നാമിനിര്‍ദ്ദേശ പത്രിക പിന്‍വലിക്കാന്‍ ബി.എസ്.പി സ്ഥാനാര്‍ത്ഥി കെ. സുന്ദരയ്ക്ക് കൈക്കൂലി നല്‍കിയെന്ന പരാതിയില്‍ ബി.ജെ.പി സംസ്ഥാന അദ്ധ്യക്ഷന്‍ കെ സുരേന്ദ്രനെതിരെ കേസെടുത്തു. ഐപിസി 171 (B), 171 (E) വകുപ്പുകള്‍ അനുസരിച്ച്‌ ബദിയടുക്ക പൊലീസാണ് കേസെടുത്തത്.

ബി.ജെ.പി നേതാക്കള്‍ വീട്ടിലെത്തി രണ്ടരലക്ഷം രൂപയും സ്മാര്‍ട്ട് ഫോണും നല്‍കിയെന്ന സുന്ദരയുടെ വെളിപ്പെടുത്തലിന് പിന്നാലെ സുരേന്ദ്രനെതിരെ കേസെടുക്കണമെന്ന് ആവശ്യപ്പെട്ട് എല്‍.ഡി.എഫ് സ്ഥാനാര്‍ത്ഥി വി.വി. രമേശന്‍ കാസര്‍കോട് കോടതിയില്‍ അപേക്ഷ നല്‍കിയിരുന്നു.. തുടര്‍ന്ന് കെ. സുരേന്ദ്രനെതിരെ കേസെടുക്കാന്‍ അനുമതി നല്‍കുകയായിരുന്നു.

നിലവില്‍ എഫ്.ഐ.ആറില്‍ സുരേന്ദ്രനെതിരെ മാത്രമാണ് കേസ്. ഐ.പി.സി 172 (B) വകുപ്പ് പ്രകാരം സുരേന്ദ്രനെ അറസ്റ്റ് ചെയ്യാന്‍ പൊലീസിനാകില്ല. കോടതിയുടെ അനുമതി വേണം. എന്നാല്‍ ബദിയടുക്ക പൊലീസിന്‍റെ പ്രാഥമിക അന്വേഷണത്തില്‍ പത്രിക പിന്‍വലിക്കാനാവശ്യപ്പെട്ട് ബി.ജെ.പി നേതാക്കള്‍ തട്ടിക്കൊണ്ട് പോയെന്നും ഭീഷണിപ്പെടുത്തിയെന്നും സുന്ദര മൊഴി നല്‍കിയിട്ടുണ്ട്. സുന്ദരയുടെ മൊഴിയനുസരിച്ച്‌ പണം നല്‍കാന്‍ വീട്ടിലെത്തിയ ബി.ജെ.പി സംഘത്തിലുണ്ടായിരുന്ന സുനില്‍ നായ്ക്, സുരേഷ് നായക്, അശോക് ഷെട്ടി എന്നിവരെയും പ്രതി ചേര്‍ക്കാനാണ് പൊലീസ് നീക്കം.