അറിയാവുന്ന പോലീസുകാരന്‍ ചിലപ്പോള്‍ രണ്ടടി കൂടുതലടിക്കും എന്ന ചൊല്ല് ഷാറൂഖ് ഖാന്റെ മകനായ ആര്യന്‍ ഖാന്റെ കേസിലും ഉണ്ടായി. പിടിയിലായവരില്‍ ഒരാള്‍ നടന്‍ ഷാറുഖ് ഖാന്റെ മകന്‍ ആര്യന്‍ ആണെന്നറിഞ്ഞപ്പോള്‍ നര്‍കോട്ടിക്‌സ് കണ്‍ട്രോള്‍ ബ്യൂറോ ഉദ്യോഗസ്ഥര്‍ ഞെട്ടിയിരുന്നു.

താന്‍ ഷാറൂഖ് ഖാന്റെ മകനാണെന്ന് പറഞ്ഞിട്ടും ആര്യന്‍ ഖാനെ വിട്ടില്ല. സംഘാടകര്‍ തന്നെ അതിഥിയായി ക്ഷണിച്ചതാണെന്നും പണം അടച്ച് കപ്പലില്‍ ടിക്കറ്റ് എടുത്തിട്ടില്ലെന്നും ആര്യന്‍ ഖാന്‍ അന്വേഷണസംഘത്തോടു പറഞ്ഞു. താന്‍ വിരുന്നില്‍ ഉണ്ടെന്ന് അറിയിച്ച് സംഘാടകര്‍ ആളുകളെ ആകര്‍ഷിക്കാന്‍ ശ്രമിച്ചിട്ടുണ്ടെന്നും ആര്യന്‍ പറഞ്ഞു.

അതേസമയം ആര്യന്‍ ഖാന്റെ വാട്‌സാപ്പ് സന്ദേശം കുരുക്കിലായി. ആര്യന്‍ ഖാന്റെ വാട്‌സാപില്‍ ലഹരിമരുന്ന് ആവശ്യപ്പെട്ടുകൊണ്ടുള്ള സന്ദേശങ്ങള്‍ അന്വേഷണസംഘം കണ്ടെത്തി. ലഹരിമരുന്നുമായി ബന്ധപ്പെട്ട് ഒട്ടേറെ ചാറ്റുകള്‍ അറസ്റ്റിലായവര്‍ തമ്മില്‍ നടത്തിയതായി കണ്ടെത്തിയിട്ടുണ്ട്. കസ്റ്റഡി കാലാവധി കഴിഞ്ഞ് ആര്യന്‍ ഖാനെ ഇന്ന് കോടതിയില്‍ ഹാജരാക്കുമ്പോള്‍ ഈ തെളിവുകള്‍ കൈമാറി എന്‍സിബി കസ്റ്റഡി നീട്ടിച്ചോദിക്കും.

അതിനിടെ ആര്യന്‍ ഖാനെ പുറത്തിറക്കാന്‍ വലിയ ശ്രമമാണ് നടക്കുന്നത്. ഇന്നു ജാമ്യാപേക്ഷ സമര്‍പ്പിക്കുമെന്ന് അഭിഭാഷകന്‍ അറിയിച്ചു. സ്‌പെയിനില്‍ ചിത്രീകരണത്തിലുള്ള ഷാറുഖ് ഖാന്‍ ചിത്രീകരണം നിര്‍ത്തിവച്ച് ഉടന്‍ മുംബൈയിലേക്കു മടങ്ങിയെത്തിയേക്കും.

ഷാറുഖ് ഖാന്റെയും ഗൗരി ഖാന്റെയും മക്കളില്‍ മൂത്തയാളാണ് ആര്യന്‍ ഖാന്‍. പിതാവിന്റെ പാതയിലൂടെ അഭിനയരംഗത്ത് എത്തുമെന്ന് അഭ്യൂഹങ്ങളുണ്ടായിരുന്നെങ്കിലും സിനിമയില്‍ ക്യാമറയ്ക്കു പിന്നില്‍ നില്‍ക്കാനാണ് ആര്യന്‍ ഇഷ്ടപ്പെട്ടിരുന്നത്. 2001ല്‍ പുറത്തിറങ്ങിയ കഭി ഖുശി കഭി ഘം എന്ന ചിത്രത്തില്‍ ബാലതാരമായിരുന്നു.

