നോക്കണേ മൂന്നാല് മാസം ഈ അന്വേഷണ ഏജന്‍സികള്‍ എന്തൊരു ഉറക്കത്തിലായിരുന്നു. പ്രധാനമന്ത്രിക്ക് മുഖ്യമന്ത്രി കത്തെഴുതിയതോടെ എല്ലാ കേസും അവസാനിച്ചെന്നാണ് എല്ലാവരും കരുതിയത്.

എന്നാല്‍ കേന്ദ്ര ധനകാര്യ മന്ത്രി നിര്‍മ്മല സീതാറാം വന്നതിന് ശേഷമാണ് അന്വേഷണ സംഘത്തിന് പശ്ചാത്താപം തോന്നിയത്. മാത്രമല്ല കേന്ദ്ര ആഭ്യന്തര മന്ത്രി അമിത്ഷാ വരുന്നതിന് മുമ്പ് അവര്‍ ഉണര്‍ന്നെണീക്കുകയും ചെയ്തു. അമിത്ഷായുടെ കേരള വരവിന് തൊട്ട് മുമ്പ് കസ്റ്റംസ് നടത്തിയ നീക്കം ഷായ്ക്ക് ഗോളടിക്കാന്‍ വല വിരിക്കുന്നത് പോലെയായി.

അമിത് ഷാ ഇന്ന് തലസ്ഥാനത്ത് എത്തുകയാണ്. ബിജെപി സംസ്ഥാന പ്രസിഡന്റ് കെ. സുരേന്ദ്രന്‍ നയിക്കുന്ന വിജയയാത്രയുടെ സമാപനസമ്മേളനം ഉദ്ഘാടനം ചെയ്യാനാണ് അമിത്ഷാ തിരുവനന്തപുരത്ത് എത്തുന്നത്. ശംഖുമുഖം കടപ്പുറത്ത് നാളെ വൈകിട്ട് 5.30ന് നടക്കുന്ന സമാപന സമ്മേളനത്തില്‍ ആയിരങ്ങള്‍ അണിനിരക്കും. വിവിധ പരിപാടികളില്‍ പങ്കെടുത്ത ശേഷമായിരിക്കും വിജയയാത്രയുടെ വേദിയില്‍ അമിത്ഷാ എത്തുക.

ഇന്ന് വൈകിട്ട് 10.30ന് പ്രത്യേക വിമാനത്തില്‍ തിരുവനന്തപുരം വിമാനത്താവളത്തിലെത്തുന്ന കേന്ദ്ര ആഭ്യന്തരമന്ത്രി അമിത് ഷാ നാളെ രാവിലെ റോഡുമാര്‍ഗം കന്യാകുമാരിയിലേക്ക് പോകും. കന്യാകുമാരി ലോക്‌സഭാ മണ്ഡലത്തിലെ ഉപതെരഞ്ഞെടുപ്പ് പ്രചാരണ പരിപാടികളിലും തമിഴ്‌നാട് നിയമസഭാ തെരഞ്ഞെടുപ്പ് പ്രചാരണത്തിലും അദ്ദേഹം പങ്കെടുക്കും.

നാളെ ഉച്ച തിരിഞ്ഞ് 3.50ന് തലസ്ഥാനത്ത് മടങ്ങിയെത്തി നാലു മണിക്ക് ശ്രീരാമകൃഷ്ണ മഠത്തില്‍ നടക്കുന്ന സന്യാസി സംഗമത്തില്‍ പങ്കെടുക്കും. വിജയയാത്രയുടെ ഉദ്ഘാടനത്തിന് ശേഷം ബിജെപി കോര്‍ കമ്മിറ്റി യോഗത്തില്‍ പങ്കെടുത്ത ശേഷമാണ് വിജയ യാത്രയില്‍ പങ്കെടുക്കുക.

വൈകിട്ട് 5.30ന് ശംഖുമുഖം കടപ്പുറത്ത് നടക്കുന്ന വിജയയാത്രയുടെ സമാപനസമ്മേളനം കേന്ദ്ര ആഭ്യന്തര മന്ത്രി അമിത്ഷാ ഉദ്ഘാടനം ചെയ്യും.

