ആനി രാജ പറഞ്ഞത് അർദ്ധ സത്യമാണെന്ന വെളിപ്പെടുത്തലുമായി സന്ദീപ് ജി വാര്യർ. കേരളത്തിൽ ആഭ്യന്തര വകുപ്പ് സ്ത്രീകൾക്കെതിരായ അതിക്രമങ്ങൾ തടയുന്നതിൽ പരാജയപ്പെട്ടിരിക്കുന്നുവെന്ന ആരോപണവും അദ്ദേഹമുയർത്തിയിരിക്കുന്നു. ഫെയ്‌സ്ബുക്ക് കുറിപ്പിലൂടെയാണ് അദ്ദേഹം തന്റെ നിലപാടുകൾ അറിയിച്ചിരിക്കുന്നത്. കുറിപ്പിന്റെ പൂർണ്ണ രൂപം ഇങ്ങനെ ;

ആനി രാജ പറഞ്ഞത് അർദ്ധ സത്യമാണ് . കേരളത്തിൽ ആഭ്യന്തര വകുപ്പ് സ്ത്രീകൾക്കെതിരായ അതിക്രമങ്ങൾ തടയുന്നതിൽ പരാജയപ്പെട്ടിരിക്കുന്നു . കേരള പോലീസിൽ നിലവിൽ രണ്ട് സംഘടനാ സംവിധാനമാണ് ഉള്ളത്.

കേരള പോലീസ് അസോസിയേഷനും കേരള പോലീസ് ഓഫീസേഴ്സ് അസോസിയേഷനും. കഴിഞ്ഞ 5 വർഷക്കാലമായി ഇവ രണ്ടിൻ്റേയും നിയന്ത്രണം സിപിഎം അനുകൂല പോലീസുകാർക്കാണ്.

പോലീസ് സേനയിൽ മൊത്തമായും പോലീസ് സ്റ്റേഷനുകളിലെ ദൈനംദിന കാര്യങ്ങളും ഇവർ തീരുമാനിക്കുന്ന പ്രകാരമാണ് നടക്കുന്നത്. ഇടതുപക്ഷക്കാർ ആരോപണ വിധേയരാകുന്ന കേസുകൾ വ്യാപകമായി ഇവർ അട്ടിമറിക്കുന്നു. ആനി രാജ പറഞ്ഞതിൻ്റെ പൊരുൾ ഇതാണ് .

എന്നാൽ ആഭ്യന്തര മന്ത്രി പിണറായി വിജയനെ നേരിട്ട് കുറ്റപ്പെടുത്താൻ കഴിയാത്തതുകൊണ്ട് ആർഎസ്എസിൻ്റെ പേര് വലിച്ചിഴക്കുകയാണ് . അഞ്ച് വർഷം കഴിഞ്ഞ് തുടർ ഭരണമായിട്ടും ആർഎസ്എസാണ് കേരള പോലീസിനെ നിയന്ത്രിക്കുന്നതെങ്കിൽ പിണറായി വിജയന് ഭരിക്കാനറിയില്ല എന്നല്ലേ ആനി രാജ പറഞ്ഞു വെക്കുന്നത്?