കെ വി തോമസിനെ അനുനയിപ്പിക്കാന്‍ കോണ്‍ഗ്രസ് ഹൈക്കമാന്‍ഡ് നടത്തുന്ന നീക്കങ്ങളില്‍ സംസ്ഥാന കോണ്‍ഗ്രസ് സംസ്ഥാന നേതൃത്വം അസ്വസ്ഥരാണ് . ദീര്‍ഘ കാലത്തെ കോണ്‍ഗ്രസ് ബന്ധം പൊടുന്നനെ ഉപേക്ഷിച്ച് ഇടതു പക്ഷത്ത് ചേക്കേറാന്‍ തീരുമാനിച്ച കെ.വി. തോമസിനെ അദ്ദേഹത്തിന്റെ പാട്ടിന് വിടണമെന്നാണ് കോണ്‍ഗ്രസ് പ്രവര്‍ത്തകരുടെ ആവശ്യം. കെ.വി. തോമസ് ഇടതു പക്ഷത്തേക്ക് പോയാലും ജയിക്കില്ലെന്ന് തന്നെ കോണ്‍ഗ്രസ് പ്രവര്‍ത്തകര്‍ വിശ്വസിക്കുന്നു.

അതിനിടെ കെ വി തോമസ് തിരുവനന്തപുരത്തേക്ക് തിരിച്ചു. ഹൈക്കമാന്‍ഡ് പ്രതിനിധി സംഘത്തെ കാണുന്നതിനായാണ് യാത്ര. കെപിസിസി വര്‍ക്കിംഗ് പ്രസിഡണ്ട് സ്ഥാനം നല്‍കി കെ വി തോമസിനെ അനുനയിപ്പിക്കും എന്നാണ് സൂചന. പ്രതിഷേധമുണ്ടെങ്കിലും കോണ്‍ഗ്രസ് നേതാക്കള്‍ക്ക് അംഗീകരിക്കാതിരിക്കാന്‍ നിവ്യത്തിയില്ല.

കെ വി തോമസ് ഇടതുമുന്നണിയിലേക്ക് അടുക്കുകയാണെന്ന അഭ്യൂഹം കഴിഞ്ഞ ദിവസങ്ങളില്‍ ശക്തമായിരുന്നു. അത് അദ്ദേഹത്തിന്റെ തന്ത്രമാണെന്ന് കോണ്‍ഗ്രസ് പ്രവര്‍ത്തകര്‍ കരുതുന്നു. നിയമസഭാ തെരഞ്ഞെടുപ്പില്‍ അദ്ദേഹം ഇടതു സ്വതന്ത്രനായി മത്സരിക്കുമെന്നായിരുന്നു പ്രചാരണം. നിലപാട് വ്യക്തമാക്കാന്‍ ഇന്ന് അദ്ദേഹം വാര്‍ത്താ സമ്മേളനം വിളിക്കുകയും ചെയ്തു. എന്നാല്‍, വിഷയത്തില്‍ സോണിയാ ഗാന്ധി നേരിട്ട് ഇടപെട്ടതോടെ ഇന്നലെ രാത്രി അദ്ദേഹം വാര്‍ത്താ സമ്മേളനം റദ്ദാക്കി. പുലര്‍ച്ചെ അഞ്ചരയോടെ തിരുവനന്തപുരത്തേക്ക് തിരിച്ച അദ്ദേഹം ഹൈക്കമാന്‍ഡ് പ്രതിനിധികളുമായി കൂടിക്കാഴ്ച നടത്തും.

സോണിയാ ഗാന്ധി നേരിട്ട് വിളിച്ചെന്നാണ് കെ വി തോമസ് ഇന്നലെ രാത്രി മാധ്യമങ്ങളെ അറിയിച്ചത്.ഇന്നത്തെ യോഗത്തില്‍ പങ്കെടുക്കണമെന്ന് ആവശ്യപ്പെട്ടു. സോണിയാ ഗാന്ധി പറഞ്ഞാല്‍ തള്ളിക്കളയാനാവില്ലെന്നും അദ്ദേഹം മാധ്യമങ്ങളോട് പറഞ്ഞു.

