ഷാറൂഖ് ഖാന്റെ മകന്‍ ആര്യന്‍ ഖാനെ ആഡംബര കപ്പലില്‍ നിന്നും അറസ്റ്റ് ചെയ്തതോടെയാണ് കപ്പലിന്റെ വിശേഷങ്ങള്‍ വാര്‍ത്തയാകുന്നത്. കൊര്‍ഡിലിയ ക്രൂസ് ആഡംബര കപ്പല്‍ ആരെയും ഞെട്ടിപ്പിക്കും. ഇത് കൊച്ചിയിലും എത്തിയിരുന്നു. 1200 യാത്രികരുമാണ് കപ്പല്‍ കൊച്ചിയിലെത്തിയത്.

രാജ്യത്തെ ഏറ്റവും വലിയ ആഡംബര കപ്പലാണ് ലഹരി മരുന്നു വിവാദത്തില്‍പ്പെട്ട കോര്‍ഡിലിയ. ഏറെ വിശേഷങ്ങളാണ് കപ്പലിലുള്ളത്. 11 നിലകളുള്ളതാണ് കപ്പല്‍ 1800 പേര്‍ക്കു വരെ കയറാം. രാജ്യാന്തര ജലപാതയില്‍ എത്തുന്ന വേളയിലാണ് കാസിനോകളും ബാറുകളും സജീവമാക്കുക.

11 ഡെക്കുകളിലായി 796 ക്യാബിനുകളാണു കപ്പലിലുള്ളത്. സ്വിമ്മിങ് പൂള്‍, 3 റസ്റ്ററന്റുകള്‍, ഫിറ്റ്‌നസ് സെന്ററുകള്‍, സ്പാ, തിയറ്റര്‍, കാസിനോ, നൈറ്റ് ക്ലബ്, ഡിജെ പാര്‍ട്ടികള്‍, 5 ബാറുകള്‍, ലൈവ് ബാന്‍ഡുകള്‍, ഷോപ്പിങ് തുടങ്ങി എല്ലാ സൗകര്യങ്ങളുമുള്ളതാണു കപ്പല്‍. മെനു കാര്‍ഡില്‍ നൂറിലധികം വിഭവങ്ങള്‍. 3 രാത്രിയും 4 പകലും നീളുന്ന കപ്പല്‍ യാത്രയ്ക്ക് 22,000 രൂപ മുതല്‍ 30,000 രൂപ വരെയാണു നിരക്കുകള്‍.

രഹസ്യവിവരത്തിന്റെ അടിസ്ഥാനത്തിലായിരുന്നു ക്രൂസ് കപ്പലില്‍ എന്‍സിബി പരിശോധന നടത്തുന്നത്. സമൂഹമാധ്യമങ്ങളിലെ ഗ്രൂപ്പുകള്‍ വഴിയായിരുന്നു പാര്‍ട്ടി സംഘടിപ്പിച്ചത്. 80,000 രൂപയാണ് പാര്‍ട്ടിയില്‍ പങ്കെടുക്കുന്നതിന് ഒരാളില്‍നിന്ന് ഈടാക്കിയിരുന്നത്. പിടിയിലായവരില്‍നിന്ന് ലഭിച്ച വിവരത്തിന്റെ അടിസ്ഥാനത്തില്‍ കൂടുതല്‍ പേരെ കസ്റ്റഡിയിലെടുത്ത് ചോദ്യം ചെയ്യും.

