കേരളത്തില്‍ ന്യൂന മര്‍ദ്ദത്തെ തുടര്‍ന്നുള്ള കനത്ത മഴയില്‍ വിവിധയിടങ്ങളില്‍ മണ്ണിടിച്ചില്‍ .തിരുവനന്തപുരം ജില്ലയിലെ മലയോര മേഖലയായ പൊന്മുടിയില്‍ വിവിധ സ്ഥലങ്ങളിലും, കൂടാതെ ഇന്നലെ അട്ടപ്പാടിയിലും നെല്ലിയാമ്പതിയിലും മണ്ണിടിച്ചില്‍ ഉണ്ടായി.

അട്ടപ്പാടിയില്‍ കാരറ-ഗൂളിക്കടവ് റോഡിലേക്കാണ് മണ്ണിടിഞ്ഞു വീണത്. നെല്ലിയാമ്പതിയില്‍ കുണ്ടറ ചോലയ്ക്ക് സമീപമാണ് മണ്ണിടിച്ചല്‍ ഉണ്ടായത്.ശക്തമായ കാറ്റിലും മഴയിലുമാണ് മണ്ണിടിച്ചല്‍ ഉണ്ടായത്. രണ്ടിടങ്ങളിലും റോഡ് ഗതാഗതം തടസ്സപ്പെട്ടിരുന്നു.

മാത്രമല്ല തിരുവനന്തപുരത്ത് വാമനപുരം നദി കര കവിഞ്ഞ് തുടങ്ങി. കരയില്‍ ഉളളവര്‍ ജാഗ്രത പുലര്‍ത്തുണെമന്ന് നിര്‍ദേശവും നല്‍കി. ആളപായവും മറ്റു നാശനഷ്ടങ്ങളും റിപ്പോര്‍ട്ട് ചെയ്തിട്ടില്ല.ജില്ലയില്‍ ഇന്നലെ രാത്രിയിലും മഴ തുടര്‍ന്നതോടെ താഴ്ന്ന പ്രദേശങ്ങള്‍ വെള്ളത്തിനടിയിലായി.പൊന്‍മുടി മൊട്ടമൂട് ആദിവാസി കോളനി ഒറ്റപ്പെട്ടു. കോളനിയിലേക്ക് എത്താന്‍ കഴിയുന്ന പാലം പൂര്‍ണമായും വെള്ളത്തിനടിയിലായി.

ന്യൂന മര്‍ദ്ദത്തെ തുടര്‍ന്ന് സംസ്ഥാനത്ത് ഇന്നും കനത്ത മഴയ്ക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. അറബിക്കടലില്‍ ചക്രവാത ചുഴലി ഇന്ന് ന്യൂന മര്‍ദ്ദമായി മാറുമെന്ന് മുന്നറിയിപ്പുണ്ടായിരുന്നു. മഴയുടെ പശ്ചാത്തലത്തില്‍ കേരള കര്‍ണാടക തീരത്ത് മത്സ്യബന്ധനത്തിന് വിലക്കേര്‍പ്പെടുത്തിയിട്ടുണ്ട്.ഇന്ന് മലപ്പുറം, വയനാട്, കണ്ണൂര്‍,ഇടുക്കി 9ന് ആലപ്പുഴ എന്നീ ജില്ലകളില്‍ ശക്തമായ മഴക്കുള്ള സാധ്യതയുള്ളതിനാല്‍ കേന്ദ്ര കാലാവസ്ഥ വകുപ്പ് യെല്ലോ അലേര്‍ട് പ്രഖ്യാപിച്ചിട്ടുണ്ട്.

കോട്ടയം, പാലക്കാട്, മലപ്പുറം ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. എന്നാല്‍ തിരുവനന്തപുരം ജില്ലയില്‍ യെല്ലോ അലര്‍ട്ടായിരുന്നു പ്രഖ്യാപിച്ചിരുന്നത്.കഴിഞ്ഞ ദിവസങ്ങളില്‍ വലിയ അളവില്‍ മഴ ലഭിച്ച പ്രദേശങ്ങളില്‍ മഴ തുടരുന്ന സാഹചര്യത്തില്‍ താഴ്ന്ന പ്രദേശങ്ങള്‍, നദീതീരങ്ങള്‍, ഉരുള്‍പൊട്ടല്‍-മണ്ണിടിച്ചില്‍ സാധ്യതയുള്ള മലയോര പ്രദേശങ്ങള്‍ തുടങ്ങിയ ഇടങ്ങളിലുള്ളവര്‍ അതീവ ജാഗ്രത പാലിക്കണം .

2018, 2019, 2020 വര്‍ഷങ്ങളില്‍ ഉരുള്‍പൊട്ടല്‍- മണ്ണിടിച്ചില്‍, വെള്ളപ്പൊക്കം എന്നിവ ഉണ്ടായ മേഖലകളില്‍ ഉള്ളവര്‍, ജിയോളജിക്കല്‍ സര്‍വേ ഓഫ് ഇന്ത്യയും സംസ്ഥാന ദുരന്ത നിവാരണ അതോറിറ്റിയുടെ വിദഗ്ധ സമിതിയും അപകട സാധ്യത മേഖലകള്‍ അഥവാ വാസയോഗ്യമല്ലാത്ത പ്രദേശങ്ങള്‍ എന്ന് കണ്ടെത്തിയ സ്ഥലങ്ങളില്‍ താമസിക്കുന്നവരും അവിടങ്ങളിലുള്ള തദ്ദേശ സ്ഥാപനങ്ങളും സര്‍ക്കാര്‍ സംവിധാനങ്ങളും അപകട സാധ്യത മുന്നില്‍ കണ്ട് കൊണ്ടുള്ള തയ്യാറെടുപ്പുകള്‍ പൂര്‍ത്തീകരിക്കേണ്ടതാണ്.

കോവിഡിന്റെ പശ്ചാത്തലത്തില്‍ ദുരിതാശ്വാസ ക്യാമ്പുകള്‍ നടത്താന്‍ സംസ്ഥാന ദുരന്ത നിവാരണ അതോറിറ്റി ഓറഞ്ച് ബുക്ക് 2021 ലൂടെ നിര്‍ദേശിച്ച തരത്തിലുള്ള തയ്യാറെടുപ്പുകള്‍ പൂര്‍ത്തീകരിക്കേണ്ടതാണെന്നും അധികൃതര്‍ മുന്നറിയിപ്പ് നല്‍കി.