ആനതാഴ്ച്ചിറയില്‍ റോഡരികില്‍ നിര്‍ത്തിയിട്ടിരുന്ന കാര്‍ അടിച്ച് തകര്‍ത്ത് 45000 രൂപ മോഷണം നടത്തിയതായി പരാതി. നെയ്യാറ്റിന്‍കര തൊഴുകല്‍ റോഡരികത്ത് പുത്തന്‍വീട്ടില്‍ സുനിലാണ് മംഗലപുരം പൊലീസില്‍ പരാതി നല്‍കിയത്. വ്യാഴാഴ്ച ഉച്ചയ്ക്ക് 12 മണിയോടെയാണ് സംഭവം. അടങ്കല്‍ നിര്‍മ്മാണ പണി ചെയ്യുന്ന സുനില്‍ ആനതാഴ്ച്ചിറ ബണ്ട് റോഡിന്റെ നിര്‍മാണവുമായി ബന്ധപ്പെട്ടാണ് ആനതാഴ്ച്ചിറയില്‍ എത്തിയത്.

കാര്‍ റോഡരികില്‍ നിര്‍ത്തിയിട്ട് പണിസ്ഥലത്ത് പോയി തിരിച്ചെത്തിയപ്പോഴാണ് മുന്‍വശത്തെ ചില്ല് പൊട്ടിച്ച നിലയില്‍ കണ്ടത്. ജോലിക്കാര്‍ക്ക് നല്‍കാനായി കാറില്‍ സൂക്ഷിച്ചിരുന്ന 45000 രൂപയും നഷ്ടപ്പെട്ടതായി കണ്ടെത്തുകയായിരുന്നു. സംഭവത്തെ തുടര്‍ന്ന് സുനില്‍ മംഗലപുരം പൊലീസില്‍ പരാതി നല്‍കി. കേസ് രജിസ്റ്റര്‍ ചെയ്ത് അന്വേഷണം തുടങ്ങിയതായി എസ്.ഐ. തുളസീധരന്‍ പറഞ്ഞു.
പ്രദേശത്ത് സാമൂഹ്യ വിരുദ്ധശല്യം വര്‍ദ്ധിച്ചു വരുന്നതായാണ് നാട്ടുകാരുടെ പരാതി. മാസങ്ങള്‍ക്ക് മുമ്ബ് ആനതാഴ്ച്ചിറയിലെ നിര്‍മ്മാണ പ്രവര്‍ത്തനങ്ങള്‍ക്കായി ഉപയോഗിച്ചിരുന്ന മോട്ടോറുകളും മോഷണം പോയിരുന്നു. ഈ പ്രദേശം കേന്ദ്രീകരിച്ച് ലഹരി സംഘങ്ങള്‍ തങ്ങുന്നതായും നാട്ടുകാര്‍ പറഞ്ഞു.