വിവിധ ഇന്ത്യന്‍ സംസ്ഥാനങ്ങളില്‍ നിന്നുള്ള വിനോദ സഞ്ചാരികളുമായി സമുദ്രം ചുറ്റുന്ന കൊര്‍ഡിലിയ ക്രൂസിന്റെ ആഡംബര കപ്പല്‍ എംവി എംപ്രസ് ഒരാഴ്ച മുന്‍പ് കൊച്ചിയിലും എത്തിയിരുന്നു. മുംബൈ തീരത്തെ പാര്‍ട്ടിക്കിടയില്‍ ആഡംബര കപ്പലില്‍ നര്‍കോട്ടിക്‌സ് കണ്‍ട്രോള്‍ ബ്യൂറോ നടത്തിയ പരിശോധനയില്‍ 3 യുവതികള്‍ ഉള്‍പ്പെടെ 11 പേര്‍ പിടിയിലായതോടെയാണ് കപ്പല്‍ വീണ്ടും വാര്‍ത്താകേന്ദ്രമായത്.

ബോളിവുഡ് സൂപ്പര്‍താരം ഷാരൂഖ് ഖാന്റെ മകന്‍ ആര്യന്‍ ഖാനും കസ്റ്റഡിയില്‍ എടുത്തവരുടെ കൂട്ടത്തിലുണ്ട്. പാര്‍ട്ടിയില്‍ ആര്യനു ബന്ധമുണ്ടോയെന്നും ഇയാള്‍ ലഹരിമരുന്ന് ഉപയോഗിച്ചിരുന്നോയെന്നും എന്‍സിബി പരിശോധിച്ചു വരികയാണ്. ആര്യന്റെ ഫോണ്‍ പിടിച്ചടുത്തതായും ചാറ്റ് ഉള്‍പ്പെടെയുള്ള വിവരങ്ങള്‍ പരിശോധിച്ചു വരികയാണെന്നും ഉദ്യോഗസ്ഥര്‍ പറഞ്ഞു.

കപ്പലില്‍നിന്നു കൊക്കെയ്ന്‍, ഹഷീഷ്, എംഡിഎംഎ ഉള്‍പ്പെടെ നിരവധി നിരോധിത ലഹരിമരുന്നുകള്‍ പിടിച്ചെടുത്തിട്ടുണ്ട്. അടുത്തിടെയാണ് കോര്‍ഡില ക്രൂസ് എന്ന ആഡംബര കപ്പല്‍ ഉദ്ഘാടനം ചെയ്തത്. മുംബൈ തീരത്തിനു സമീപം പുറം കടലില്‍ നിര്‍ത്തിയിരുന്ന കപ്പലിലാണ് പാര്‍ട്ടി സംഘടിച്ചത്.

അതേസമയം ആഡംബരക്കപ്പലിലെ ലഹരി പാര്‍ട്ടിയില്‍ പ്രതികളെ ഒരു ദിവസത്തേക്ക് കസ്റ്റഡില്‍ വിട്ടു. ഷാരൂഖ് ഖാന്റെ മകന്‍ ആര്യന്‍ ഖാന്‍, അര്‍ബാസ് മര്‍ച്ചന്റ്, നടിയും മോഡലുമായ മുന്‍മുന്‍ ദാമേച്ച എന്നിവരെയാണ് ഒക്ടോബര്‍ 5 വരെ എന്‍സിബി കസ്റ്റഡിയില്‍ ആവശ്യപ്പെട്ടത്. കേസില്‍ തിങ്കളാഴ്ച്ച വീണ്ടും വാദം കേള്‍ക്കും.

ലഹരി ഉപയോഗിച്ചതിനൊപ്പം വാങ്ങിയതിനും വിറ്റതിനുമാണ് മൂവര്‍ക്കുമെതിരെ കേസ്.1.33 ലക്ഷം രൂപയുടെ ലഹരി വസ്തുക്കള്‍ പിടികൂടിയതായും പ്രാഥമിക അന്വേഷണത്തില്‍ പ്രതികള്‍ക്കെതിരെ തെളിവുണ്ടെന്നും എന്‍സിബി കോടതിയില്‍ അറിയിച്ചു. അതേസമയം ആര്യനെ പുറത്തിറക്കാനുള്ള നെട്ടോട്ടത്തിലാണ് ഷാറൂഖ് ഖാന്‍.