കേന്ദ്ര പാര്‍ലമെന്ററികാര്യ മന്ത്രി പ്രഹ്ലാദ് ജോഷി, വിദേശകാര്യ സഹമന്ത്രി വി. മുരളീധരന്‍, സംഘടനാ ജനറല്‍ സെക്രട്ടറി ബി.എല്‍. സന്തോഷ്, ദേശീയ വൈസ് പ്രസിഡന്റ് എ.പി. അബ്ദുള്ളക്കുട്ടി, ദേശീയ നിര്‍വാഹകസമിതി അംഗം പി.കെ. കൃഷ്ണദാസ്, കര്‍ണാടക ഉപമുഖ്യമന്ത്രി അശ്വഥ് നാരായണ്‍, കേരള പ്രഭാരി സി.പി. രാധാകൃഷ്ണന്‍, കര്‍ണാടക ചീഫ് വിപ്പ് സുനില്‍കുമാര്‍ എംഎല്‍എ, സുരേഷ് ഗോപി എംപി, ഒ. രാജഗോപാല്‍ എംഎല്‍എ, കുമ്മനം രാജശേഖരന്‍ എന്നിവര്‍ പങ്കെടുക്കും. രാത്രി 10.30ഓടെ അമിത് ഷാ തിരിച്ചുപോകും.

അമിത്ഷായുടെ മുഖ്യ പ്രചരണായുധമായിരിക്കും സ്വര്‍ണക്കടത്തും ഡോളര്‍ കടത്തും. നേരത്തെ ബിജെപി നടത്തിയ സമരത്തില്‍ വലിയ മേല്‍കൈ നേടിയിരുന്നു. അതേസമയം ഡോളര്‍ കടത്ത് കേസിലെ സ്വപ്‌ന സുരേഷിന്റെ രഹസ്യമൊഴി നിയമസഭാ തെരഞ്ഞെടുപ്പില്‍ പ്രതിപക്ഷത്തിനു പ്രതീക്ഷ പകര്‍ന്നിട്ടുണ്ട്. ഇതുവരെ മുഖ്യമന്ത്രിയുടെ ഓഫീസായിരുന്നു സംശയനിഴലിലെങ്കില്‍ ഇപ്പോള്‍ സാക്ഷാല്‍ മുഖ്യമന്ത്രിക്കെതിരേയാണു കേന്ദ്ര ഏജന്‍സികളുടെ നീക്കം. തുടര്‍ഭരണം ലക്ഷ്യമിട്ടു നീങ്ങുന്ന ഇടതുമുന്നണിക്ക് പ്രഹരമേല്‍പ്പിക്കുന്ന നീക്കമാണു കസ്റ്റംസിന്റെ ഭാഗത്തുനിന്നുണ്ടായത്.

സ്വപ്‌നയുടെ മൊഴിയില്‍ പ്രതിരോധത്തിലാകുന്നതോടെ, വികസനത്തില്‍ ഊന്നിയുള്ള ഇടതുമുന്നണി പ്രചാരണത്തിനു മങ്ങലേല്‍ക്കുമെന്നു യു.ഡി.എഫ്. കരുതുന്നു. കിഫ്ബിക്കെതിരേ ഇ.ഡി. കേസുമായി രംഗത്തുവന്നപ്പോള്‍ ആ വിഷയം ഏറ്റെടുക്കാന്‍ യു.ഡി.എഫ്. മടിച്ചിരുന്നു.

എന്നാല്‍, ഡോളര്‍ കടത്ത് കേസ് പ്രതിപക്ഷം മുഖ്യപ്രചാരണ വിഷയമാക്കുമെന്നാണു സൂചന. തുടര്‍ഭരണം ലക്ഷ്യമിടുന്ന ഇടതുമുന്നണിക്കാകട്ടെ മുഖ്യമന്ത്രിയെത്തന്നെ കേന്ദ്ര ഏജന്‍സികള്‍ പ്രതിക്കൂട്ടിലാക്കുന്നതു വെല്ലുവിളിയാകും. അതുകൊണ്ടുതന്നെ പ്രതിരോധത്തിനു പകരം പ്രത്യാക്രമണത്തിനാണു സി.പി.എം. തയാറെടുക്കുന്നത്. കേന്ദ്രസര്‍ക്കാരിന്റെ നിര്‍ദേശപ്രകാരം തെരഞ്ഞെടുപ്പിനായി തയാറാക്കിയ തിരക്കഥയാണിതെന്നു സി.പി.എം. ആരോപിക്കുന്നു. പ്രതിപക്ഷം ഡോളര്‍ കടത്ത് കേസ് പ്രചാരണായുധമാക്കിയാലും വികസനത്തില്‍ ഊന്നിയുള്ള പ്രചാരണവുമായി മുന്നോട്ടുപോയാല്‍ മതിയെന്നാണ് ഇടതുമുന്നണിയിലെ ധാരണ.