ഇടതു സര്‍ക്കാരിന്റെ സ്വപ്ന പദ്ധതിയായ എരുമേലി ശബരി വിമാനത്താവളം ഇല്ലാതാക്കാന്‍ ബിജെപിയും കേന്ദ്രസര്‍ക്കാരും നടത്തിയിരിക്കുന്നത് എട്ടിന്റെ പണി. വിമാനത്താവളത്തിനുള്ള സ്ഥലം സംബന്ധിച്ച കോടതി വ്യവഹാരം നടന്നുകൊണ്ടിരിക്കെയാണ് ആദായനികുതി വകുപ്പിന്റെ ജപ്തി നടപടിയുണ്ടായിരിക്കുന്നത്.

വിദേശ പണമിടപാട് നിയമലംഘനത്തിന്റെ പേരില്‍ ബിലീവേഴ്‌സ് ചര്‍ച്ചിന്റെ ഉടമസ്ഥതയിലുളള ചെറുവള്ളി എസ്റ്റേറ്റ് ആദായനികുതി വകുപ്പ് കണ്ടുകെട്ടി. 500 കോടി രൂപയോളം നികുതി വരുമെന്നതിനാല്‍ മുന്‍കരുതല്‍ നടപടിയെന്ന നിലയിലാണ് ബിലീവേഴ്‌സ് ചര്‍ച്ചിന്റെ ആസ്തിവകകള്‍ ആദായനികുതി വകുപ്പ് കണ്ടുകെട്ടുന്നത്.

കെപി യോഹന്നാന്‍ മെത്രാപ്പോലീത്തായ്ക്ക് തിരുവല്ലയില്‍ ബിലീവേഴ്സ് ചര്‍ച്ച് മെഡിക്കല്‍ കോളജും തിരുവല്ലയില്‍ സഭയുടെ ആസ്ഥാന മന്ദിരവും കെട്ടിടങ്ങളുമുണ്ടാക്കിയിരിക്കെ അതൊന്നും ജപ്തി ചെയ്യാതെ വിമാനത്താവളം പണിയാന്‍ കണ്ടുവെച്ച സ്ഥലം ജപ്തി ചെയ്തതില്‍ ദുരൂഹതയേറെ.
ബിലീവേഴ്സ് ചര്‍ച്ചും ബിജെപി സര്‍ക്കാരും ചേര്‍ന്നുള്ള ഒത്തുകളിയാണോ ജപ്തിനീക്കത്തിനു പിന്നിലെന്നു സംശയിക്കണം. നിലവിലെ സാഹചര്യത്തില്‍ എരുമേലിയില്‍ വിമാനം പറന്നിറങ്ങാനുള്ള സാധ്യതയ്ക്കാണ് മങ്ങലേറ്റിരിക്കുന്നത്.



ഇതോടെ ചെറുവള്ളി എസ്റ്റേറ്റിലെ നിര്‍ദിഷ്ട വിമാനത്താവളം പണി അനിശ്ചിതത്വത്തിലായിരിക്കുകയാണ്. നികുതികുടിശിക അടച്ചില്ലങ്കില്‍ ചെറുവള്ളി എസ്റ്റേറ്റ് കേന്ദ്രസര്‍ക്കാരിന്റെ കൈയിലാകുന്നതോടെ വിമാനത്താവള പദ്ധതിയും അവതാളത്തിലാകും.

ശബരിമല വിമാനത്താവള പദ്ധതി പ്രദേശം കൂടി ഉള്‍പ്പെട്ട 2000 ഏക്കര്‍ ഭൂമിയാണ് ആദായ നികുതി വകുപ്പ് കണ്ടുകെട്ടിയത്. ബിഷപ് കെപി യോഹന്നാന്‍ ഇപ്പോള്‍ അമേരിക്കയിലെ ടെക്‌സസിലെ ഗോസ്പല്‍ ഫോര്‍ ഏഷ്യ ആസ്ഥാനത്ത് കഴിയുകയാണ്.



ആറായിരം കോടി അനധികൃത വിദേശ സഹായം കൈപ്പറ്റിയ സംഭവത്തില്‍ മൊഴിയെടുപ്പിന് ഹാജരാകാന്‍ ആദായ നികുതി വകുപ്പ് ഉദ്യോഗസ്ഥര്‍ ബിഷപ് യോഹന്നാന് നോട്ടീസ് അയച്ചിരുന്നു.

