കോവിഡ് വാക്‌സീന്‍ നിര്‍മിക്കുന്ന പുനെ സീറം ഇന്‍സ്റ്റിറ്റിയൂട്ട് ഓഫ് ഇന്ത്യയില്‍ ഇന്നലെയുണ്ടായ തീപിടിത്തത്തിന്റെ ഞെട്ടലിലാണ് രാജ്യം. അതിന്റെ നടുക്കം മാറും മുമ്പ് കര്‍ണാടകയില്‍ നിന്നുള്ള ഞെട്ടിക്കുന്ന വാര്‍ത്ത. കര്‍ണാടകയിലെ ശിവമോഗയില്‍ ക്വാറിയിലുണ്ടായ സ്‌ഫോടനത്തില്‍ എട്ടു പേര്‍ മരിച്ചു. സ്‌ഫോടക വസ്തു കയറ്റിയ ട്രക്ക് പൊട്ടിത്തെറിച്ചാണ് അപകടമുണ്ടായത്. നിരവധിപ്പേര്‍ക്ക് പരിക്കേറ്റിട്ടുണ്ട്. മരണസംഖ്യ ഉയരാനാണ് സാധ്യത.

വ്യാഴാഴ്ച രാത്രി 10.20നാണ് സംഭവമുണ്ടായത്. റെയില്‍വേ ക്രഷര്‍ യൂണിറ്റിലേക്ക് സ്‌ഫോടക വസ്തുക്കളുമായി എത്തിയ ട്രക്കാണ് പൊട്ടിത്തെറിച്ചത്. ബിഹാര്‍ സ്വദേശികളായ തൊഴിലാളികളാണ് മരിച്ചതെന്നാണ് ലഭിക്കുന്ന സൂചനകള്‍.

എട്ടു പേരുടെ മരണം സ്ഥിരീകരിച്ചതായി ജില്ലാ ഭരണകൂടവും അറിയിച്ചു. പൊട്ടിത്തെറി ശിവമോഗ, ചിക്കമംഗളൂരു ജില്ലകളെ പ്രകമ്പനം കൊള്ളിച്ചു. ഭൂകമ്പത്തിന് സമാനമായി വീടുകള്‍ കുലുങ്ങിവിറച്ചു. നിരവധി വീടുകള്‍ക്ക് കേടുപാടുകള്‍ സംഭവിച്ചതായും റിപ്പോര്‍ട്ടുകളുണ്ട്.

റയില്‍വേ ക്രഷര്‍ യൂണിറ്റിലേക്ക് വന്ന ട്രക്കാണ് അപകടത്തില്‍പ്പെട്ടത്. ബിഹാറില്‍ നിന്നുള്ള തൊളിലാളികളാണ് മരിച്ചത്. ഇന്നലെ രാത്രി പത്തരയോടെയാണ് വന്‍സ്‌ഫോടനമുണ്ടായത്.

സമീപ ജില്ലയായ ചിക്കമംഗളൂരുവിലുള്‍പ്പെടെ വന്‍ സ്‌ഫോടന ശബ്ദം കേട്ടതായി നാട്ടുകാര്‍ പറയുന്നു. 15 കിലോമീറ്റര്‍ ചുറ്റളവില്‍ വരെ കെട്ടിടങ്ങള്‍ക്കു നാശനഷ്ടമുണ്ടായി.

അത്സമയം കോവിഡ് വാക്‌സീന്‍ നിര്‍മിക്കുന്ന പുനെ സീറം ഇന്‍സ്റ്റിറ്റിയൂട്ട് ഓഫ് ഇന്ത്യയില്‍ പണി നടക്കുന്ന കെട്ടിടത്തില്‍ ഇന്നലെയുണ്ടായ തീപിടിത്തത്തില്‍ 5 പേര്‍ മരിച്ചു. തിരിച്ചറിയാന്‍ കഴിയാത്തവിധം കത്തിക്കരിഞ്ഞ നിലയിലായിരുന്നു മൃതദേഹങ്ങള്‍. 9 പേരെ രക്ഷിച്ചു. കോവിഷീല്‍ഡ് വാക്‌സീന്‍ പ്ലാന്റില്‍ നിന്ന് ഒരു കിലോമീറ്റര്‍ അകലെയാണ് തീപിടിത്തം. വാക്‌സീന്‍ ഉല്‍പാദനത്തെയോ, ശേഖരണ സംവിധാനങ്ങളെയോ അപകടം ബാധിക്കില്ലെന്ന് സീറം ഇന്‍സ്റ്റിറ്റിയൂട്ട് സിഇഒ അദാര്‍ പൂനവാല അറിയിച്ചു.

പുനെ മാഞ്ജരി മേഖലയില്‍ 100 ഏക്കറിലുള്ള ക്യാംപസില്‍ റോട്ട വൈറസ് വാക്‌സീന്‍ നിര്‍മിക്കുന്ന യൂണിറ്റിലെ കെട്ടിടത്തിന്റെ 4, 5 നിലകളില്‍ ഇന്നലെ ഉച്ചകഴിഞ്ഞ് 2.45നാണു തീ പടര്‍ന്നത്. മേഖലയാകെ പുക മൂടി. രണ്ടു മണിക്കൂറിനകം തീയണച്ചു. വെല്‍ഡിങ് ജോലികള്‍ക്കിടയിലെ ഷോര്‍ട്ട് സര്‍ക്യൂട്ടാണെന്നാണു പ്രാഥമിക നിഗമനം.

വാക്‌സീന്‍ ഉല്‍പാദനവുമായി ബന്ധപ്പെട്ട യന്ത്രങ്ങളോ വസ്തുക്കളോ കെട്ടിടത്തിന്റെ ഈ നിലകളില്‍ ഉണ്ടായിരുന്നില്ലെന്ന് അധികൃതര്‍ അറിയിച്ചു. സംഭവത്തെക്കുറിച്ച് അന്വേഷണം പ്രഖ്യാപിച്ചു.

ഇന്ത്യയുടെ മാത്രമല്ല, ലോകത്തെ തന്നെ ഏറ്റവും വലിയ വാക്‌സീന്‍ ഉല്‍പാദക കമ്പനികളിലൊന്നാണ് സീറം ഇന്‍സ്റ്റിറ്റിയൂട്ട്. കോവിഡ് പ്രതിസന്ധിക്കു മുന്‍പുതന്നെ ഈ മേഖലയില്‍ സീറം നിര്‍ണായക സാന്നിധ്യമാണ്. പോളിയോ, ഡിഫ്തീരിയ, ടെറ്റനസ്, അഞ്ചാംപനി, മുണ്ടിനീര്, റൂബെല്ല തുടങ്ങി ഇരുപതില്‍പരം വാക്‌സീനുകളുടെ 150 കോടി ഡോസ് പ്രതിവര്‍ഷം ഉല്‍പാദിപ്പിക്കുന്നു. ലോകത്തെ 65% കുട്ടികളും സീറം ഉല്‍പാദിപ്പിക്കുന്ന വാക്‌സീനുകളില്‍ ഒന്നെങ്കിലും സ്വീകരിച്ചിട്ടുള്ളവരാണ്.