ഗവ.സെക്രട്ടറിയേറ്റ് തീപിടുത്തം: പ്രതിയില്ലാതെ ഫയര് ഒക്കറന്സ് ആയി കന്റോണ്മെന്റ് പോലീസ് എഴുതി തള്ളി, ഷോര്ട്ട് സര്ക്കീട്ട് മൂലമല്ലെന്ന് ഫോറന്സിക് റിപ്പോര്ട്ട് കോടതിയില് സമര്പ്പിച്ചിരുന്നു, കേസ് എഴുതിത്തള്ളണമെന്ന പോലീസിന്റെ അപേക്ഷ കോടതി പിന്നീട് പരിഗണിക്കും
സംസ്ഥാന ഭരണ സിരാകേന്ദ്രമായ തലസ്ഥാനത്തെ ഗവ: സെക്രട്ടറിയേറ്റില് നടന്ന തീ പിടുത്തക്കേസ് സ്വഭാവിക തീപിടുത്തമായ ഫയര് ഒക്കറന്സ് ആക്കി തിരുവനന്തപുരം കന്റോണ്മെന്റ് പോലീസ് എഴുതിത്തള്ളി.
കേസ് അവസാനിപ്പിക്കാന് അനുമതി തേടി അന്വേഷണ സംഘതലവനായ ഡി ഐ ജി മനോജ് എബ്രഹാം റഫര് റിപ്പോര്ട്ട് തയ്യാറാക്കി തിരുവനന്തപുരം മൂന്നാം ജുഡീഷ്യല് മജിസ്ട്രേട്ട് കോടതിയില് സമര്പ്പിച്ചു. കേസ് എഴുതിത്തള്ളണമെന്ന പോലീസിന്റെ അപേക്ഷ കോടതി പിന്നീട് പരിഗണിക്കും. സെക്രട്ടറിയേറ്റിലെ പ്രോട്ടോക്കോള് ഉദ്യോഗസ്ഥരുടെ ഭാഗത്ത് വീഴ്ചയില്ലെന്ന് റിപ്പോര്ട്ടില് പറയുന്നു.
ശുചീകരണ തൊഴിലാളികള് ഫാന് ഓഫ് ചെയ്യാതെ പോയതിനാല് ഫാനിലെ മോട്ടോര് കത്തി പ്ലാസ്റ്റിക് ഉരുകിയാണ് തീപിടുത്തം ഉണ്ടായത്. അപ്രധാന ഫയലുകളാണ് പേപ്പറുകള്ക്കൊപ്പം കത്തിപ്പോയിട്ടുള്ളത്.
കൊച്ചി പ്ലാസ്റ്റിക് ടെക്നോളജി സ്ഥാപനത്തില് മുപ്പതിനായിരം രൂപ മുടക്കി നടത്തിയ പരിശോധനയില് പ്ലാസ്റ്റിക് ഉരുകിയാണ് തീപ്പിടുത്തം ഉണ്ടായതെന്ന സാക്ഷ്യപത്രം നല്കിയിട്ടുണ്ട്.
സി സി റ്റി വി പരിശോധനയില് പ്രോട്ടോക്കോള് ഓഫീസര്മാരുടെ സാന്നിദ്ധ്യം കണ്ടെത്താനായില്ല. കൃത്യ സ്ഥലത്തു കണ്ടെത്തിയ മദ്യക്കുപ്പികള് സംബന്ധിച്ച് ഉദ്യോഗസ്ഥര്ക്കെതിരെ സര്ക്കാര് വകുപ്പുതല അന്വേഷണം നടത്തുന്നുണ്ടെന്നും റഫര് റിപ്പോര്ട്ടില് പറയുന്നു.
അതേ സമയം വൈദ്യുതി ഷോര്ട്ട് സര്ക്യൂട്ട് മൂലമല്ലെന്ന് ഫോറന്സിക് റിപ്പോര്ട്ട് കോടതിയില് നേരത്തേ സമര്പ്പിച്ചിരുന്നു. തിരുവനന്തപുരം മൂന്നാം ജുഡീഷ്യല് ഫസ്റ്റ് ക്ലാസ്സ് മജിസ്ട്രേട്ട് കോടതി മുമ്പാകെയാണ് മുദാ വെച്ച കവറില് റിപ്പോര്ട്ട് സമര്പ്പിച്ചത്. കത്തി ഉരുകിയ വാള് ഫാന് അടക്കം ഓഫീസ് മുറിയിലെ 24 സാധന സാമഗ്രികള് ഫോറന്സിക് പരിശോധനക്ക് വിധേയമാക്കിയതില് വൈദ്യുതി ഷോര്ട്ട് സര്ക്യൂട്ട് മൂലമാണ് തീപിടുത്തമുണ്ടായതെന്ന് കണ്ടെത്താനായില്ലെന്നും റിപ്പാര്ട്ടില് പറയുന്നു.
തീ പിടുത്തം മനുഷ്യരാല് ഉണ്ടായ തീ വെയ്പ്പാണെന്ന് വ്യക്തമാക്കുന്നതാണ് റിപ്പോര്ട്ട്. സ്വപ്ന സുരേഷും മുഖ്യമന്ത്രിയുടെ ഐ റ്റി സെക്രട്ടറി ശിവശങ്കറും ആരോപണ വിധേയരായ സ്വര്ണ്ണക്കടത്തുമായി ബന്ധപ്പെട്ട ഫയല് സി ബി ഐ ആവശ്യപ്പെട്ടതിന് പിന്നാലെയാണ് തീപിടുത്തം ഉണ്ടായത്.
സംസ്ഥന ഫോറന്സിക് സയന്സ് ലബോറട്ടറിയാണ് പരിശോധന ഫലം കോടതിയില് ഹാജരാക്കിയത്. ഓഗസ്റ്റ് 25നാണ് സെക്രട്ടറിയേറ്റില് തീപിടുത്തം ഉണ്ടായത്. വാര്ത്ത നല്കിയ മാധ്യമങ്ങള്ക്കെതിരെ കേസെടുക്കാനായി മുഖ്യമന്ത്രി പിണറായി വിജയന് നിയമ നടപടി സ്വീകരിക്കാനൊരുങ്ങിയിരുന്നു,.
"
https://www.facebook.com/Malayalivartha
