മന്ത്രിമാരുടെ നേതൃത്വത്തില് പരാതിപരിഹാര അദാലത്തുകള് നടത്തുന്നു; ഫെബ്രുവരി ഒന്ന്, രണ്ട്, നാല് തീയതികളില് താലൂക്ക് അടിസ്ഥാനത്തില് നടക്കും
ജനങ്ങളുടെ അടിയന്തര പ്രശ്നങ്ങള് മനസ്സിലാക്കി അവയ്ക്ക് സത്വര പരിഹാര നടപടികള് സ്വീകരിക്കുന്നതിന് മന്ത്രിമാരുടെ നേതൃത്വത്തില് ജില്ലയില് പരാതി പരിഹാര അദാലത്തുകള് നടത്തുന്നു. ഫെബ്രുവരി ഒന്ന്, രണ്ട്, നാല് തീയതികളില് താലൂക്ക് അടിസ്ഥാനത്തില് നടക്കുന്ന അദാലത്തുകള്ക്ക് മന്ത്രിമാരായ ഇ പി ജയരാജന്, കെ കെ ശൈലജ ടീച്ചര്, രാമചന്ദ്രന് കടന്നപ്പള്ളി എന്നിവര് നേതൃത്വം നല്കും. ജില്ലാ കലക്ടര് ടി വി സുഭാഷിന്റെ അധ്യക്ഷതയില് ചേര്ന്ന യോഗം അദാലത്ത് നടത്തിപ്പ് സംബന്ധിച്ച കാര്യങ്ങള് ചര്ച്ച ചെയ്തു.
ഫെബ്രുവരി ഒന്നിന് ഇരിട്ടി താലൂക്ക്, രണ്ടിന് കണ്ണൂര്, തലശ്ശേരി താലൂക്കുകള്, നാലിന് തളിപ്പറമ്ബ്, പയ്യന്നൂര് താലൂക്കുകള് എന്നിവയുടെ അദാലത്തുകളാണ് നടക്കുക. അദാലത്തില് പരിഗണിക്കേണ്ട പരാതികളും അപേക്ഷകളും അക്ഷയ കേന്ദ്രങ്ങള് വഴിയാണ് നല്കേണ്ടത്. ഇതിനായി അപേക്ഷകരില് നിന്ന് ഫീസ് ഈടാക്കാന് പാടില്ല. പട്ടയം, ലൈഫ് പദ്ധതി, പൊലീസ് വകുപ്പുമായി ബന്ധപ്പെട്ട പരാതികള്, പ്രളയ നഷ്ടപരിഹാരം സംബന്ധിച്ച പരാതികള് എന്നിവ ഈ അദാലത്തില് പരിഗണിക്കില്ല. ഈ നാല് വിഷയങ്ങളില് ഒഴികെയുള്ള ഏത് പരാതിയും അദാലത്തിലേക്ക് സമര്പ്പിക്കാവുന്നതാണ്.
എസ്ടി മേഖലകളില് പരാതി സ്വകീരിക്കുന്നതിന് പ്രത്യേക ക്രമീകരണം ഏര്പ്പെടുത്തുമെന്നും ജില്ലാ കലക്ടര് പറഞ്ഞു.
ഓരോ ദിവസവും ലഭിക്കുന്ന പരാതികള് ജില്ലാ കലക്ടറുടെ ലോഗ് ഇന്നിലേക്ക് നല്കും. ഓരോ വകുപ്പുമായി ബന്ധപ്പെട്ട പരാതികള് ഓരോ ദിവസവും അതത് വകുപ്പുകള്ക്ക് കൈമാറും. എഡിഎം, ഡിഡിപി, ജില്ലാ സാമൂഹ്യനീതി ഓഫീസര്, ജില്ലാ സപ്ലൈ ഓഫീസര്, പ്രിന്സിപ്പല് കൃഷി ഓഫീസര് എന്നിവരടങ്ങിയ സമിതി പരാതികള് പരിശോധിച്ച് നടപടികള്ക്ക് മേല്നോട്ടം വഹിക്കും. ജില്ലാ തല സമിതി പരാതികള് പരിശോധിച്ച് തീര്പ്പ് കല്പ്പിക്കുന്നതിനാവശ്യമായ നടപടികള്ക്ക് നിര്ദേശം നല്കും. സംസ്ഥാന തലത്തില് തീരുമാനമെടുക്കേണ്ടവ സംസ്ഥാന തലത്തിലേക്ക് അയച്ചുകൊടുക്കും. നിയമപരമായ കാരണങ്ങളാലോ മറ്റ് വിധിത്തിലോ നടപടി കൈക്കൊള്ളാന് കഴിയാത്ത പരാതികളാണെങ്കില് അക്കാര്യം വ്യക്തമാക്കി പരാതിക്കാരന് മറുപടി നല്കണമെന്ന് സര്ക്കാര് നിര്ദേശിച്ചതായി ജില്ലാ കലക്ടര് യോഗത്തില് അറിയിച്ചു. ഇതില് തൃപ്തരല്ലെങ്കില് ഏത് വകുപ്പിലെ ഏത് ഉദ്യോഗസ്ഥനെയാണ് ബന്ധപ്പെടേണ്ടതെന്ന വിവരവും പരാതിയില് രേഖപ്പെടുത്തും. യോഗത്തില് എഡിഎം ഇ പി മേഴ്സി, ജില്ലാ തല ഉദ്യോഗസ്ഥര്, താഹസില്ദാര്മാര് തുടങ്ങിയവര് പങ്കെടുത്തു.
https://www.facebook.com/Malayalivartha