ഡോളര്‍ കടത്ത് കേസുമായി ബന്ധപ്പെട്ട്​ ഇ.ഡി കൊടുത്ത നോട്ടീസില്‍ മുഖ്യമന്ത്രി പിണറായി വിജയന്റെയും പി. ശ്രീരാമകൃഷ്ണന്റെയും പേര് പരാമര്‍ശിച്ച സാഹചര്യത്തില്‍ ഇരുവരെയും അറസ്​റ്റ്​ ചെയ്യണമെന്ന് ജനപക്ഷം ചെയര്‍മാന്‍ പി.സി. ജോര്‍ജ്​ ആവശ്യപ്പെട്ടു.

മുഖ്യമന്ത്രി സ്ഥാനത്തുനിന്ന് പിണറായി വിജയന്‍ മാറി നില്‍ക്കണം. സ്വയം രാജിവെച്ചൊഴിയാന്‍ സാധ്യതയില്ലാത്തതിനാല്‍ സി.പി.എം അദ്ദേഹത്തെ പുറത്താക്കണമെന്നും ജോര്‍ജ്​ വാര്‍ത്തസമ്മേളനത്തില്‍ പറഞ്ഞു.

പുതിയ ആരോഗ്യ മന്ത്രി ദയനീയ പരാജയമാണ്​. ഫലപ്രദ നടപടികള്‍ സ്വീകരിക്കാന്‍ സര്‍ക്കാറിന്​ കഴിയുന്നില്ല. സംസ്ഥാനത്ത് വിതരണം ചെയ്യുന്ന വാക്സിന്റെ നിലവാരം പരിശോധിക്കണം​.

വാക്​സിന്‍ സ്വീകരിച്ചവര്‍ക്കും​ വലിയ തോതില്‍ കോവിഡ്​ സ്ഥിരീകരിക്കുകയാണ്​. കോവിഡിനെ പ്രതിരോധിക്കാന്‍ അലോപ്പതിയെ മാത്രം ആശ്രയിക്കാതെ ഹോമിയോ, ആയുര്‍വേദ മരുന്നുകളും പരിശോധിക്കണം.

ഈശോയുടെ പേരിട്ടിട്ട് അത്​ സിനിമയാണെന്ന്​ ന്യായീകരിക്കുന്നത്​ അംഗീകരിക്കാനാവില്ല. അടുത്ത തവണ പാലായില്‍ മത്സരിച്ചാലും ജോസ് കെ. മാണി തോല്‍ക്കും. റോഷി അഗസ്​റ്റിന്‍ മന്ത്രിയായതോടെ കേരള കോണ്‍ഗ്രസുകാരെല്ലാം അദ്ദേഹത്തിന്റെ അടുക്കലേക്കാണ്​ ഒഴുകുന്നത്​.

ഇത് തടയാനുള്ള ശ്രമമാണ് കേരള കോണ്‍ഗ്രസ് എമ്മിനെ കാഡര്‍ പാര്‍ട്ടിയാക്കുമെന്ന​ ജോസ്​ കെ. മാണിയുടെ പ്രസ്​താവന​. യു.ഡി.എഫ് പ്രവേശനം എപ്പോള്‍ വേണമെങ്കിലും ആകാമെന്നും പി.സി. ജോര്‍ജ്​ പറഞ്ഞു.