പൊട്ടിച്ചിരിച്ച് സുരേന്ദ്രന്... കെ. സുരേന്ദ്രനെ താഴെയിറക്കാമെന്ന് മനപ്പായസം കുടിച്ചവര് സുരേഷ് ഗോപിയെ പ്രോത്സാഹിപ്പിച്ചു; രണ്ട് നാള് കൊണ്ട് കേരളം അടക്കി വാണ സുരേഷ് ഗോപിയെ കാണാനില്ല; കേന്ദ്ര നേതൃത്വം സുരേന്ദ്രനൊപ്പം; സുരേന്ദ്രന് അധ്യക്ഷനായി തുടരും
സുരേഷ് ഗോപിയുടെ ഓളം കണ്ടപ്പോള് സകല മാധ്യമങ്ങളും സുരേഷ് ഗോപി ബിജെപി അധ്യക്ഷനാകുമെന്ന തരത്തില് പ്രചാരണം നടത്തി. കെ. സുരേന്ദ്രനെ താഴെയിറക്കാമെന്ന് മനപ്പായസം കുടിച്ച പാര്ട്ടി ഗ്രൂപ്പുകള് സുരേഷ് ഗോപിയെ പ്രോത്സാഹിപ്പിക്കുകയും ചെയ്തു. അതോടെ സുരേഷ് ഗോപി രണ്ട് ദിനം കൊണ്ട് കളം നിറഞ്ഞു. ഇടയ്ക്കിടയ്ക്ക് താന് സാധാരണ പാര്ട്ടി പ്രവര്ത്തകനാണെന്ന് പറഞ്ഞ് വിനയം കാണിച്ചു. എന്നാല് പിന്നെ സുരേഷ് ഗോപി പ്രവര്ത്തകനായി തുടരട്ടെ എന്നും കേന്ദ്ര ബിജെപി നേതൃത്വവും വിധിയെഴുതി.
ബി.ജെ.പി കേരള ഘടകത്തില് സംസ്ഥാന പ്രസിഡന്റ് കെ. സുരേന്ദ്രന് നടത്തിയ പുനഃസംഘടനക്ക് കേന്ദ്ര നേതൃത്വത്തിന്റെ പൂര്ണ പിന്തുണ ലഭിച്ചു. സംസ്ഥാന പ്രസിഡന്റ് സ്ഥാനത്ത് നിന്ന് കെ. സുരേന്ദ്രനെ മാറ്റുമെന്ന പാര്ട്ടിയിലെ ഒരു വിഭാഗത്തിന്റെ പ്രചാരണത്തിന് ഇത് കനത്ത തിരിച്ചടിയായി.
കഴിഞ്ഞ നിയമസഭാ തിരഞ്ഞെടുപ്പ് പ്രചാരണതന്ത്രം മുഴുവന് കേന്ദ്ര നേതൃത്വവും കേരളത്തിലെ ആര്.എസ്.എസ് നേതൃത്വവും ഒന്നിച്ചെടുത്തതായിരുന്നു. തിരഞ്ഞെടുപ്പ് ഫണ്ട് കൈകാര്യം ചെയ്തതും ഇതേ രീതിയിലാണ്.
പാര്ട്ടിയിലെ സുരേന്ദ്രന് വിരുദ്ധവിഭാഗമുയര്ത്തിയ വിമര്ശനങ്ങള് കേന്ദ്ര നേതൃത്വത്തിനെതിരായി. കഴിഞ്ഞ രണ്ടുതവണ നടത്തിയ ഡല്ഹി സന്ദര്ശനത്തില്, ശക്തമായി മുന്നോട്ട് പോകാനുള്ള നിര്ദ്ദേശമാണ് അമിത് ഷാ, ജെ.പി. നദ്ദ, ബി.എല്. സന്തോഷ് എന്നീ നേതാക്കളില് നിന്ന് സുരേന്ദ്രന് ലഭിച്ചതെന്നറിയുന്നു.
