നിയമസഭ തിരഞ്ഞെടുപ്പില്‍ ഉപയോഗിക്കുന്നത് പുതിയ സാങ്കേതിക വിദ്യയുള്ള എം 3 വോട്ടിംഗ് മെഷീനുകള്‍. യന്ത്ര തകരാര്‍ സ്വയം കണ്ടെത്താന്‍ സാധിക്കുമെന്നതാണ് എം 3 മെഷീനിന്റെ പ്രത്യേകത.

ബാറ്ററി നില മെഷീനില്‍ ഡിസ്പ്ലേ ചെയ്യുന്നതുവഴി പ്രിസൈഡിംഗ് ഓഫീസര്‍ക്ക് ചാര്‍ജിംഗ് നില അറിയാനും പെട്ടെന്നുതന്നെ തകരാറുകള്‍ പരിഹരിക്കാനും കഴിയും. എം 3 മെഷീനുകളില്‍ ബാറ്ററിയുടെ ഭാഗവും കാന്‍ഡിഡേറ്റ് സെറ്റ് കമ്പാര്‍ട്ട്മെന്റും പ്രത്യേകമാണ് ക്രമീകരിച്ചിരിക്കുന്നത്.

ബാറ്ററി തകരാറിലായാല്‍ മെഷീന്‍ പൂര്‍ണമായി മാറ്റേണ്ടി വരില്ല. പകരം ബാറ്ററിയുടെ ഭാഗം തുറന്ന് പുതിയത് സ്ഥാപിക്കാം. യന്ത്രതകരാര്‍ മൂലം ബൂത്തുകളില്‍ ഉണ്ടാകുന്ന സമയം നഷ്ടം പരിഹരിക്കാന്‍ ഇതിലൂടെ കഴിയും. കനം കുറഞ്ഞതും കൈകാര്യം ചെയ്യാന്‍ എളുപ്പമുള്ളതുമാണ് എം 3 മെഷീനുകള്‍.

കൂടാതെ പോളിംഗില്‍ കൂടുതല്‍ കൃത്യതയും സുതാര്യതയും ഉറപ്പാക്കാനാകും. മെഷീനില്‍ ഒരേസമയം നോട്ടയുള്‍പ്പെടെ 384 സ്ഥാനാര്‍ത്ഥികളുടെ പേരും ചേര്‍ക്കാം. നേരത്തെ ഉപയോഗിച്ചിരുന്ന എം 2 മെഷീനുകളില്‍ 64 സ്ഥാനാര്‍ത്ഥികളുടെ പേരുകളേ ഉള്‍പ്പെടുത്താന്‍ കഴിയൂ.പോസ്റ്റല്‍ വോട്ട് അപേക്ഷകള്‍ 17 വരെ



നിയമസഭാ തിരഞ്ഞെടുപ്പില്‍ പോസ്റ്റല്‍ വോട്ടിന് ആഗ്രഹിക്കുന്നവര്‍ 12ഡി ഫോമില്‍ 17 നകം അപേക്ഷ നല്‍കണമെന്ന് ജില്ലാ തിരഞ്ഞെടുപ്പ് ഓഫീസര്‍ കൂടിയായ കളക്ടര്‍ ഡോ. നവ്‌ജ്യോത് ഖോസ പറഞ്ഞു.

ഇതിനായി ബൂത്ത് ലെവല്‍ ഓഫീസര്‍മാരില്‍നിന്നു ലഭിക്കുന്ന അപേക്ഷാഫോറം പൂരിപ്പിച്ച് നല്‍കി രസീത് കൈപ്പറ്റണം.

80 വയസിനു മുകളില്‍ പ്രായമുള്ളവര്‍, കൊവിഡ് പോസിറ്റീവായും ക്വാറന്റൈനിലും കഴിയുന്നവര്‍, വികലാംഗരായ വോട്ടര്‍മാര്‍ എന്നിവര്‍ക്കും തിരഞ്ഞെടുപ്പ് കമ്മിഷന്‍ അവശ്യ സര്‍വീസായി പ്രഖ്യാപിച്ചിട്ടുള്ള 16 വകുപ്പുകളിലെ ജീവനക്കാര്‍ക്കുമാണ് പോസ്റ്റല്‍ വോട്ട് അനുവദിക്കുന്നത്.