ഷാർജ എന്റർപ്രണർഷിപ്പ് ഫെസ്റ്റിവലിൽ (SEF 2026) സെഫി സോഷ്യൽ ഇംപാക്ട് അവാർഡ് കാർബെലിം പ്രൈവറ്റ് ലിമിറ്റഡ് കരസ്ഥമാക്കി. കേരള സ്റ്റാർട്ടപ്പ് മിഷന്റെ യുണീക് ഐഡി സ്റ്റാർട്ടപ്പായ കാർബെലിം, ഐഐടി മദ്രാസ് ഇൻകുബേഷൻ സെൽ, ഐഐഎം ലഖ്‌നൗ എന്റർപ്രൈസ് ഇൻകുബേഷൻ സെന്റർ എന്നിവിടങ്ങളിൽ ഇൻകുബേറ്റ് ചെയ്തിട്ടുള്ള കാലാവസ്ഥാ-സാങ്കേതികവിദ്യ മേഖലയിലെ ഒരു ശ്രദ്ധേയ സ്ഥാപനമാണ്.

വ്യാവസായിക മേഖലകളിൽ നിന്നുള്ള കാർബൺ ബഹിർഗമനം ഫലപ്രദമായി കുറയ്ക്കുന്നതിനായി കാർബെലിം പ്രകൃതിദത്ത കാർബൺ ക്യാപ്ചർ പരിഹാരമാർഗ്ഗങ്ങൾ വികസിപ്പിച്ചിരിക്കുന്നു. ഇവർ ഗവേഷണത്തിലൂടെ രൂപകൽപ്പന ചെയ്ത പതിനൊന്ന് ഇനം സൂക്ഷ്മ ആൽഗകളുടെ പ്രത്യേക മിശ്രിതം അന്തരീക്ഷത്തിലെ കാർബൺ ഡൈഓക്‌സൈഡ് കാര്യക്ഷമമായി ആഗിരണം ചെയ്ത് ശുദ്ധ ഓക്‌സിജൻ പുറത്തുവിടുന്നു. ഇതോടൊപ്പം, ആരോഗ്യത്തിന് ഗുരുതര ഭീഷണി ഉയർത്തുന്ന പി.എം 2.5, പി.എം 10, നൈട്രജൻ ഓക്‌സൈഡുകൾ, സൾഫർ ഓക്‌സൈഡുകൾ തുടങ്ങിയ അന്തരീക്ഷ മലിനീകരണ ഘടകങ്ങളെ ഫിൽട്ടർ ചെയ്യാനും ഈ സാങ്കേതികവിദ്യ സക്ഷമമാണ്.

കെട്ടിടങ്ങളുടെ ഉൾഭാഗത്തും പുറത്തും ഒരുപോലെ ഘടിപ്പിക്കാൻ കഴിയുന്ന ഈ ഉപകരണത്തിന് പേറ്റന്റ് അപേക്ഷ സമർപ്പിച്ചിട്ടുണ്ട്. 'കാർബെലിം ബയോമിമെറ്റിക് ഫസേഡ്' എന്നറിയപ്പെടുന്ന ലിവിങ് വാൾ സിസ്റ്റം, ആർട്ടിഫിഷ്യൽ ഇന്റലിജൻസ്, ഇന്റർനെറ്റ് ഓഫ് തിങ്‌സ് (IoT) സാങ്കേതികവിദ്യകൾ ഉൾക്കൊള്ളിച്ചുകൊണ്ട് തത്സമയ നിരീക്ഷണം ഉറപ്പ് നൽകുന്നു.