അഞ്ച് ജില്ലകളിലെ അദ്ധ്യക്ഷന്മാരെ മാറ്റിയും നാല് പുതിയ സംസ്ഥാന ഭാരവാഹികളെ നിയമിച്ചും സുരേന്ദ്രന് സംഘടനയില് കൂടുതല് ആധിപത്യം പ്രകടിപ്പിച്ചു. മറ്റ് പാര്ട്ടികളില് നിന്ന് വരുന്നവരെ പരിഗണിക്കുന്നതിന്റെ ഭാഗമായി, പന്തളം പ്രതാപനെ സംസ്ഥാന സെക്രട്ടറിയായി നിയമിച്ചു. പാര്ട്ടി ഫണ്ട് വിനിയോഗത്തിന്റെ പേരില് ആരോപണം നേരിട്ടപ്പോള് പ്രതിരോധിക്കാന് കഴിയാതെ പോയ സംസ്ഥാന ട്രഷറര്, പാര്ട്ടി ആസ്ഥാനത്തെ ഓഫീസ് സെക്രട്ടറി സ്ഥാനങ്ങളില് വിശ്വസ്തര്ക്ക് ചുമതല നല്കി.
സി.കെ. ജാനുവിന് ഫണ്ട് നല്കിയെന്നതിന്റെ പേരില് ആരോപണവും കേസും നേരിട്ടപ്പോള് പാര്ട്ടിയെ സംരക്ഷിക്കാതിരുന്നതിനാണ് വയനാട്ടിലെ സുരേന്ദ്രന് വിരുദ്ധ വിഭാഗത്തിന്റെ പ്രതിനിധിയായ ജില്ലാ പ്രസിഡന്റിന് സ്ഥാനം തെറിച്ചത്. സുരേന്ദ്രന് വിരുദ്ധ പക്ഷത്തല്ലെങ്കിലും കഴിഞ്ഞ നിയമസഭാതിരഞ്ഞെടുപ്പില് ജാഗ്രതക്കുറവുണ്ടായതിന്റെ പേരില് കാസര്കോട്ടും പത്തനംതിട്ടയിലും ജില്ലാ പ്രസിഡന്റുമാര്ക്ക് മാറേണ്ടി വന്നു.
അതേസമയം കഴിഞ്ഞ ദിവസവും ബിജെപി അധ്യക്ഷ സ്ഥാനത്തേക്കില്ലെന്ന് ആവര്ത്തിച്ച് സുരേഷ് ഗോപി ആവര്ത്തിച്ചു. ഇപ്പോള് ചെയ്യുന്ന ജോലിയില് സംതൃപ്തനാണെന്നും അത് തുടരാന് അനുവദിക്കണമെന്നുമാണ് രാജ്യസഭ എംപിയായ നടന്റെ നിലപാട്. പിപി മുകുന്ദനുമായി കൂടിക്കാഴ്ച നടത്തിയ ശേഷമായിരുന്നു പ്രതികരണം. കൂടിക്കാഴ്ചയില് സംഘടനാ കാര്യങ്ങള് ചര്ച്ചയായില്ലെന്നും സുരേഷ് ഗോപി മാധ്യമങ്ങളോട് പറഞ്ഞു.
ബിജെപി അധ്യക്ഷ സ്ഥാനത്തേക്കില്ലെന്ന് സുരേഷ് ഗോപി നേരത്തെയും വ്യക്തമാക്കിയതാണ്. ആ സ്ഥാനത്തേക്ക് വരേണ്ടത് രാഷ്ട്രീയക്കാരാണെന്നും സിനിമാക്കാരല്ലെന്നുമായിരുന്നു മുമ്പ് ഇതേ ചോദ്യം ചോദിചപ്പോള് നടന്റെ പ്രതികരണം.
കേരള ബിജെപിയില് കേന്ദ്ര നേതൃത്വം അടിമുടി മാറ്റത്തിനൊരുങ്ങുന്നുവെന്ന റിപ്പോര്ട്ടുകള് പുറത്ത് വന്നതോടെയാണ് സുരേഷ്ഗോപി സംസ്ഥാന അധ്യക്ഷന് ആയേക്കുമെന്ന വാര്ത്തകള് വന്ന് തുടങ്ങിയത്. മണ്ഡലം കമ്മിറ്റി മുതല് സംസ്ഥാന അദ്ധ്യക്ഷനെ വരെ മാറ്റുന്നതിനെക്കുറിച്ചുള്ള ചര്ച്ചകള് ബിജെപിയില് സജീവമായിരുന്നു. അതിനിടയ്ക്കാണ് സുരേഷ് ഗോപി കളം മാഞ്ഞത്.
https://www.facebook.com/Malayalivartha