ലണ്ടനില്‍ സ്‌കൂള്‍ വിദ്യാഭ്യാസത്തിനു ശേഷം യുഎസില്‍ നിന്ന് ഫൈന്‍ ആര്‍ട്‌സ്, സിനിമാറ്റിക് ആര്‍ട്‌സ് ഫിലിം ആന്‍ഡ് ടെലിവിഷന്‍ പ്രൊഡക്ഷനില്‍ ബിരുദമെടുത്തു. ഇന്‍സ്റ്റഗ്രാമില്‍ 14 ലക്ഷത്തോളം പേര്‍ പിന്തുടരുന്നുവെങ്കിലും കുടുംബാംഗങ്ങളും സുഹൃത്തുക്കളും ഉള്‍പ്പെട്ട ചിത്രങ്ങളും വിഡിയോകളുമാണ് അധികവും പങ്കുവയ്ക്കാറുള്ളത്. അമിതാഭ് ബച്ചന്റെ മകളുടെ മകള്‍ നവ്യ നവേലി നന്ദയുമായി ബന്ധപ്പെട്ടു ഗോസിപ്പുകളുണ്ടായിരുന്നു.



രാജ്യത്തെ ഏറ്റവും വലിയ ആഡംബര കപ്പലാണ് ലഹരി മരുന്നു വിവാദത്തില്‍പ്പെട്ട കോര്‍ഡിലിയ. 11 നിലകളുള്ളതാണ് കപ്പല്‍ 1800 പേര്‍ക്കു വരെ കയറാം. രാജ്യാന്തര ജലപാതയില്‍ എത്തുന്ന വേളയിലാണ് കാസിനോകളും ബാറുകളും സജീവമാക്കുക.1200 യാത്രികരുമായി ഈ മാസം 18നാണ് സീസണിലെ ആദ്യ യാത്ര ആരംഭിച്ചത്. 22നു രാവിലെ കൊച്ചി തുറമുഖത്ത് എത്തിയ കപ്പലില്‍നിന്നു മുന്നൂറോളം പേര്‍ കൊച്ചിയിലെയും പരിസരപ്രദേശങ്ങളിലെയും കാഴ്ചകള്‍ കാണാനിറങ്ങി. അന്നു വൈകിട്ട് ലക്ഷദ്വീപിലേക്ക് തിരിച്ചു. ആഭ്യന്തര ക്രൂസ് ടൂറിസത്തിന്റെ പുതിയ തുടക്കമായാണു കപ്പലിന്റെ വരവ് ആഘോഷിക്കപ്പെട്ടത്.

കപ്പലില്‍ ഒരു സംഘം ലഹരിവിരുന്നിനു പദ്ധതിയിടുന്നതായി സിഐഎസ്എഫില്‍ നിന്നു ലഭിച്ച സൂചനയാണു വഴിത്തിരിവായത്. എന്‍സിബി സോണല്‍ ഡയറക്ടര്‍ സമീര്‍ വാങ്കഡെയുടെ നേതൃത്വത്തിലുള്ള സംഘം വിനോദസഞ്ചാരികള്‍ എന്ന മട്ടിലാണു പുറപ്പെട്ടത്.

മുംബൈ തീരംവിട്ട് നീങ്ങിയതോടെയാണ് വിരുന്നിനു തയാറെടുപ്പുകള്‍ തുടങ്ങിയത്. 7 മണിക്കൂറുകളോളം നീണ്ട തിരച്ചിലില്‍ വസ്ത്രങ്ങളിലും അടിവസ്ത്രങ്ങളിലും സാനിറ്ററി പാഡുകളിലും പഴ്‌സിലും സൂക്ഷിച്ചിരുന്ന നിലയിലാണ് ലഹരി കണ്ടെത്തിയത്.