പ്രശസ്ത യൂ ട്യൂബ് വ്ളോഗര്‍മാരായ ഈ ബുള്‍ ജെറ്റ് ഊരാക്കുടുക്കിലേക്ക്. കണ്ണൂര്‍ ആര്‍ ടി ഒയില്‍ എത്തി സംഘര്‍ഷം ഉണ്ടാക്കിയതിനും സര്‍ക്കാര്‍ ഉദ്യോഗസ്ഥരുടെ കൃത്യനിര്‍വ്വഹണത്തിന് തടസ്സം നിന്നതിനും കൊവിഡ് മാനദണ്ഡങ്ങള്‍ ലംഘിച്ച്‌ ജനക്കൂട്ടം ഉണ്ടാക്കിയതിനും പ്രശസ്ത യൂ ട്യൂബ് വ്ളോഗര്‍മാരായ ഈ ബുള്‍ ജെറ്റിനെ പൊലീസ് അറസ്റ്റ് ചെയ്യുകയുണ്ടായി.

ഇ ബുള്‍ ജെറ്റ് എന്ന പേരില്‍ പ്രശസ്തരായ യൂ ട്യൂബ് വ്ളോഗര്‍മാരായ എബിന്റെയും ലിബിന്റെയും വാഹനം കഴിഞ്ഞ ദിവസം കണ്ണൂര്‍ ആര്‍ ടി ഒ പിടിച്ചെടുക്കുകയായിരുന്നു. വാഹനത്തില്‍ മറ്റുള്ളവര്‍ക്ക് അപകടകരമായ രീതിയില്‍ മോഡിഫിക്കേഷന്‍ വരുത്തി എന്ന കാരണത്താലാണ് ആര്‍ ടി ഒ ഇവരുടെ വാന്‍ പിടിച്ചെടുത്തത്. വാഹനത്തില്‍ രൂപമാറ്റം വരുത്തിയതിന്റെ ചാര്‍ജായി 6400 രൂപയും നിയമവിരുദ്ധ രൂപമാറ്റത്തിന്റെ പിഴയായി 42,000 രൂപയും അടച്ച ശേഷം വണ്ടി കൊണ്ടുപൊയ്ക്കൊള്ളാന്‍ ആ‌ര്‍ ടി ഒ ആവശ്യപ്പെടുകയും ചയ്തു. എന്നാല്‍ ഇന്ന് രാവിലെ കണ്ണൂര്‍ ആ‌ര്‍ ടി ഒയില്‍ എത്തിയ സഹോദരങ്ങളെ പൊലീസ് അറസ്റ്റ് ചെയ്തു നീക്കുകയായിരുന്നു.

ആര്‍ ടി ഒയില്‍ എത്തുന്നതിന് മുമ്പ് തന്നെ ഇവര്‍ ഇരുവരും തങ്ങളുടെ ഫേസ്ബുക്ക് പേജ് വഴി ലൈവ് വറുകയുണ്ടായി. ഈ ലൈവ് കണ്ട് ഇവരുടെ ആരാധകര്‍ ആര്‍ ടി ഒ ഓഫീസില്‍ തടിച്ചുകൂടികയായിരുന്നു. ആര്‍ ടി ഒ ഓഫീസിലെ ഉദ്യോഗസ്ഥന്മാരുമായി കയര്‍ത്തു സംസാരിച്ച ഇവര്‍ക്കെതിരെ സര്‍ക്കാ‌ര്‍ ഉദ്യോഗസ്ഥരുടെ കൃത്യനിര്‍വ്വഹണം തടഞ്ഞതിനും കൊവിഡ് മാനദണ്ഡം ലംഘിച്ച്‌ ആള്‍ക്കൂട്ടം സൃഷ്ടിച്ചതിനുമാണ് പോലീസ് കേസെടുത്തത്. ഈ രണ്ട് കേസുകളും ഈ ബുള്‍ ജെറ്റിന് ഭാവിയില്‍ വലിയ തലവേദനകള്‍ സൃഷ്ടിക്കുമെന്നാണ് റിപ്പോർട്ട്.

അതോടൊപ്പം തന്നെ റോഡിലൂടെ യാത്ര ചെയ്യുന്ന മറ്റ് വാഹനങ്ങള്‍ക്ക് ഭീഷണിയാവുന്ന രീതിയിലാണ് ഇവരുടെ പല മോഡിഫിക്കേഷനുകളുമെന്നാണ് ആര്‍ ടി ഒയുടെ വിശദീകരണം. എന്നാല്‍ രാജ്യത്തിന്‍റെ പലയിടങ്ങളിലും പോകുന്നതിനാല്‍ അതിന് അനുകൂലമായിട്ടുള്ള മോഡിഫിക്കേഷനുകള്‍ മാത്രമാണ് വാഹനത്തില്‍ ചെയ്തിട്ടുള്ളതെന്ന് ഇ ബുള്‍ ജെറ്റ് സഹോദരന്മാരും പറയുന്നു.