ഇന്ത്യന്‍ ഓഹരി വിപണിയില്‍ മുന്നേറ്റം. വ്യാപാരത്തിന്റെ തുടക്കത്തില്‍ തന്നെ സെന്‍സെക്‌സ് 500ലധികം പോയിന്റ് ആണ് മുന്നേറിയത്. നിലവില്‍ 77,500ന് മുകളിലാണ് സെന്‍സെക്‌സ്. നിഫ്റ്റി 24,200 എന്ന സൈക്കോളജിക്കല്‍ ലെവലിന് മുകളിലാണുള്ളത്. വിലക്കയറ്റ സമ്മര്‍ദ്ദം കുറഞ്ഞതോടെ അമേരിക്കന്‍ വിപണിയിലുണ്ടായ ഉണര്‍വാണ് ഇന്ത്യ അടക്കമുള്ള വിപണികളില്‍ പ്രതിഫലിച്ചത്.

വിലക്കയറ്റം കുറഞ്ഞതോടെ ഉടന്‍ തന്നെ അമേരിക്കന്‍ കേന്ദ്രബാങ്ക് പലിശനിരക്ക് കൂട്ടാന്‍ തയ്യാറായേക്കില്ലെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ഇതാണ് പ്രധാനമായി ആഗോള വിപണികളെ സ്വാധീനിച്ചത്. ഇത് ഇന്ത്യന്‍ വിപണിയിലും പ്രതിഫലിക്കുകയായിരുന്നു.

പലിശനിരക്ക് വർദ്ധിപ്പിച്ചിരുന്നെങ്കിൽ ഡോളര്‍ ശക്തിയാര്‍ജിക്കാനും ഇന്ത്യന്‍ വിപണിയില്‍ നിന്നുള്ള വിദേശ നിക്ഷേപത്തിന്റെ പുറത്തേയ്ക്കുള്ള ഒഴുക്കിനും കാരണമാകുമായിരുന്നു. എന്നാല്‍ താത്കാലികമായി ഈ പ്രതിസന്ധി ഒഴിഞ്ഞതാണ് ഇന്ത്യന്‍ വിപണിക്ക് കരുത്തേകിയത്.