കസ്റ്റംസ് പ്രിവന്റീവ് വീണ്ടും കേരളരാഷ്ട്രീയത്തെ പിടിച്ചുകുലുക്കി. ജൂലൈ 3 നു നയതന്ത്ര ബാഗേജ് സ്വര്‍ണക്കടത്തു കേസിലൂടെ കുടത്തിലെ ഭൂതത്തെ തുറന്നുവിട്ട കസ്റ്റംസ്, ഡോളര്‍ കടത്തു കേസില്‍ നിര്‍ണായക വിവരങ്ങള്‍ കോടതിയില്‍ സമര്‍പ്പിച്ചാണ് വീണ്ടും ശ്രദ്ധ നേടിയത്.

സ്വര്‍ണം പിടികൂടിയതു കസ്റ്റംസ് ആണെങ്കിലും എന്‍ഐഎ, ഇഡി, ആദായനികുതി വകുപ്പ്, സിബിഐ എന്നീ ഏജന്‍സികളെല്ലാം സ്വര്‍ണക്കടത്തും അനുബന്ധ കേസുകളും അന്വേഷിക്കുകയും ആഴ്ചകളോളം പ്രതികളെ ചോദ്യം ചെയ്യുകയും ചെയ്തിരുന്നു. അന്വേഷണത്തിനിടെ, സ്വപ്നയും സരിത്തും നല്‍കിയ മൊഴിയില്‍ നിന്നു ഡോളര്‍ കടത്തു കേസ് പിറന്നതോടെ സംഭവങ്ങളുടെ ഗതിമാറി.

ഒക്ടോബര്‍ 15ന് ആണ് ഈ കേസിന്റെ ഒക്കറന്‍സ് റിപ്പോര്‍ട്ട് കസ്റ്റംസ് കോടതിയില്‍ സമര്‍പ്പിക്കുന്നത്. മുന്‍ കോണ്‍സല്‍ ജനറല്‍ ജമാല്‍ അല്‍സാബിയടക്കം യുഎഇ കോണ്‍സുലേറ്റിലെ മുന്‍ ഉദ്യോഗസ്ഥര്‍ക്കെതിരായ നിര്‍ണായക വെളിപ്പെടുത്തലും ഈ റിപ്പോര്‍ട്ടിലൂടെയാണു പുറത്തു വന്നത്. ഒടുവില്‍, നവംബറില്‍ കസ്റ്റംസ് കസ്റ്റഡിയിലിരിക്കെ സ്വപ്നയും സരിത്തും നല്‍കിയ മൊഴികളെ അടിസ്ഥാനമാക്കി, സാമ്പത്തിക കുറ്റവിചാരണക്കോടതി നടത്തിയ 'വമ്പന്‍ സ്രാവുകള്‍' പരാമര്‍ശം വിവാദങ്ങള്‍ക്കു വഴിമരുന്നിട്ടു.

തുടര്‍ന്നാണു സ്വപ്നയുടെയും സരിത്തിന്റെയും രഹസ്യമൊഴി എറണാകുളം ഒന്നാം ക്ലാസ് മജിസ്‌ട്രേട്ട് (3) രേഖപ്പെടുത്തിയത്. അട്ടക്കുളങ്ങര ജയിലില്‍ തനിക്കു സുരക്ഷാഭീഷണിയുണ്ടെന്ന സ്വപ്നയുടെ പരാതിയും ജയില്‍ അധികൃതരുടെ നിഷേധവും സ്വപ്നയുടെ ശബ്ദരേഖയും അടക്കമുള്ള വിവാദങ്ങളും ഇതിനിടെ ഉയര്‍ന്നു.

ഡോളര്‍ കേസില്‍ ഉന്നതര്‍ക്കു പങ്കുണ്ടെന്ന വാര്‍ത്തകള്‍ വിവാദമുയര്‍ത്തുന്നതിനിടെ, നിയമസഭാ സ്പീക്കര്‍ പി. ശ്രീരാമകൃഷ്ണന്റെ അഡീഷനല്‍ പ്രൈവറ്റ് സെക്രട്ടറിയെ കസ്റ്റംസ് ചോദ്യം ചെയ്തു. ഇതിനു ശേഷം, മസ്‌കത്തില്‍ വിദ്യാഭ്യാസ സ്ഥാപനമുടമയായ പ്രവാസി മലയാളിയെയും പൊന്നാനി സ്വദേശിയെയും ചോദ്യം ചെയ്തുവെങ്കിലും തുടര്‍ നടപടികളുണ്ടായില്ല. ഇതും ആരോപണങ്ങള്‍ക്കു വഴിവച്ചിരിക്കെയാണു ഹൈക്കോടതിയില്‍ വെളിപ്പെടുത്തലുകളുമായി കസ്റ്റംസ് വീണ്ടുമെത്തിയത്.

