തിരുവനന്തപുരം കല്ലമ്പലത്ത് നിന്നാണ് നാടിനെ നടുക്കുന്ന പീഡന ശ്രമം പുറത്തായത്. കല്ലമ്പലം മുത്താനയില്‍ ഇന്നലെ രാവിലെ ഒന്‍പതരയ്ക്കാണ് യുവതിക്കു നേരെ അതിക്രമമുണ്ടായത്. ബന്ധുവീട്ടില്‍ കുളിക്കാന്‍ പോയ 22കാരിക്ക് നേരെയാണ് അതിക്രമമുണ്ടായത്. വീട്ടില്‍ ആരുമില്ലെന്ന് തിരിച്ചറിഞ്ഞ് എത്തിയ സംഘം കയ്യും കാലും കെട്ടിയിട്ട് ഉപ്രദവിക്കുകയായിരുന്നു.

കുളിക്കാനും തുണി അലക്കാനുമായി തൊട്ടടുത്ത കുളമുള്ള ബന്ധുവീട്ടില്‍ യുവതി എല്ലാദിവസവും പോകാറുണ്ട്. ബന്ധുവീട്ടിലുള്ളവര്‍ ജോലിക്ക് പോയതിനാല്‍ വീട്ടില്‍ ആരുമുണ്ടായിരുന്നില്ല. ഈ സമയത്ത് വീട് തിരക്കി അപരിചിതനായ ഒരാള്‍ എത്തി മടങ്ങി കുറച്ച് സമയത്തിന് ശേഷം നാലുപേര്‍ വീട്ടിലേക്ക് അതിക്രമിച്ചു കയറുകയായിരുന്നു. കയ്യും കാലും കെട്ടിയ ശേഷം വായില്‍ ഷാള്‍ തിരുകിക്കയറ്റി യുവതിയെ അക്രമികള്‍ ഉപ്രദവിച്ചു.

ഇതിനിടെ, ഭിത്തിയില്‍ തലയിടിച്ച് യുവതിയുടെ ബോധം നഷ്ടപ്പെട്ടമായതോടെ സംഘം ഓടി രക്ഷപ്പെട്ടതായാണ് വിവരം. യുവതി മടങ്ങിയെത്താതിനെ തുടര്‍ന്ന് അമ്മ ബന്ധുവീട്ടിലെത്തിയതോടെയാണ് വിവരം പുറംലോകം അറിയുന്നത്. പാരിപ്പള്ളി മെഡിക്കല്‍ കോളജില്‍ ചികില്‍സ നല്‍കിയ ശേഷം വിദഗ്ധ പരിശോധനക്കായി യുവതിയെ തിരുവനന്തപുരം മെഡിക്കല്‍ കോളജിലേക്ക് മാറ്റി. ഫോറന്‍സിക് വിദഗ്ധരും സ്ഥലത്ത് പരിശോധന നടത്തി. സ്ഥലത്ത് കറങ്ങിനടന്ന നാലുപേരെ കല്ലമ്പലം പൊലീസ് കസ്റ്റഡിയിലെടുത്ത് ചോദ്യംചെയ്തു.

അതേസമയം ഇടുക്കി അടിമാലിയില്‍ പതിനാലു വയസുകാരിയെ പീഡിപ്പിച്ച് ഗര്‍ഭിണിയാക്കിയ കേസില്‍ ബന്ധു പിടിയില്‍. പെണ്‍കുട്ടിയുടെ മൊഴിയുടെ അടിസ്ഥാനത്തിലാണ് ബൈസണ്‍വാലി സ്വദേശിയായ ബന്ധുവിനെ രാജാക്കാട് പൊലീസ് അറസ്റ്റുചെയ്തത്. കഴിഞ്ഞ ബുധനാഴ്ച്ചയാണ് പതിനാലുകാരി അടിമാലി താലൂക്ക് ആശുപത്രിയില്‍ ആണ്‍ കുഞ്ഞിന് ജന്മം നല്‍കിയത്.



തലേന്ന് വയറുവേദന അനുഭവപ്പെട്ടതിനെ തുടര്‍ന്ന് ആശുപത്രിയിലെത്തിയപ്പോഴാണ് ഗര്‍ഭിണിയാണെന്ന വിവരമറിഞ്ഞത്. ചൈല്‍ഡ് ലൈന്‍ പ്രവര്‍ത്തകരും പൊലീസും പെണ്‍കുട്ടിയുടെ മൊഴി രേഖപ്പെടുത്തി. തുടര്‍ന്നാണ് മുപ്പത്തിമൂന്നുകാരനായ ബന്ധു പീഡിപ്പിച്ചിരുന്നതായി പെണ്‍കുട്ടി പറഞ്ഞത്. പെണ്‍കുട്ടിയുടെ അച്ഛന്റെ മരണത്തിനുപിന്നാലെ രണ്ടുവര്‍ഷത്തോളമായി ബൈസണ്‍വാലിയിലെ ബന്ധുവിന്റെ വീട്ടില്‍ നിന്നായിരുന്നു പഠനം.

അമ്മയ്ക്ക് കോട്ടയത്ത് ജോലിയായതിനാല്‍ സ്ഥിരമായി വീട്ടിലുണ്ടാകില്ല. പ്രതിയുടെ ഭാര്യയും കുടുംബാംഗങ്ങളും വീട്ടിലില്ലാത്ത സമയത്തായിരുന്നു പീഡനം. അറസ്റ്റുചെയ്ത പ്രതിയെ കോടതിയില്‍ ഹാജരാക്കി റിമാന്റ് ചെയ്തു. അമ്മയുടെയും കുഞ്ഞിന്റെയും ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു. ഇരുവരെയും ജില്ലാ ശിശു സംരക്ഷണ സമതിയും ചൈല്‍ഡ് വെല്‍ഫെയര്‍ കമ്മറ്റിയും ഏറ്റെടുക്കും.

അതേസമയം കരാട്ടെ, യോഗ ക്ലാസുകളുടെ മറവില്‍ സ്ത്രീകളെ ലൈംഗികമായി പീഡിപ്പിച്ച സ്ഥാപനയുടമ കൊച്ചി മരടില്‍ അറസ്റ്റിലായി. മലപ്പുറം പൊന്നാനി സ്വദേശി രഞ്ജിത്താണ് പിടിയിലായത്. കരാട്ടെ പഠനത്തിനെത്തിയ തിരുവനന്തപുരം സ്വദേശിനിയെ പീഡിപ്പിച്ചെന്ന പരാതിയിലാണ് അറസ്റ്റ്. ഒറ്റയ്‌ക്കെത്തുന്ന സ്ത്രീകളുടെ പരിശീലന സമയം അതിരാവിലെയും വൈകീട്ടുമായി ക്രമീകരിച്ചാണ് ഇയാള്‍ പീഡനത്തിന് അവസരമൊരുക്കിയിരുന്നത്.