബദ്ധത്തില്‍ സ്പര്‍ശിച്ചോ എന്ന കാര്യം അറിയില്ല. എന്തെങ്കിലും തരത്തില്‍ മോശം പെരുമാറ്റം തങ്ങളില്‍ നിന്നുണ്ടായിട്ടുണ്ടെങ്കില്‍ മാപ്പു പറയാന്‍ തയാറാണെന്നുമാണ് വിഡിയോ സന്ദേശത്തില്‍ പറയുന്നത്.

യുവാക്കള്‍ ഇരുവരും ഓട്ടമൊബീല്‍ കോഴ്‌സ് കഴിഞ്ഞ ശേഷം ജോലി അന്വേഷണത്തിലാണ്. രണ്ടു പേര്‍ക്കും ക്രിമിനല്‍ പശ്ചാത്തലമോ മറ്റു കേസുകളോ ഇല്ലെന്നു മങ്കട പൊലീസ് പറയുന്നു.