കെഎസ്.ആര്‍.ടി.സി ബസിടിച്ച് മരിച്ചത് വിവാഹം നിശ്ചയിച്ച യുവാവും യുവതിയും.... ആന്‍സിയെ കോട്ടയത്ത് ജോലിക്കുള്ള അഭിമുഖത്തില്‍ പങ്കെടുപ്പിച്ച് തിരികെ ചെങ്ങന്നൂരിലേക്ക് മടങ്ങിവരുന്ന വഴിയായിരുന്നു അപകടം, സന്തോഷത്തോടെ വീട്ടില്‍ നിന്നിറങ്ങിയ ഇരുവരുടെയും .യാത്ര അന്ത്യയാത്രയായി. എം.സി റോഡില്‍ തിരുവല്ലക്കും ചങ്ങനാശ്ശേരിക്കുമിടയില്‍ പെരുന്തുരുത്തിയിലാണ് സംഭവം.

ചെങ്ങന്നൂര്‍ പിരളശ്ശേരി കാഞ്ഞിരംപറമ്പില്‍ വീട്ടില്‍ പരേതനായ ചാക്കോ സാമുവേല്‍ - കുഞ്ഞമ്മ ദമ്പതികളുടെ മകനും മുളക്കുഴ സെന്റ് ഗ്രീഗോറിയോസ് സ്‌കൂള്‍ ബസിലെ ഡ്രൈവറുമായ ജെയിംസ് ചാക്കോയും (32), വെണ്‍മണി കല്യാത്ര പുലക്കടവ് ആന്‍സി ഭവനില്‍ സണ്ണി - ലിലാമ്മ ദമ്പതികളുടെ മകള്‍ ആന്‍സിയും (26) ആണ് മരിച്ചത്.

കംപ്യൂട്ടര്‍ പഠനം കഴിഞ്ഞ ആന്‍സിയെ കോട്ടയത്ത് ജോലിക്കുള്ള അഭിമുഖത്തില്‍ പങ്കെടുപ്പിച്ച് തിരികെ ചെങ്ങന്നൂരിലേക്ക് മടങ്ങിവരുന്ന വഴിയായിരുന്നു അപകടമുണ്ടായത്. ഇരുവരുടെയും വിവാഹം വീട്ടുകാര്‍ ആലോചിച്ച് ഉറപ്പിച്ചിരിക്കെയാണ് ദുരന്തമുണ്ടായത്.


ആന്‍സിയുടെ അമ്മയും സഹോദരന്‍ അഖിലും കോവിഡ് പശ്ചാത്തലത്തില്‍ വിദേശത്തുനിന്ന് നാട്ടിലെത്തിലെത്തുന്നതിലുണ്ടായ സാങ്കേതിക പ്രശ്‌നങ്ങള്‍ കണക്കിലെടുത്താണ് വിവാഹ തീയതി തീരുമാനിക്കാതിരുന്നത്. ജയിംസ് ചാക്കോയുടെ അമ്മ രോഗബാധിതയാണ്. ബിന്ദു ഏക സഹോദരിയാണ്. ജയിംസ് നാട്ടുകാര്‍ക്കും ജോലി ചെയ്യുന്ന സ്‌കൂളിലെ സഹപ്രവര്‍ത്തകര്‍ക്കും പ്രിയങ്കരനായിരുന്നു. ഇന്നലെ വൈകിട്ട് 4.15ഓടെയായിരുന്നു അപകടം. കോട്ടയത്ത് നിന്നും തിരുവല്ലയിലേക്ക് വന്ന കെ.എസ്.ആര്‍.ടി.സി ബസ് മുന്നില്‍പോയ സ്‌കൂട്ടര്‍ യാത്രക്കാരെ ഇടിച്ചശേഷം സമീപത്തെ കടയിലേക്ക് ഇടിച്ചു കയറുകയായിരുന്നു.



ബസിനടിയില്‍ കുടുങ്ങിപ്പോയ ജെയിംസിനെയും ആന്‍സിയെയും ഓടിക്കൂടിയ നാട്ടുകാരും ഫയര്‍ ഫോഴ്‌സും ചേര്‍ന്നാണ് പുറത്തെടുത്തത്. ഇരുവരും സംഭവസ്ഥലത്തു വെച്ചു തന്നെ മരിച്ചു. അപകടത്തില്‍ 22 പേര്‍ക്ക് പരിക്കേറ്റു. അപകടത്തില്‍ ബസ് പൂര്‍ണ്ണമായും തകര്‍ന്നു.

റോഡരികില്‍ നിര്‍ത്തിയിട്ട സമീപത്തെ കടയിലെ ജീവനക്കാകരുടെ രണ്ട് സ്‌കൂട്ടറുകളും, സമീപത്തെ മാള്‍ ഉടമയുടെ കാറും ബസ്സിടിച്ച് തകര്‍ന്നു. ഡ്രൈവര്‍ക്ക് ദേഹാസ്വാസ്ഥ്യം ഉണ്ടായതാണ് അപകട കാരണമെന്നാണ് വിവരം.