ഇന്ദ്രൻസിനെ കേന്ദ്ര കഥാപാത്രമാക്കി റോജിന്‍ തോമസ് തോമസ് സംവിധാനം ചെയ്ത ഹോം എന്ന ചിത്രം മികച്ച പ്രതികരണമാണ് നേടുന്നത്. സമൂഹമാധ്യമങ്ങളിലടക്കം മികച്ച പ്രതികരണം നേടി ആമസോണില്‍ സ്ട്രീമിങ്ങ് തുടരുകയാണ്. ചിത്രത്തെയും അഭിനേതാക്കളെയും പ്രകീർത്തിച്ചു കൊണ്ട് നിരവധി പേരാണ് രം​ഗത്തെത്തുന്നത്. ഇപ്പോഴിതാ സിനിമയെ കുറിച്ച് തന്റെ അഭിപ്രായം രേഖപ്പെടുത്തിയിരിക്കുകയാണ് കെ ടി ജലീല്‍.

"ഹോം'' കാണേണ്ട സിനിമയാണ്. അത് നമ്മുടെ കണ്ണ് നനയിക്കും, ഒപ്പം മനസ്സിലെവിടെയോ തുരുമ്പെടുത്ത് കിടക്കുന്ന നന്മയുടെ തലത്തെ പൊടിതട്ടിയെടുത്ത് ഓർമ്മപ്പുറത്ത് എത്തിക്കുകയും ചെയ്യും. പുതുതലമുറയുടെ അറിവിനൊപ്പം യാത്ര ചെയ്ത് വർത്തമാന പരിമിതികളെ അനായാസം മറികടക്കാമെന്ന് ഈ സിനിമ പറഞ്ഞുവെക്കുന്നു' എന്നും അദ്ദേഹം പറഞ്ഞുവയ്ക്കുന്നു.

കെ ടി ജലീലിന്റെ വാക്കുകൾ;

''ഹോം'' എന്ന സിനിമ കണ്ടു. കെട്ടിലും മട്ടിലും ഉള്ളടക്കത്തിലും മികച്ച കലാസൃഷ്ടിയാണത്. പുത്തൻ സാങ്കേതിക വിദ്യകൾ പഴയ തലമുറയെ അമ്പരപ്പിക്കുന്ന കാലത്ത് ജീവിക്കാൻ പ്രയാസപ്പെടുന്ന അച്ഛനമ്മമാരുടെ കഥയാണ് ഹോം പറയുന്നത്. നേട്ടങ്ങളുടെ പർവ്വങ്ങളിൽ വിരാജിക്കുന്നവർക്ക് അതിന് കളമൊരുക്കിയ മനുഷ്യമുഖങ്ങളെ ഓർമ്മിച്ചെടുക്കാൻ തീർച്ചയായും ഈ സിനിമ നിമിത്തമാകും. വായനാനുഭവം പോലെത്തന്നെയാണ് സിനിമാസ്വാദനവും. അവ കണ്ണിനും മനസ്സിനും മസ്തിഷ്കത്തിനും നൽകുന്ന കുളിർമ അനിർവചനീയമാണ്.

അഭിനയവും യാഥാർത്ഥ ജീവിതവും തമ്മിലുള്ള അതിർവരമ്പുകൾ എങ്ങിനെയാണ് തേഞ്ഞ് തേഞ്ഞ് ഇല്ലാതാകുന്നതെന്ന് "ഹോം" സാക്ഷ്യപ്പെടുത്തുന്നു. ഇന്ദ്രൻസ് ഉൾപ്പടെ എല്ലാ നടീനടൻമാരും അവരവരുടെ വേഷങ്ങൾ നന്നായി ചെയ്തു. വിജയ് ബാബുവിൻ്റെ "കൈപുണ്യം" ഒരിക്കൽകൂടി തെളിയുകയാണ് ഈ സിനിമയിലൂടെ. റോജിൻ തോമസ് എന്ന മിടുക്കൻ പയ്യൻ മലയാള സിനിമയെ കലാമൂല്യമുള്ള സൃഷ്ടികളാൽ ഇനിയും സമൃദ്ധമാക്കുമെന്ന കാര്യത്തിൽ സംശയം വേണ്ട.

"ഹോം'' കാണേണ്ട സിനിമയാണ്. അത് നമ്മുടെ കണ്ണ് നനയിക്കും, ഒപ്പം മനസ്സിലെവിടെയോ തുരുമ്പെടുത്ത് കിടക്കുന്ന നന്മയുടെ തലത്തെ പൊടിതട്ടിയെടുത്ത് ഓർമ്മപ്പുറത്ത് എത്തിക്കുകയും ചെയ്യും. പുതുതലമുറയുടെ അറിവിനൊപ്പം യാത്ര ചെയ്ത് വർത്തമാന പരിമിതികളെ അനായാസം മറികടക്കാമെന്ന് ഈ സിനിമ പറഞ്ഞുവെക്കുന്നു.

അത്തരം കുടുംബങ്ങളുടെ എണ്ണം നമുക്കുചുറ്റും നാൾക്കുനാൾ പെരുകി വരികയാണ്. കാലം രക്ഷകർത്താക്കളോട് ആവശ്യപ്പെടുന്നതും അതുതന്നെയാണ്. തലമുറ മാറ്റം അസാദ്ധ്യമായ രാഷ്ട്രീയ ഇടനാഴികകളിൽ തലച്ചോറെങ്കിലും മാറ്റിവെക്കാൻ ബന്ധപ്പെട്ടവർ മുതിർന്നില്ലെങ്കിൽ ന്യൂജെൻ അവരെ മാറ്റി പ്രതിഷ്ഠിക്കുമെന്ന മുന്നറിയിപ്പുകൂടി തരാതെ തരുന്നുണ്ട് പുതുതലമുറക്കാരനായ റോജിൻ തോമസ്. ഹോമിൻ്റെ അരങ്ങിലും അണിയറയിലും പ്രവർത്തിച്ച എല്ലാ കലാകാരൻമാർക്കും ഹൃദ്യമായ അഭിനന്ദനങ്ങൾ.