തദ്ദേശ തെരഞ്ഞെടുപ്പിലടക്കം പലതിലും പാര്‍ട്ടിയില്‍ നിന്ന് തനിക്ക് വേദനയുണ്ടായി. ചില വിഷമങ്ങള്‍ ഉണ്ട്. പാര്‍ട്ടിയില്‍ നിന്നും ചിലര്‍ ആക്ഷേപിച്ചത് വേദന ഉണ്ടാക്കി. സ്ഥാനമാനങ്ങളൊന്നും താന്‍ ചോദിച്ചിട്ടില്ല. ബാക്കി കാര്യങ്ങള്‍ നാളത്തെ ചര്‍ച്ചക്ക് ശേഷം പറയാം. സോണിയ ഗാന്ധി പറയുന്ന കാര്യം അനുസരിക്കും. നേതൃത്വവുമായി ചര്‍ച്ച നടത്താന്‍ സോണിയാ ഗാന്ധി നിര്‍ദ്ദേശിച്ചെന്നും കെ വി തോമസ് പറഞ്ഞു.

എന്നാല്‍ എറണാകുളം ജില്ലയില്‍ അദ്ദേഹം ആവശ്യപ്പെടുന്ന സീറ്റുകള്‍ നല്‍കാന്‍ കോണ്‍ഗ്രസ് തയ്യാറായിട്ടുണ്ട്. ഒരു സീറ്റ് മകള്‍ക്കെന്നാണ് കേള്‍വി. അത് ഏതായാലും തോല്‍ക്കാനാണ് സാധ്യത.

തലസ്ഥാനത്ത് എത്തിയ ഹൈക്കമാന്‍ഡ് പ്രതിനിധിയും രാജസ്ഥാന്‍ മുഖ്യമന്ത്രിയുമായ അശോക് ഗെഹ്ലോത്തുമായി കെ.വി.തോമസ് ച!ര്‍ച്ച നടത്തും. തോമസ് ആവശ്യപ്പെട്ടതൊക്കെ നല്‍കാനാണ് സാധ്യത.

കെപിസിസി വര്‍ക്കിംഗ് പ്രസിഡന്റ് സ്ഥാനമോ നിയമസഭ സീറ്റോ ആവശ്യപ്പെട്ട കെവി തോമസിനോട് കോണ്‍ഗ്രസ് നേതൃത്വം മുഖം തിരിച്ചതാണ് പുതിയ കരുനീക്കങ്ങള്‍ക്ക് പിന്നില്‍. ഹൈക്കമാന്‍ഡും തന്നെ ഒഴിവാക്കുന്നുവെന്ന തോന്നലിലാണ് കെവി തോമസ് ഇടതു മുന്നണിയുടെ സഹകരണത്തിന് ശ്രമിച്ചത്.

മത്സ്യ മേഖലയിലെ പ്രശ്‌നങ്ങള്‍ ചര്‍ച്ച ചെയ്യാന്‍ ആഴ്ചകള്‍ക്ക് മുമ്പ് മുഖ്യമന്ത്രിയുമായി നടത്തിയ കൂടിക്കാഴ്ചയില്‍ കെവി തോമസ് ഇടതു മുന്നണിയുമായി സഹകരിക്കാനുള്ള തന്റെ താത്പര്യം പ്രകടിപ്പിച്ചുവെന്നാണ് സൂചന. അരൂരില്‍ ഇടതു മുന്നണി സ്ഥാനാര്‍ത്ഥിയായി മത്സരിക്കാനുള്ള ആഗ്രഹമാണ് കെവി തോമസിനുള്ളത്. അല്ലെങ്കില്‍ എറണാകുളത്തോ വൈപ്പിനിലോ മത്സരിക്കാം.

മുഖ്യമന്ത്രിയുമായുള്ള കൂടിക്കാഴ്ചക്ക് പിന്നാലെ കെവി തോമസിനെ സിപിഎം എറണാകുളം ജില്ലാ സെക്രട്ടറി സ്വാഗതം ചെയ്തതും ഈ നീക്കത്തിന്റെ ഭാഗമായിരുന്നു. അടുത്ത ബന്ധുവിന് സീറ്റ് നല്‍കണമെന്ന് കെവി തോമസ് ആവശ്യപ്പെട്ടുവെന്നും കോണ്‍ഗ്രസ് നേതൃത്വം സൂചിപ്പിക്കുന്നുണ്ട്. കെവി തോമസിന്റെ സമ്മര്‍ദ്ദത്തിന് കീഴ്‌പ്പെടരുതെന്ന് ഒരു വിഭാഗം നേതാക്കളുടെ ഉറച്ച നിലപാടും ഒത്തു തീര്‍പ്പ് ശ്രമങ്ങള്‍ക്ക് തടസ്സമാകുന്നുണ്ട്.