ഒന്നും മിണ്ടാതെ കുഞ്ഞാലിക്കുട്ടി... പി.കെ. കുഞ്ഞാലിക്കുട്ടിക്കെതിരെ യുദ്ധ പ്രഖ്യാപനം നടത്തി മുന്നേറിയ കെ.ടി. ജലീലിന് കൂച്ചുവിലങ്ങിട്ട് സിപിഎം; തൊട്ടാല് പൊള്ളുന്ന സഹകരണത്തില് എന്തിന് തൊട്ടു? ജലീലിന്റെ മനസിലിരിപ്പ് അറിയാതെ നെട്ടോട്ടം
പി.കെ. കുഞ്ഞാലിക്കുട്ടിക്കെതിരെ യുദ്ധം പ്രഖ്യാപിച്ച കെ.ടി. ജലീലിന് അവസാനം സ്വന്തം പാളയത്ത് നിന്നുതന്നെ തിരിച്ചടി കിട്ടി. ജലീല് ഒറ്റപ്പെടുമ്പോള് കുഞ്ഞാലിക്കുട്ടി പക്ഷം സന്തോഷത്തിലാണ്.
അതേസമയം സഹകരണത്തിലെ കൈവിട്ട കളിവന്നതിനാലാണ് സി.പി.എമ്മിന് ജലീലിനെ തള്ളേണ്ടിവന്നത് എന്നാണ് പറയുന്നത്. എ.ആര്. നഗര് സഹകരണബാങ്കില് കള്ളപ്പണമെന്ന ആരോപണവുമായി ജലീല് എന്ഫോഴ്സ്മെന്റ് ഡയറക്ടറേറ്റിന് മുമ്പിലെത്തിയാല് അത് കേന്ദ്ര ഏജന്സികള്ക്ക് കേരളത്തിലെ സഹകരണ സ്ഥാപനങ്ങളില് കയറിയിറങ്ങാനുള്ള വഴിയൊരുക്കലാകുമെന്ന് സി.പി.എം. വിലയിരുത്തുന്നു. സംസ്ഥാന സര്ക്കാരിനും അത് പ്രതിസന്ധിയുണ്ടാക്കും.
കുഞ്ഞാലിക്കുട്ടിക്കെതിരേയുള്ള പോരാട്ടമാണ് ജലീലിന്റെ രാഷ്ട്രീയ പ്രത്യയശാസ്ത്രമെന്നത് സി.പി.എമ്മിന് അറിയാത്തതല്ല. അദ്ദേഹത്തിന്റെ ഇടതുപക്ഷത്തേക്കുള്ള വരവും പാര്ലമെന്ററി രംഗത്തേക്കുള്ള പോരാട്ടവും കുഞ്ഞാലിക്കുട്ടി വിരുദ്ധതയുടെ സൃഷ്ടിയായിരുന്നു. മന്ത്രിയായ ജലീലിനെതിരേ ബന്ധുനിയമനംമുതല് കേന്ദ്ര ഏജന്സികളുടെ അന്വേഷണംവരെ ലീഗ് ആയുധമാക്കിയതും ഈ പകമൂലമാണ്.
രണ്ടാം പിണറായി സര്ക്കാരില് ജലീല് മന്ത്രിയായില്ല. അതോടെ ഇനി കുഞ്ഞാലിക്കുട്ടിക്കും ലീഗിനും പിറകെ താനുണ്ടാകുമെന്ന് അദ്ദേഹം പ്രഖ്യാപിക്കുകയും ചെയ്തു. ആ പോരാട്ടമാണ് എ.ആര്. നഗര് സഹകരണബാങ്കിലെ കള്ളപ്പണ ആരോപണത്തില് എത്തിനില്ക്കുന്നത്.