യു.എ.ഇ. യൂണിവേഴ്‌സിറ്റിയിൽ നിന്ന് 'നേച്ചർ-ബേസ്ഡ് കാർബൺ സീക്വസ്‌ട്രേഷൻ' വിഷയത്തിൽ പിഎച്ച്ഡി നേടിയ ഡോ. കാർത്തിക ഗോപിയാണ് കാർബെലിമിന്റെ സ്ഥാപക. കൊച്ചി ശാസ്ത്ര സാങ്കേതിക സർവ്വകലാശാലയിൽ (കുസാറ്റ്) മറൈൻ ബയോളജിയിൽ റാങ്ക് ജേതാവായ ഇവർക്ക് ആൽഗൽ ബയോടെക്‌നോളജി മേഖലയിൽ ഒരു ദശാബ്ദത്തിലേറെ പ്രവൃത്തിപരിചയമുണ്ട്. ഡെൻഡ്ര സിസ്റ്റംസ് ഉൾപ്പെടെ ലോകത്തിലെ പ്രമുഖ സ്ഥാപനങ്ങളിൽ കാർബൺ സയന്റിസ്റ്റായി പ്രവർത്തിച്ചിട്ടുള്ള ഇവർ, യൂറോപ്പ്, ഗൾഫ് മേഖലകളിൽ കാലാവസ്ഥ വ്യതിയാന നിയന്ത്രണത്തിനായുള്ള നിരവധി പൈലറ്റ് പ്രോജക്ടുകൾക്ക് നേതൃത്വം നൽകിയിട്ടുണ്ട്.

വ്യവസായ ശാലകളിൽ നിന്ന് പുറന്തള്ളുന്ന ഫ്ലൂ ഗ്യാസ് ശുദ്ധീകരണവും ജലസംസ്‌കരണ പ്രക്രിയകളും സംയോജിപ്പിച്ചുകൊണ്ട്, ഈ ദ്വിതീയ ഉൽപ്പന്നമായ മൈക്രോആൽഗ ബയോമാസിനെ ഇഞ്ചിനിയേർഡ് ബയോചാറായി രൂപാന്തരപ്പെടുത്തുകയാണ് കാർബെലിം ചെയ്യുന്നത്. ഈ ബയോചാർ, ആഗോള കാർബൺ ക്രെഡിറ്റ് വിപണിയിൽ അന്താരാഷ്ട്ര നിലവാരമുള്ള കാർബൺ ക്രെഡിറ്റ് ആയി പരിവർത്തനം ചെയ്യപ്പെടുന്നു. ഇതിലൂടെ, മലിനീകരണം ഒരു ബാധ്യതയായി കണ്ടിരുന്ന വ്യവസായ സ്ഥാപനങ്ങൾക്ക് സ്വന്തം ഉദ്‌വമനത്തിൽ നിന്ന് തന്നെ ഒരു ദീർഘകാല വരുമാന സ്രോതസ്സ് ഉണ്ടാക്കാൻ കഴിയുന്ന ഒരു പുതിയ ഹരിത-ബിസിനസ് മാതൃക കാർബെലിം മുന്നോട്ടു വെക്കുന്നു. ഇതിനൊപ്പം, കാർബെലിം ഇപ്പോൾ തമിഴ്‌നാട് കൃഷി സർവ്വകലാശാലയുമായി (TNAU) സഹകരിച്ച്, ഇവരുടെ പേറ്റന്റ് ചെയ്ത മൈക്രോആൽഗ കൺസോർഷ്യം ഉപയോഗിച്ചുള്ള ബയോ-സ്റ്റിമുലന്റ് ഫീൽഡ് ട്രയലുകൾ ആരംഭിച്ചിരിക്കുന്നു. സസ്യ വേരുകളുടെ ആരോഗ്യവും വളർച്ചയും ഉത്തേജിപ്പിക്കുക (Root Enhancement) എന്ന ലക്ഷ്യത്തോടെ നടത്തുന്ന ഈ ഗവേഷണം, ജൈവ കൃഷിയും കാർബൺ ഇക്കോണമിയും തമ്മിൽ ഒരു ചരിത്രപ്രധാന പാലം നിർമ്മിക്കുന്നതാണ്.

വേൾഡ് ഫിൽട്രേഷൻ ഇൻസ്റ്റിറ്റ്യൂട്ടിന്റെ 2025-ലെ ‘പ്രൊഡക്ട് ഓഫ് ദ ഇയർ’ അവാർഡ്, എം.ഐ.ടി. സോൾവ് ഗ്ലോബൽ ചലഞ്ചിലെ ഫൈനലിസ്റ്റ് അംഗീകാരം, കൂടാതെ സ്റ്റാർട്ടപ്പ് ഇന്ത്യ സുസ്ഥിരതാ ചലഞ്ചിൽ ഇരുപത് ലക്ഷം രൂപയുടെ വിജയി ബഹുമതി എന്നിവ ഇതിനുമുമ്പ് തന്നെ കാർബെലിം സ്വന്തമാക്കിയിട്ടുണ്ട്.