ശിവശങ്കറിന്റെ കാര്യത്തില് ഇപ്പോഴും സര്ക്കാര് ഹൈസ്പീഡ്, ഫയലുകള് അതിവേഗം ഓടുന്നു
മുഖ്യമന്ത്രി പിണറായി വിജയന്റെ വിശ്വസ്തനും മുന് പ്രിന്സിപ്പല് സെക്രട്ടറിയുമായിരുന്ന എം.ശിവശങ്കര് ഇപ്പോഴും സസ്പെന്ഷനില് തുടരുകയാണ്.
സ്വര്ണക്കടത്തുകേസിലെ പ്രതികളുമായുള്ള അടുപ്പവും സ്വപ്ന സുരേഷിനെ സര്ക്കാര് ഓഫിസില് നിയമിച്ചതിനെ സംബന്ധിച്ച് അറിവുണ്ടായിരുന്നതുമാണ് എം.ശിവശങ്കറിന്റെ സസ്പെന്ഷനിലേക്കു നയിച്ചത് .ചീഫ് സെക്രട്ടറി, ധനകാര്യ അഡീഷനല് ചീഫ് സെക്രട്ടറി എന്നിവരടങ്ങിയ സമിതിയുടെ റിപ്പോര്ട്ടിന്റെ അടിസ്ഥാനത്തിലായിരുന്നു 2020 ജൂലൈ 16ന് ശിവശങ്കറിനെ സസ്പെന്ഡ് ചെയ്തത്. അദ്ദേഹം ഒരു വര്ഷത്തിലേറെയായി ഇപ്പോള് സെക്രട്ടറിയേറ്റിന് പുറത്താണെങ്കിലും അദ്ദേഹത്തിന്റെ ഫയലുകള് സെക്രട്ടറിയേറ്റില് സൂപ്പര് സ്പീഡിലാണ് നീങ്ങുന്നത്. ഇത് തെളിയിക്കുന്നത് ഇപ്പോഴും അദ്ദേഹത്തിന് സര്ക്കാര് സ്വാധീനമുണ്ടെന്നതാണ്.
അദ്ദേഹത്തിന്റ ആവശ്യമടങ്ങിയ ഫയലുകള് അതിവേഗത്തിലാണ് നീങ്ങുന്നത്. ശിവശങ്കരന്റെ മകന്റെ ചികിത്സയില് ചെലവായ തുക മെഡിക്കല് റീ ഇമ്പേഴ്സ്മെന്റ് വഴി ഉടനടിയാണ് പാസായത്. അപേക്ഷ കൊടുത്തു വെറും അഞ്ച് പ്രവര്ത്തി ദിവസത്തിനകമാണ് ശിവശങ്കറിന് മെഡിക്കല് റീ ഇമ്പേഴ്സ്മെന്റ് വഴി തുക പാസായത്.
സെപ്റ്റംബര് 25 കോസ്മോ ഹോസ്പിറ്റലില് മകന്റെ ചികിത്സ നടത്തിയതിന് 1,73,399 രൂപ ചെലവായെന്നും.മെഡിക്കല് റീ ഇമ്പേഴ്സ്മെന്റ് വഴി ഈ തുക അനുവദിക്കണമെന്നും അവശ്യപ്പെട്ട് പൊതുഭരണവകുപ്പില് അപേക്ഷ നല്കുകയായിരുന്നു. ഇതിലാണ് ഉടനടി നടപടി ഉണ്ടായിരുക്കുന്നത്.
സാധാരണക്കാരായവര് ചികിത്സാ സഹായത്തിനായി സര്ക്കാര് ഓഫീസുകള് കയറി ഇറങ്ങുമ്പോള് കണുന്നില്ലല്ലോ ഈ ശുഷ്കാന്തി എന്നുമാത്രമാണ് പൊതുജനങ്ങള്ക്ക് ചോദിക്കാനുള്ളത്.
2023 ജനുവരി മാസംവരെ ശിവശങ്കറിനു സര്വീസ് ശേഷിക്കുന്നുണ്ട്.എന്നിരിക്കെ ഇനി തിരിച്ച് ഇദ്ദേഹം സര്വ്വീസില് കയറുമോ എന്നു മാത്രമാണ് ഇനി അറിയേണ്ടത്. കേന്ദ്ര ഏജന്സികള് ഉദ്യോഗസ്ഥനെ കുടുക്കുകയായിരുന്നെന്ന അഭിപ്രായം സര്ക്കാര് വൃത്തങ്ങളിലുണ്ടെങ്കിലും വലിയ മാധ്യമശ്രദ്ധ നേടിയ കേസായതിനാല് നിയമോപദേശം തേടിയ ശേഷമായിരിക്കും തുടര് നടപടി. അഴിമതി കേസുകളില് പ്രതിയായ ഐഎഎസ് ഉദ്യോഗസ്ഥര് മുന്പ് സസ്പെന്ഷനുശേഷം സര്വീസിലേക്കു തിരിച്ചു വന്നിട്ടുണ്ട്.
ക്രിമിനല് കുറ്റത്തിന് അന്വേഷണമോ വിചാരണയോ നേരിടുന്ന ഐഎഎസ് ഉദ്യോഗസ്ഥനെ സംസ്ഥാന സര്ക്കാരിനു സസ്പെന്ഡ് ചെയ്യാം. അഴിമതിക്കേസ് അല്ലെങ്കില് സസ്പെന്ഷന് കാലാവധി ഒരു വര്ഷമാണ്.
അതിനുശേഷം സസ്പെന്ഷന് കാലാവധി നീട്ടണമെങ്കില് കേന്ദ്രത്തിന്റെ അനുമതി വേണം. ഇല്ലെങ്കില് സസ്പെന്ഷന് സ്വമേധയാ പിന്വലിക്കപ്പെടും. പരമാവധി രണ്ടുവര്ഷം മാത്രമേ, ഐഎഎസ് ഉദ്യോഗസ്ഥനെ സസ്പെന്ഷനില് നിര്ത്താന് കഴിയൂ. മുഖ്യമന്ത്രിയുടെ ഓഫീസില് ഇനിയിപ്പോള് അദ്ദേഹം നിയമിതനായില്ലെങ്കിലും മറ്റൊരു പോസ്റ്റ് ലഭിക്കാനുള്ള സാധ്യതയും നിലനില്ക്കുന്നുണ്ട്. അധികം വൈകാതെ തന്നെ അക്കാര്യത്തില് ഒരു തീരുമാനമാകും എന്നാണ് അറിയാന് കഴിയുന്നത്.
'
"
https://www.facebook.com/Malayalivartha