ലീഗിനെ ദുര്ബലപ്പെടുത്തി അവരുടെ കോട്ടകളില് കടന്നുകയറണമെന്നും സി.പി.എം. തീരുമാനിച്ചതാണ്. പക്ഷേ, പാര്ട്ടി തീരുമാനം ഏറ്റെടുത്തുള്ള പോരാട്ടമല്ല ജലീലിന്റേത് എന്നതിനാലാണ് അത് പൂര്ണമായും ഏറ്റെടുക്കാതിരുന്നത്. തങ്ങള് കുടുംബത്തിന്റെ കൂടെനില്ക്കുകയും കുഞ്ഞാലിക്കുട്ടിക്കെതിരേ യുദ്ധം നയിക്കുകയും ചെയ്യുക എന്ന വിഭജനതന്ത്രമാണ് ജലീല് സ്വീകരിച്ചത്.
എ.ആര്. നഗര് ബാങ്കിനെതിരേയുള്ള ആരോപണമുയര്ത്തി ജലീല് ഇപ്പോള് നടത്തുന്നത് കൈവിട്ടകളിയാണെന്ന് സി.പി.എമ്മും സര്ക്കാരും വിലയിരുത്തുന്നു. കരുവന്നൂര് സഹകരണ ബാങ്കിലെ തട്ടിപ്പ് കേസില്തന്നെ എന്ഫോഴ്സ്മെന്റ് ഡയറക്ടറേറ്റ് വിവരാന്വേഷണം നടത്തിക്കഴിഞ്ഞതാണ്. അതില് അന്വേഷണം വന്നേക്കാം. അഞ്ചുവര്ഷംമുമ്പ് ഓഡിറ്റ് പരിശോധനയില് തട്ടിപ്പ് കണ്ടെത്തിയിട്ടും എന്തു നടപടി സ്വീകരിച്ചുവെന്നാണ് കരുവന്നൂര് കേസിന്റെ കാര്യത്തില് റിസര്വ് ബാങ്ക് ഉദ്യോഗസ്ഥര് സഹകരണസംഘം രജിസ്ട്രാറോട് ചോദിച്ചത്.
ഈ ഘട്ടത്തിലാണ് എ.ആര്. നഗര് സഹകരണബാങ്കില് കള്ളപ്പണമുണ്ടെന്ന പരാതി ജലീല് ഉന്നയിക്കുന്നത്. ആ പരാതിയില് കേന്ദ്രഏജന്സികള് ഒരുങ്ങിയിറങ്ങിയാല് അത് എ.ആര്. നഗറില് നില്ക്കില്ലെന്നും കേരളത്തിലെ സഹകരണമേഖലയെ മറ്റുതരത്തില് ബാധിച്ചേക്കാമെന്നും തിരിച്ചറിഞ്ഞതുകൊണ്ടാണ്, ജലീലിന്റെ ഇ.ഡി. പ്രേമം അത്രനല്ലതല്ലെന്ന് മുഖ്യമന്ത്രി തുറന്നടിച്ചത്.
കേരളത്തില് 1625 പ്രാഥമിക സഹകരണ ബാങ്കുകളാണുള്ളത്. ഇതില് 65 ശതമാനവും സി.പി.എമ്മിന്റെ നിയന്ത്രണത്തിലുള്ളതാണ്. അതിനാല്, സഹകരണത്തില് നിന്ന് വടിയെടുത്ത് കുഞ്ഞാലിക്കുട്ടിയെ അടിക്കാനിറങ്ങിയാല് പൊള്ളുക സി.പി.എമ്മിനാകും.
അതിനാലാണ് എ.ആര്.നഗര് സഹകരണ ബാങ്കില് പി.കെ കുഞ്ഞാലിക്കുട്ടിക്കും മകനും കള്ളപ്പണ നിക്ഷേപമുണ്ടെന്ന കെ.ടി ജലീലിന്റെ ആരോപണം സിപിഎം ഏറ്റെടുക്കാത്തത്. ഇ.ഡി ചോദ്യം ചെയ്തതോടെ ജലീലിന് ഇ.ഡിയില് വിശ്വാസം കൂടിയെന്ന് പരിഹസിച്ച മുഖ്യമന്ത്രി അദ്ദേഹത്തെ പരസ്യമായി തള്ളിപ്പറയുകയും ചെയ്തു. ഇതിന് പിന്നാലെയാണ് ജലീലിനെ സിപിഎം നേരിട്ട് അതൃപ്തി അറിയിച്ചത്.
"
https://www.facebook.com/Malayalivartha