മാര്‍ച്ച് 12ന് കൊച്ചിയിലെ കസ്റ്റംസ് ഓഫീസില്‍ ഹാജരാകാന്‍ ആവശ്യപ്പെട്ടാണ് നോട്ടീസ് നല്‍കിയിരിക്കുന്നത്. കേസുമായി ബന്ധപ്പെട്ട് സ്പീക്കറുടെ പ്രൈവറ്റ് സെക്രട്ടറിയെ കസ്റ്റംസ് ചോദ്യം ചെയ്തിരുന്നു.

ഡോളര്‍ കടത്ത് കേസില്‍ പ്രതികളായ സ്വപ്ന സുരേഷ്, പി.എസ്. സരിത്ത് എന്നിവര്‍ നല്‍കിയ മൊഴിയില്‍ സ്പീക്കര്‍ ശ്രീരാമകൃഷ്ണനെ കുറിച്ച് പരാമര്‍ശിക്കുന്നുണ്ട്. ഇതിന്റെ അടിസ്ഥാനത്തില്‍ കേസില്‍ കൂടുതല്‍ വ്യക്തത വരുത്തുന്നതിനാണ് സ്പീക്കറെ ചോദ്യം ചെയ്യാനായി ഒരുങ്ങുന്നത്. സ്വപ്നയുടെ രഹസ്യമൊഴിയിലും സ്പീക്കറെക്കുറിച്ച് വ്യക്തമായി പരാമര്‍ശിക്കുന്നുണ്ട്.  

ഡോളര്‍ കടത്ത് കേസുമായി ബന്ധപ്പെട്ട്  സ്പീക്കര്‍ ശ്രീരാമകൃഷ്ണന്റെ സുഹത്തും വിദേശ വ്യവസായിയും മസ്‌കറ്റിലെ മിഡില്‍ ഈസ്റ്റ് കോളെജ് ഉടമയുമായ ലഫീര്‍ മുഹമ്മദിനെ കസ്റ്റംസ് ചോദ്യം ചെയ്തിരുന്നു. വിദേശത്തേക്ക് കടത്തിയ ഡോളര്‍ ഇദ്ദേഹത്തിന്റെ കോളെജിന് വേണ്ടിയാണ് ഉപയോഗിച്ചതെന്നും പറയപ്പെടുന്നു.

  വിദേശത്തേക്ക് നയതന്ത്രചാനല്‍ വഴി ഡോളര്‍ കടത്തിയ കേസില്‍ പ്രതിസ്ഥാനത്തുള്ള ഈജിപ്തിലെ പൗരനില്‍ നിന്നും ലഫീര്‍ മുഹമ്മദ് ഡോളര്‍ വാങ്ങിയതായി കണ്ടെത്തിയിട്ടുണ്ട്. നേരത്തെ ശിവശങ്കര്‍ സ്വപ്നയെ ലഫീര്‍ മുഹമ്മദിന്റെ ഉടമസ്ഥതയിലുള്ള വിദ്യാഭ്യാസസ്ഥാപനത്തില്‍ ജോലിക്ക് കയറ്റാന്‍ ശ്രമിച്ചിരുന്നതായി വാര്‍ത്തയുണ്ടായിരുന്നു.

തൊഴിലിനായി സ്വപ്ന ഇവിടെ ഒരു അഭിമുഖത്തില്‍ പങ്കെടുത്തതായും പറയപ്പെടുന്നു.. അതായത് ശിവശങ്കറിനും ഈ വ്യവസായിയുമായി ഉറ്റബന്ധമുണ്ടായിരുന്നെന്ന വസ്തുതയിലേക്കാണ് ഇത് വിരല്‍ചൂണ്ടുന്നത്.

ഇദ്ദേഹം മസ്‌കറ്റില്‍ ആരംഭിക്കാനിരുന്ന വിദ്യാഭ്യാസസ്ഥാപനത്തില്‍ കേരളത്തിലെ പല ഉന്നതര്‍ക്കും ബിനാമി നിക്ഷേപമുണ്ടെന്നും ആരോപണമുണ്ട്. സ്പീക്കറുടെ സുഹൃത്ത് നാസറും ഇതില്‍ പങ്കാളിയാണ്.

സ്പീക്കര്‍ ഉപയോഗിച്ചിരുന്നു നാല് ഫോണുകളില്‍ ഒന്നിലെ സിം നാസറിന്റേതാണെന്നും കണ്ടെത്തിയിരുന്നു.  സ്പീക്കറുടെ അടിക്കടിയുള്ള ഗള്‍ഫ് യാത്രകളും സംശയത്തിന്റെ നിഴലിലാണ്.