സോളര്‍ പീഡനക്കേസ് സി.ബി.ഐയ്ക്ക് വിട്ടു; ഉമ്മന്‍ചാണ്ടിക്ക് തടയിടാന്‍ പിണറായിയുടെ തന്ത്രം; ഉമ്മന്‍ചാണ്ടി, കെ.സി.വേണുഗോപാല്‍, അടൂര്‍ പ്രകാശ്, എ.പി.അനില്‍കുമാര്‍, ഹൈബി ഈഡന്‍, അബ്ദുല്ലക്കുട്ടി എന്നിവര്‍ക്കെതിരെയാണ് പരാതി; ആറു കേസുകള്‍ സി.ബി.ഐക്ക് വിട്ടു
സോളര്‍ പീഡനക്കേസ് സി.ബി.ഐയ്ക്ക് വിടാന്‍ സര്‍ക്കാര്‍ തീരുമാനം. പരാതിക്കാരിയുടെ അപേക്ഷ പരിഗണിച്ചാണ് തീരുമാനം. സോളാര്‍ കേസ് യുഡിഎഫിനെതിരെ രാഷ്ട്രീയ ആയുധമാക്കുന്നതിനോട് സിപിഎമ്മില്‍ വിയോജിപ്പ് ഉള്ളതായി വാര്‍ത്തകള്‍ പുറത്തുവന്നിരുന്നു. സോളാര്‍ ഉയര്‍ത്തിക്കൊണ്ട് വരുന്നത് ഇടതുമുന്നണിക്ക് ഗുണകരമാവില്ലെന്നായിരുന്നു വിലയിരുത്തല്‍. ഇതെല്ലാം തള്ളിയാണ് സര്‍ക്കാര്‍ നീക്കം.
ഉമ്മന്‍ചാണ്ടി, കെ.സി.വേണുഗോപാല്‍, അടൂര്‍ പ്രകാശ്, എ.പി.അനില്‍കുമാര്‍, ഹൈബി ഈഡന്‍, അബ്ദുല്ലക്കുട്ടി എന്നിവര്‍ക്കെതിരെയാണ് മുഖ്യമന്ത്രിക്ക് പരാതി നല്‍കിയത്. ആറു കേസുകളാണ് സി.ബി.ഐക്ക് വിട്ടത്. സി.ബി.ഐക്ക് വിട്ടുകൊണ്ടുള്ള ഉത്തരവ് ഇന്നലെ പുറത്തിറങ്ങയിരുന്നു.
സര്‍ക്കാരിനെ തിരിഞ്ഞു കൊത്തുന്ന ആയുധങ്ങള്‍ ഒന്നും നിയമസഭ തിരഞ്ഞെടുപ്പില്‍ പ്രയോഗിക്കേണ്ടെന്നാണ് സിപിഎമ്മില്‍ ഉയര്‍ന്നിരുന്ന ചര്‍ച്ച. ഉമ്മന്‍ചാണ്ടി യുഡിഎഫിനെ നയിക്കാന്‍ എത്തുമ്പോള്‍ ആണ് സര്‍ക്കാരിന്റെ പുതിയ നീക്കം എന്നതും ശ്രദ്ധേയം. കേസ് സിബിഐക്ക് വിടണെന്ന് ആവശ്യപ്പെട്ട് സോളാര്‍ കേസിലെ ഇര മുഖ്യമന്ത്രിക്ക് കത്ത് നല്‍കിയിരുന്നു. അതിലാണ് ഇപ്പോള്‍ തീരുമാനം വന്നത്.
കഴിഞ്ഞ നാല് വര്‍ഷമായി സോളാര്‍ തട്ടിപ്പ് കേസും, പീഡനപ്പരാതികളിലെ അന്വേഷണവും ഇഴഞ്ഞു നീങ്ങുകയായിരുന്നു. നിര്‍ണായകമായ നിയമസഭാ തെരഞ്ഞെടുപ്പ് വരാനിരിക്കെയാണ് സോളാര്‍ പീഡനക്കേസുകള്‍ സിബിഐയ്ക്ക് വിടുന്നതെന്നതാണ് ഏറ്റവും ശ്രദ്ധേയമായ കാര്യം. വലിയ രാഷ്ട്രീയ കോളിളക്കം ഉണ്ടാക്കാന്‍ സാധ്യതയുള്ള നീക്കം. ഇത് പ്രതിപക്ഷം വലിയ ആയുധമാക്കുമെന്ന കാര്യത്തില്‍ സംശയമില്ല. ബിജെപിയും ഇത് ആരോപണങ്ങള്‍ക്ക് കുന്തമുനയാക്കും.
സര്‍ക്കാര്‍ എന്നാല്‍ ഈ കേസ് മുന്‍നിര്‍ത്തി പ്രതിപക്ഷത്തിനെതിരെ ആക്രമണം കടുപ്പിക്കുമെന്നും ഉറപ്പാണ്. സ്വര്‍ണക്കടത്ത് കേസിലും ഡോളര്‍ കടത്ത് കേസിലും അടക്കം കേന്ദ്ര ഏജന്‍സികളെ ബിജെപി രാഷ്ട്രീയമായി സിപിഎമ്മിനെതിരെ ഉപയോഗിക്കുന്നെന്ന് ആരോപണമുയര്‍ത്തിയ ഭരണപക്ഷത്തിനെതിരെ പ്രതിപക്ഷം സോളാര്‍ മുന്‍നിര്‍ത്തി ആരോപണം കടുപ്പിച്ചാല്‍ തിരികെ എന്താകും എല്‍ഡിഎഫിന്റെ പ്രതിരോധം എന്നതാണ് ഇനി കണ്ടറിയേണ്ടത്.
https://www.facebook.com/Malayalivartha
