അഞ്ചാംക്ലാസ് വിദ്യാര്ഥിനി ഷഹല ഷെറിന് ക്ലാസ്മുറിയില് പാമ്പുകടിയേറ്റ് മരിച്ച സംഭവം; കുടുംബത്തിന് അഞ്ചു ലക്ഷം രൂപ നല്കണമെന്ന് സംസ്ഥാന മനുഷ്യാവകാശ കമീഷന്
സുല്ത്താന് ബത്തേരി പുത്തല്കുന്ന് ഗവ. സര്വജന വൊക്കേഷനല് ഹയര് സെക്കന്ഡറി സ്കൂളിലെ അഞ്ചാംക്ലാസ് വിദ്യാര്ഥിനി ഷഹല ഷെറിന് ക്ലാസ്മുറിയില് പാമ്പുകടിയേറ്റ് മരിച്ച സംഭവത്തില് കുടുംബത്തിന് അഞ്ചു ലക്ഷം രൂപ നല്കണമെന്ന് സംസ്ഥാന മനുഷ്യാവകാശ കമീഷന്. ആരോഗ്യ, വിദ്യാഭ്യാസ വകുപ്പ് സെക്രട്ടറിമാര്ക്കാണ് ഉത്തരവ് നല്കിയത്. മരണത്തിന് ഉത്തരവാദികളായ സ്കൂള് അധികൃതര്ക്കും മെഡിക്കല് ഓഫിസര്ക്കുമെതിരെ അച്ചടക്ക നടപടി സ്വീകരിച്ചശേഷം കമീഷനെ രേഖാമൂലം അറിയിക്കണമെന്നും ഉത്തരവിലുണ്ട്.
കേസന്വേഷണം ഡിവൈ.എസ്.പി റാങ്കിലുള്ള ഉദ്യോഗസ്ഥനെ നിയോഗിച്ച് പൂര്ത്തിയാക്കി കോടതി മുമ്ബാകെ അന്തിമ റിപ്പോര്ട്ട് സമര്പ്പിക്കണമെന്ന് വയനാട് ജില്ല പൊലീസ് മേധാവിക്കും നിര്ദേശം നല്കി. കേസിലെ നാലാം പ്രതിയായ ഡോക്ടര്ക്കെതിരെ നടപടിയെടുക്കുന്നതിന് മെഡിക്കല് ബോര്ഡ് കൂടി ഒരു മാസത്തിനകം അന്തിമ തീരുമാനമെടുക്കണം.
കോവിഡ് കാരണം മെഡിക്കല് ബോര്ഡ് രൂപവത്കരിച്ചില്ലെന്ന ആരോഗ്യ വകുപ്പിെന്റ വാദം ഉദ്യോഗസ്ഥരുടെ വീഴ്ചയാണെന്ന് കമീഷന് വിലയിരുത്തി. സ്കൂള് അധികൃതരുടെ ഭാഗത്ത് വീഴ്ചയുള്ളതായി വ്യക്തമായതായി ജില്ല കലക്ടര് കമീഷനെ അറിയിച്ചിരുന്നു. സ്കൂള്, ആശുപത്രി അധികൃതരുടെ വീഴ്ചകൊണ്ടാണ് ബാലികയുടെ ജീവന് നഷ്ടമായതെന്നാണ് റിപ്പോര്ട്ടുകളില്നിന്നു മനസ്സിലാക്കുന്നതെന്ന് കമീഷന് ഉത്തരവില് പറഞ്ഞു. പൊതുപ്രവര്ത്തകരായ യു.എ. അജ്മല് സാജിദ്, അഡ്വ. ശ്രീജിത്ത് പെരുമന, മുജീബ് റഹ്മാന്, ഡോ. ഗിന്നസ് മാടസാമി, അഡ്വ. ദേവദാസ്, റഹിം പന്തളം എന്നിവര് നല്കിയ പരാതിയിലാണ് ഉത്തരവ്.
https://www.facebook.com/Malayalivartha