മമൂന്നാം നാള്‍ കണ്ടെത്തി . മണിമലയാറ്റില്‍ ചാടി കാണാതായ വില്ലേജ് ഓഫീസറുടെ മൃതദേഹം കണ്ടെത്തി. തിങ്കളാഴ്ച രാവിലെ പത്ത് മണിയോടെയാണ് വലിയ പാലത്തില്‍ നിന്നും പ്രകാശന്‍ മണിമലയാറ്റിലേക്ക് ചാടിയത്.

ചങ്ങനാശേരി സ്‌പെഷ്യല്‍ വില്ലേജ് ഓഫീസര്‍ കങ്ങഴ സ്വദേശിയായ എന്‍ പ്രകാശന്റെ മൃതദേഹം മൂന്നാം ദിവസമാണ് കണ്ടെത്തിയത്.

ഇന്ന് രാവിലെ ഏഴ് മണിയോടെ മണിമല പാലത്തില്‍ നിന്നും ഒരു കിലോമീറ്ററോളം മാറി മൂങ്ങാനി തടയണയോട് ചേര്‍ന്നാണ് മൃതദേഹം പൊങ്ങിയത്. ഇയാള്‍ക്കായി അഗ്‌നിരക്ഷാസേനയുടെയും സ്‌കൂബ ടീം അംഗങ്ങളുടെയും നേതൃത്വത്തില്‍ കഴിഞ്ഞ രണ്ട് ദിവസമായി തിരച്ചില്‍ തുടരുകയായിരുന്നു. ഇതിനിടെയാണ് മൃതദേഹം പൊങ്ങുന്നത്.

ജോയിന്റ് കൗണ്‍സില്‍ നേതാവ് കൂടിയായ പ്രകാശന്‍, ജീവനൊടുക്കാന്‍ തീരുമാനിച്ച് തന്നെയാണ് ആറ്റിലേക്ക് ചാടിയതെന്നാണ് പൊലീസ് നിഗമനം. എന്നാല്‍ ഇതിനു പിന്നിലെ കാരണം വ്യക്തമല്ല.

ഇയാള്‍ ആറ്റില്‍ ചാടുന്നത് കണ്ട് ആദ്യം രക്ഷപ്പെടുത്താന്‍ ഓടിയെത്തിയത് അന്യസംസ്ഥാന തൊഴിലാളി ആയിരുന്ന യാനൂഷ് ലുഗുന്‍ എന്നയാളായിരുന്നു.

സമീപത്തെ ബ്രിട്ടീഷ് പാലത്തിലൂടെ നടന്നു പോവുകയായിരുന്ന അസം സ്വദേശികളായ യാനൂഷ് ലുഗനും സുഹൃത്ത് വിജയും പ്രകാശന്‍ ആറ്റിലേക്ക് ചാടുന്നത് കണ്ടിരുന്നു. ചിന്തിച്ച് നില്‍ക്കാതെ ഓടിയെത്തിയ യാനൂഷ്, പ്രകാശനെ രക്ഷിക്കാന്‍ പിന്നാലെ ചാടിയങ്കിലും രക്ഷിക്കാനായില്ല.