കേരളത്തിൽ ഇന്നും അടപടലം മഴ തുടരുമെന്ന് കാലാവസ്ഥാ വകുപ്പ്...ചില ജില്ലകളിൽ ഓറഞ്ച് അലേർട്ട് കൂടെ പ്രഖ്യാപിച്ചിരിക്കുകയാണ്... ഇടുക്കി, പത്തനംതിട്ട ജില്ലകളിൽ അതിശക്തമായ മഴയ്ക്കു സാധ്യതയുണ്ട് .അതുകൊണ്ട് ഈ ജില്ലകളിൽ ഓറഞ്ച് അലർട്ട് പ്രഖ്യാപിച്ചു. എറണാകുളം, ആലപ്പുഴ ഒഴികെയുള്ള മറ്റു ജില്ലകളിൽ ശക്തമായ മഴയ്ക്കു സാധ്യതയുള്ളതിനാൽ യെലോ അലർട്ടും പ്രഖ്യാപിച്ചിരിക്കുന്നു.

നാളെ മലപ്പുറം, ഇടുക്കി ജില്ലകളിൽ ഓറഞ്ച് അലർട്ട് ഉണ്ട്. ഇടിക്കും മിന്നലിനും സാധ്യതയുള്ളതിനാൽ ജാഗ്രത പാലിക്കണം. നാളെ വരെ അറബിക്കടലിൽ കേരള, കർണാടക തീരങ്ങളിൽ മത്സ്യബന്ധനത്തിനു പോകരുതെന്നു മുന്നറിയിപ്പ് നൽകിയിട്ടുണ്ട്.

മാത്രമല്ല ബംഗാൾ ഉൾക്കടലിലെ തുടർച്ചയായ ന്യൂനമർദങ്ങൾക്കു പിന്നാലെ അറബിക്കടലിലും ന്യൂനമർദം ഉണ്ടാകുന്നു . തെക്കു കിഴക്കൻ അറബിക്കടലിൽ കേരള തീരത്തോടു ചേർന്ന് രൂപപ്പെട്ട ചക്രവാതച്ചുഴി നാളെയ്ക്കകം ശക്തിയാർജിക്കുകയാണ് . വടക്കു കിഴക്കൻ ദിശയിൽ നീങ്ങി ന്യൂനമർദമായി മാറുമെന്നാണ് കരുതുന്നത് .

ഗുജറാത്ത് തീരത്തിനു സമീപം അറബിക്കടലിൽ രൂപം കൊണ്ട ഷഹീൻ ചുഴലിക്കാറ്റ് ഒമാൻ തീരത്തേക്കു നീങ്ങിയിട്ടുണ്ട് . ഇന്നു രാവിലെ മണിക്കൂറിൽ 110 കിലോമീറ്റർ വേഗത്തിൽ ഒമാനിൽ കര തൊടുമെന്നാണ് പ്രവചനം.അന്തരീക്ഷത്തിലുണ്ടാകുന്ന സമ്മർദങ്ങൾ കാരണം കാലവർഷം പിൻവാങ്ങുന്നത് പതിവിലും വൈകും.

അതുകൊണ്ട് തന്നെ തുലാവർഷം സാധാരണഗതിയിൽ ലഭിക്കും എന്ന നിഗമനത്തിലാണ് ഉള്ളത്. ഇപ്പോൾ ഷഹീൻ ചുഴലിക്കാറ്റ് ഗുജറാത്തിന്റെ തീരത്തുനിന്ന് ഒമാൻ ഭാഗത്തേക്ക് നീങ്ങിത്തുടങ്ങി. എങ്കിലും കടലിലെ സന്തുലിതാവസ്ഥയിലെ മാറ്റവും ഷഹീന്റെ ശക്തിയും വ്യാപ്തിയും വർധിപ്പിക്കുന്നുണ്ട്. അന്തരീക്ഷത്തിലുണ്ടായ സമ്മർദ്ദം കാരണം കേരളത്തിൽ കൂടുതൽ മഴയ്‌ക്കും സാധ്യതയുണ്ട്.

അറബിക്കടലിൽ തമിഴ്നാടിന്റെ ഭാഗത്തുണ്ടായ ചക്രവാതച്ചുഴിയുടെ സ്വാധീനത്തിൽ കാർമേഘങ്ങൾ വൻതോതിൽ കേരളത്തിലൂടെ കടന്നുപോകുന്നുണ്ട് . ഇതിനിടെ ബംഗാൾ ഉൾക്കടലിൽ പുതിയ ചുഴലിയുണ്ടായേക്കുമെന്നും വിദഗ്‌ദ്ധർ വ്യക്തമാക്കുന്നുണ്ട്.

മത്സ്യത്തൊഴിലാളി ജാഗ്രത നിർദ്ദേശവും പുറത്ത് വന്നിരുന്നു .03-10-2021 മുതൽ 04-10-2021 വരെ: തെക്ക് കിഴക്കൻ , മധ്യകിഴക്കൻ അറബിക്കടലിലും അതിനോടു ചേർന്ന കേരള- കർണാടക- ഗോവ എന്നീ തീരങ്ങളിൽ മണിക്കൂറിൽ 40 മുതൽ 50 കി.മീ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

05-10-2021 : തെക്ക് കിഴക്കൻ , മധ്യകിഴക്കൻ അറബിക്കടലിലും അതിനോടു ചേർന്ന കേരള- കർണാടക- ഗോവ എന്നീ തീരങ്ങളിൽ മണിക്കൂറിൽ 45 മുതൽ 55 കി.മീ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. മേൽ പറഞ്ഞ ദിവസങ്ങളിൽ പ്രസ്തുത പ്രദേശങ്ങളിൽ മത്സ്യബന്ധനത്തിന് പോകാൻ പാടുള്ളല്ല.