മകള്‍ ഒരിക്കലും ആത്മഹത്യ ചെയ്യില്ല... മകളുടെ ദുരൂഹ മരണത്തിനു പിന്നില്‍ ആരാണെന്നു കണ്ടെത്തുന്നതിന് ഒരായുസ്സു മുഴുവന്‍ കാത്തിരുന്നെങ്കിലും നാളെ വിധി വരുമ്പോള്‍ കേള്‍ക്കാന്‍ അവരില്ല.... സിസ്റ്റര്‍ അഭയ കേസിന്റെ അന്തിമ വിധി നാളെ.. സിസ്റ്റര്‍ അഭയയുടെ പിതാവ് ഐക്കരക്കുന്നേല്‍ തോമസും മാതാവ് ലീലാമ്മയും.

പള്ളിക്കും പുരോഹിതര്‍ക്കുമെതിരെ ജീവതാവസാനം വരെ പൊരുതിയ തോമസ് 2016 ജൂലായ് 24നും ലീലാമ്മ നവംബര്‍ 21നും മരണമടഞ്ഞു.അഭയം തേടിയ നീതി, നാളെ അന്തിമ വിധി. ആത്മഹത്യയെന്ന വാദമുയര്‍ത്തി കേസ് അവസാനിപ്പിക്കാന്‍ അന്വേഷണ സംഘങ്ങള്‍ ധൃതി കാട്ടിയ ഓരോ തവണയും, അഭയ ഒരിക്കലും ആത്മഹത്യ ചെയ്യില്ലെന്ന ഉറച്ച നിലപാടുമായി ഉള്ളിലെ വേദന കടിച്ചമര്‍ത്തി സമരവേദികളില്‍ നീതിക്കായി ഇവര്‍ പോരാടി. മാറി മാറി വന്ന അന്വേഷണ സംഘങ്ങള്‍ കേസ് അട്ടിമറിക്കാന്‍ ശ്രമിച്ചപ്പോള്‍ കോടതിയില്‍ വിശ്വാസമര്‍പ്പിച്ച തോമസിന്റെ കാത്തിരിപ്പും നീണ്ടു.

ഒടുവില്‍ വിധി എന്തെന്നറിയാതെ തോമസ് വിടപറഞ്ഞു. ഭര്‍ത്താവു മരിച്ച് അഞ്ചു മാസം കഴിഞ്ഞപ്പോള്‍ ലീലാമ്മയും .തലയോലപ്പറമ്പ് സ്വദേശിയായ തോമസ് അരീക്കരയില്‍ താമസിക്കുന്നതിനിടെയാണ് ബീനയെന്ന സിസ്റ്റര്‍ അഭയയുടെ ദുരൂഹ മരണം.

അഭയയ്ക്ക് അന്ന് 21 വയസ്. ബി.സി.എം കോളേജിലെ രണ്ടാം വര്‍ഷ പ്രീ- ഡിഗ്രി വിദ്യാര്‍ത്ഥിനിയും ക്‌നാനായ കത്തോലിക്കാ സഭയ്ക്കു കീഴിലുള്ള സെന്റ് ജോസഫ് കോണ്‍ഗ്രിഗേഷനിലെ കന്യാസ്ത്രീയുമായിരുന്ന അഭയയുടെ മരണം തോമസിനും കുടുംബത്തിനും താങ്ങാവുന്നതിലും അപ്പുറമായിരുന്നു.

മാനസികമായി തകര്‍ന്ന തോമസും കുടുംബവുംപിന്നീട് കുറവിലങ്ങാട്ടേയ്ക്ക് താമസം മാറി. 24 വര്‍ഷത്തോളം സമരം നടത്തിയും കോടതി കയറിയും മകളുടെ ഘാതകരെ കണ്ടെത്താന്‍ തോമസ് രാപ്പകലില്ലാതെ അലഞ്ഞു. ഏകമകന്‍ ബിജുവിനും കുടുംബത്തിനുമൊപ്പം താമരക്കാട് താമസിക്കുമ്പോഴാണ് ഇരുവരുടേയും മരണം. ബിജു ഇപ്പോള്‍ ദുബായിലാണ്. മൂന്നു പതിറ്റാണ്ടോളമെത്തുന്ന കേസില്‍ നാളെ വിധിയെത്തുമ്പോള്‍ അച്ഛനും അമ്മയും മറ്റൊരു ലോകത്താണ്.