സ്വര്‍ണക്കടത്ത് കേസിലെ പ്രതി അര്‍ജുന്‍ ആയങ്കിയുടെ ഭാര്യ അമലയെ കസ്റ്റംസ് ഇന്ന് വീണ്ടും ചോദ്യം ചെയ്യും. അര്‍ജുന്‍ ആയങ്കിയുടെ സ്വര്‍ണക്കടത്ത് സംബന്ധിച്ച വിവരങ്ങള്‍ അമലക്ക് അറിയാമായിരുന്നുവെന്നാണ് കസ്റ്റംസിന് ലഭിച്ചിരിക്കുന്ന വിവരം.

നേരത്തെ കസ്റ്റംസ് അമലയെ ചോദ്യം ചെയ്തപ്പോള്‍ സ്വര്‍ണക്കടത്ത് സംബന്ധിച്ച യാതൊരു വിവരങ്ങളും തനിക്ക് അറിയില്ലെന്നായിരുന്നു അമല നല്‍കിയ മൊഴി.

ഈ മൊഴിയുമായി ബന്ധപ്പെട്ട് വൈരുദ്ധ്യങ്ങളുണ്ട് എന്ന് കസ്റ്റംസിന് വ്യക്തമായിട്ടുണ്ട്. തുടര്‍ന്നാണ് വീണ്ടും ചോദ്യം ചെയ്യലിന് ഹാജരാകാന്‍ അമലയോട് കസ്റ്റംസ് ആവശ്യപ്പെട്ടിരിക്കുന്നത്.

അര്‍ജുന്‍ ആയങ്കിയുടെ വീട്ടില്‍ നടത്തിയ റെയ്ഡില്‍ നിന്നും ലഭിച്ച ഡയറിയില്‍ നിന്നും ഭാര്യ അമലക്കും ഇത് സംബന്ധിച്ച വിവരങ്ങള്‍ അറിയാമെന്നതിന് തെളിവുകള്‍ കസ്റ്റംസിന് ലഭിച്ചിട്ടുണ്ട്.

നേരത്തെ ചോദ്യം ചെയ്തപ്പോഴും അമല പല കാര്യങ്ങളും മറച്ചുവെച്ചിട്ടുണ്ട്. അര്‍ജുന്‍ ആയങ്കിയുടെ സാമ്പത്തിക ഇടപാടുകള്‍ സംബന്ധിച്ച് കൂടുതല്‍ വിവരങ്ങള്‍ ലഭിക്കാനുണ്ട്. ഈ സാഹചര്യത്തിലാണ് വീണ്ടും ചോദ്യം ചെയ്യലിന് ഹാജരാകാന്‍ അമലയ്ക്ക് കസ്റ്റംസ് നോട്ടീസ് നല്‍കിയത്.

കൂടുതല്‍ സമയം വേണമെന്ന് അമല ആവശ്യപ്പെട്ടെങ്കിലും കസ്റ്റംസ് അത് നിഷേധിക്കുകയായിരുന്നു. ഇന്ന് നടത്തുന്ന ചോദ്യം ചെയ്യല്‍ നിര്‍ണായകമായേക്കും.