യാത്ര ചെയ്യാന്‍ സാധിക്കാത്ത അവസ്ഥയാണെന്നും ഡിസംബര്‍ ആദ്യവാരത്തോടെ മൊഴിയെടുപ്പിന് എത്താമെന്നും വ്യക്തമാക്കി ഡെപ്യൂട്ടി ഡയറക്ടര്‍ ജനറല്‍ ഓഫ് ഇന്‍കം ടാക്‌സിന് കെ പി യോഹന്നാന്‍ നോട്ടീസ് അയച്ചിരുന്നു. ബിലീവേഴ്‌സ് ചര്‍ച്ചിന്റെ പല സ്ഥാപനങ്ങളില്‍ നിന്നും കണക്കില്‍പ്പെടാത്ത പണവും സാമ്പത്തിക ഇടപാടിനെക്കുറിച്ചുള്ള രേഖകളും റെയ്ഡില്‍ കണ്ടെത്തിയിരുന്നു. കെ പി യോഹന്നാന്റെ വീട്ടിലും ആദായ നികുതി വകുപ്പ് പരിശോധന നടത്തിയിരുന്നു. ചാരിറ്റി സ്ഥാപനങ്ങളുടെ മറവില്‍ വിദേശത്ത് നിന്ന് വന്ന ഫണ്ട് വ്യാപകമായി വകമാറ്റിയതായും പരിശോധനയില്‍ കണ്ടെത്തിയിരുന്നു.

ഹാരിസണ്‍ പ്ലാന്റേഷനില്‍ നിന്ന് സ്വന്തമാക്കിയ സര്‍ക്കാര്‍ ഭൂമിയുടെ ഉടമസ്ഥാവകാശം സംബന്ധിച്ച് അന്തിമവിധിയുണ്ടാകുന്നതിന് മുമ്പ് തന്നെ ബിലീവേഴ്സ് ചര്‍ച്ചിന്റെ കൈവശമുള്ള ചെറുവള്ളി എസ്റ്റേറ്റിന് കോടതിയില്‍ സര്‍ക്കാര്‍ കെട്ടിവയ്ക്കേണ്ട തുകയിലും ധാരണയായിരുന്നു. 570 കോടി രൂപയാണ് ഭൂമി വില കണക്കാക്കുന്നത്.

ഗോസ്പല്‍ ഫോര്‍ ഏഷ്യ കൈവശം വച്ചിരിക്കുന്ന ഭൂമിയുടെ ഉടമസ്ഥാവകാശം അവര്‍ക്കു തന്നെയെന്ന് വിധി വന്നാല്‍ പോലും കേരള ലാന്‍ഡ് റിഫോര്‍മ്സ് ആക്ട് പ്രകാരം മാത്രമേ വില നിശ്ചയിക്കാനാവൂ. സ്വകാര്യ വ്യക്തിക്കു കൈവശം വയ്ക്കാവുന്ന ഭൂപരിധിയായ 15 ഏക്കര്‍ കഴിഞ്ഞുള്ള വസ്തുവിന് മിച്ചഭൂമി ഏറ്റെടുക്കല്‍ പ്രകാരം തുച്ഛമായ വില മാത്രമേ നല്‍കേണ്ടതുള്ളൂ.

തോട്ടഭൂമിക്ക് ലഭിക്കുന്ന ഇളവുകള്‍ പ്രകാരം ഭൂമി കൈവശം വയ്ക്കുമ്പോള്‍ ആ ആവശ്യത്തിനു മാത്രമേ ഭൂമി ഉപയോഗിക്കാനാവൂ. ഈ സാഹചര്യത്തിലാണ് ചെറുവള്ളി എസ്റ്റേറ്റ് പൂര്‍ണമായി ജപ്തി ചെയ്തുകൊണ്ടുള്ള ഉത്തരവ് വന്നിരിക്കുന്നത്. 2025ല്‍ എരുമേലി വിമാനത്താവളം പണി പൂര്‍ത്തിയാക്കാനുള്ള നീക്കം മുടങ്ങിയതോടെ മധ്യകേരളത്തിന്റെ വിമാന യാത്രാസ്വപ്നമാണ് ചിറകറ്റ് വീഴുന്നത്.